ក្តីរីករាយរបស់ប្រជាជន Khmer ដែលទទួលបានប័ណ្ណបើកបរ

អស់រយៈពេលជាច្រើនឆ្នាំកន្លង ដោយសារតែជំនាញខាងអាន និងសរសេរភាសា Việt Nam មានកម្រិត លោក Danh Hồng Cư (អាយុ ៤៦ ឆ្នាំ នៅភូមិ Thanh Sơn ឃុំ Vĩnh Mỹ) មិនហ៊ានចុះឈ្មោះប្រឡងយកប័ណ្ណបើកបរនោះទេ។ ហើយតម្រូវការដឹកជញ្ជូនរបស់គ្រួសារគាត់សម្រាប់ការងារ និងទំនិញគឺមានសារៈសំខាន់ខ្លាំងណាស់ ប៉ុន្តែឧបសគ្គភាសាបានបង្ខំឱ្យគាត់ពឹងផ្អែកលើតែម៉ូតូ ៥០ccតែមួយគ្រឿងជាប្រចាំ។ ថ្មីៗនេះ ក្តីរីករាយយ៉ាងខ្លាំងបានកើតឡើងនៅពេលដែលលោក Cư ជាមនុស្សម្នាក់ក្នុងចំណោមជនជាតិភាគតិចទាំង ៣០ នាក់ដែលបានប្រឡងជាប់ និងទទួលបានប័ណ្ណបើកបរម៉ូតូប្រភេទ A1។

នគរបាលចរាចរណ៍ Cà Mau ណែនាំបេក្ខសិស្សជាជនជាតិភាគតិចធ្វើតេស្តខាងទ្រិស្តីបើកបរម៉ូតូប្រភេទ A1។

ការប្រឡងបានប្រព្រឹត្តិឡើងនៅថ្ងៃទី ២៧ ខែសីហា នៅមណ្ឌលប្រឡងនៃអនុមហាវិទ្យាល័យ Cà Mau (មានទីតាំងនៅសង្កាត់ Bạc Liêu)។ មុនពេលប្រឡង កម្មាភិបាលនគរបាលចរាចរណ៍បានផ្តល់ការណែនាំយ៉ាងហ្មត់ចត់ ដោយជួយបេក្ខជនឱ្យយល់ច្បាស់អំពីនីតិវិធី និងជំហាននីមួយៗសម្រាប់ការប្រឡងផ្នែកខាងទ្រឹស្តី។ អាស្រ័យមានការគាំទ្រយ៉ាងយកចិត្តទុកដាក់នេះ ត្រឹមតែរយៈពេល ២ ម៉ោងបន្ទាប់ពីការប្រឡងបានបញ្ចប់ អ្នកដែលប្រឡងជាប់ក៏បានទទួលប័ណ្ណបើកបរអេឡិចត្រូនិករបស់ខ្លួនដែលបានបញ្ចូលដោយផ្ទាល់ទៅក្នុងកម្មវិធី VNeTraffic។

ក្តីរីករាយបន្ទាប់ពីការប្រឡងរួច លោក Danh Hồng Cư បានចែករំលែកថា៖ «មុនពេលប្រឡង ខ្ញុំមានការព្រួយបារម្ភខ្លាំងព្រោះខ្ញុំមិនជំនាញខាងភាសា Việt Nam នោះទេ ប៉ុន្តែដោយមានការណែនាំដ៏យកចិត្តទុកដាក់ពីកម្មាភិបាលនគរបាលចរាចរណ៍ ខ្ញុំបានប្រឡងជាប់ពេញដោយទំនុកចិត្ត។ ឥឡូវនេះខ្ញុំមានប័ណ្ណបើកបរហើយ ខ្ញុំមានអារម្មណ៍ថាមានសុវត្ថិភាពជាងមុនសម្រាប់ក្នុងការបើកបរម៉ូតូកម្រិតធំជាងមុនដើម្បីដឹកជញ្ជូនទំនិញផងដែរ»។

សកម្មភាពដ៏មានអត្ថន័យនេះគឺជាផ្នែកមួយនៃផែនការលេខ ៥៥ ចុះថ្ងៃទី ៣ ខែសីហា ឆ្នាំ ២០២៦ របស់ការិយាល័យនគរបាលចរាចរណ៍នៃស្នងការដ្ឋាននគរបាលខេត្ត Cà Mau ស្តីពីការរៀបចំការប្រឡងយកប័ណ្ណបើកបរម៉ូតូប្រភេទ A1 សម្រាប់សិស្សសាលា និងបងប្អូនជនជាតិភាគតិចដែលមិនចេះ ឬមានសមត្ថភាពមានកម្រិតក្នុងការអាន និងសរសេរភាសា Việt Nam។ នេះគឺជាជំហានជាក់ស្តែងមួយក្នុងការអនុវត្តសារាចរលេខ ១០៨ របស់ក្រសួងសន្តិសុខសាធារណៈ ដែលមានគោលបំណងឆ្លើយតបតម្រូវការរបស់ប្រជាជនសម្រាប់ការរៀនសូត្រ ធ្វើការងារ និងចូលរួមចរាចរណ៍ប្រកបដោយសុវត្ថិភាព។

កម្មាភិបាលនគរបាលចរាចរណ៍រំលឹកឡើងវិញនូវចំណេះដឹងខាងច្បាប់ចរាចរណ៍ជូនបេក្ខជនជាជនជាតិភាគតិច។

លោកវរសេនីយ៍ឯក Bùi Trung Kiên ប្រធានការិយាល័យនគរបាលចរាចរណ៍នៃស្នងការដ្ឋាននគរបាលខេត្ត Cà Mau បានមានប្រសាសន៍ថា៖ ការរៀបចំការប្រឡងយកប័ណ្ណបើកបរចល័ត និងការផ្តល់កាឧបត្ថម្ភយ៉ាងពិសេសសម្រាប់សិស្សសាលា និងបងប្អូនជនជាតិភាគតិច មានគោលបំណងអនុវត្តចលនាត្រាប់តាម «បីល្អបំផុត» ក្នុងកម្លាំងនគរបាលចរាចរណ៍ប្រកបដោយប្រសិទ្ធភាព ដោយផ្តោតលើលក្ខណៈវិនិច្ឆ័យ «ជិតស្និទ្ធបំផុតជាមួយប្រជាជន»។ កម្លាំងនគរបាលបានខិតខំប្រឹងប្រែងនាំយកការធ្វើតេស្តបើកបរមកជិតសហគមន៍ កាត់បន្ថយពេលវេលាធ្វើដំណើរ និងការចំណាយ ព្រមទាំងប្រើប្រាស់ការពេញចិត្តរបស់ប្រជាជនជារង្វាស់នៃគុណភាពសេវាកម្មទៀតផង។

អនុវត្តតាមផែនការលេខ ៥៥ ទូទាំងខេត្តបានទទួលពាក្យសុំច្បាប់ចូលរួមប្រឡងយកប័ណ្ណបើកបរចំនួន ៥.៥៤០ លិខិតពីសិស្សានុសិស្ស។ ចំពោះក្រុមជនជាតិភាគតិចដែលមិនចេះ ឬការនិយាយស្តីខាងភាសា Việt Nam មានកម្រិត ការិយាល័យនគរបាលចរាចរណ៍ក៏បានបន្តសម្របសម្រួលយ៉ាងជិតស្និទ្ធជាមួយអនុមហាវិទ្យាល័យ Cà Mau ដែលប្រចាំការនៅ Bạc Liêu ព្រមទាំងមជ្ឈមណ្ឌលបណ្តុះបណ្តាល និងធ្វើតេស្តបើកបរ Minh Khang Cà Mau ដើម្បីពិនិត្យ ចងក្រងបញ្ជី និងរៀបចំការធ្វើតេស្តជាបន្តបន្ទាប់ក្នុងរយៈពេលខាងមុខ ដោយធានាថាពលរដ្ឋគ្រប់រូបនឹងមានសិទ្ធិទទួលបានការឧបត្ថម្ភទាន់ពេលវេលា៕

Nguyễn Quốc