តំបន់ជនបទទទួលអំណរនិទាឃរដូវមុនថ្ងៃកំណត់

បុណ្យចូលឆ្នាំថ្មីនេះ ក្តីសប្បាយរីករាយរបស់បងប្អូនប្រជាជនឃុំ Hồng Dân ហាក់ដូចជាកើនឡើងទ្វេដង។ មិនត្រឹមរដូវស្រូវ និងបង្គាបានផលប៉ុណ្ណោះទេ សម្រាប់បងប្អូនដែលរស់នៅតាមបណ្តោយដងផ្លូវ តាសួន ក្តីសប្បាយរីករាយកាន់តែពេញលេញថែមទៀត នៅពេលដែលផ្លូវជនបទត្រូវបានវិនិយោគកសាងកម្រិតខ្ពស់ និងពង្រីកឱ្យបានល្អស្អាត ដោយដាក់ឱ្យប្រើប្រាស់ចំឱកាសបុណ្យចូលឆ្នាំប្រពៃណីជាតិឆ្នាំមមី ២០២៦ នេះ។

ប្រជាជនធ្វើដំណើរលើដងផ្លូវថ្មី។

ក្នុងបរិយាកាសនិទាឃរដូវកំពុងតែរីកសាយភាយ នៅលើផ្លូវបេតុងថ្មី បងប្អូនធ្វើដំណើរទៅមកយ៉ាងមមាញឹក និងដឹកជញ្ជូនទំនិញបានងាយស្រួលជាងពេលណាៗទាំងអស់។ រំលឹកឡើងវិញកាលពីប៉ុន្មានឆ្នាំមុននេះ តាមដងផ្លូវ Tà Suôl គ្រាន់តែជាផ្លូវកៅស៊ូតូចចង្អៀត មានទទឹងមិនដល់ ២ ម៉ែត្រផង ហើយបន្ទាប់មកត្រូវបានពង្រីកជាផ្លូវបេតុងទទឹង ២,៥ ម៉ែត្រ។ ឆ្លងកាត់រយៈពេលប្រើប្រាស់យូរអង្វែង ផ្ទៃផ្លូវត្រូវខូចខាតធ្ងន់ធ្ងរ ហើយការធ្វើដំណើរទៅមក និងជួញដូរមុខទំនិញរបស់បងប្អូនប្រជាជនក៏ជួបការលំបាកខ្លាំងណាស់ដែរ ជាពិសេសនៅរដូវភ្លៀង។

ចំពោះតម្រូវការដ៏ចាំបាច់របស់បងប្អូនប្រជាជន នៅពេលមានគោលការណ៍ពង្រីកផ្លូវថ្នល់ រដ្ឋអំណាចភូមិភាគបានរៀបចំកិច្ចប្រជុំប្រជាជន ឃោសនា និងចលនា។ ដោយមានក្តីរំភើបដែលផ្លូវនៃក្តីស្រមៃជាយូរមកហើយត្រូវបានវិនិយោគ បងប្អូននៅភូមិភាគមានការឯកភាព និងគាំទ្រយ៉ាងពេញទំហឹង។ គ្រួសារជាច្រើនបានស្ម័គ្រចិត្តបរិច្ចាគដី រួមកម្លាំងពលកម្ម បង្កលក្ខណៈងាយស្រួលដើម្បីឱ្យគម្រោងអាចដំណើរការបានឆាប់រហ័ស និងទាន់តាមកាលវិភាគ។

លោក Danh Út នៅភូមិ Đàu Sấu បានចែករំលែកថា៖ “ដោយបានឮដំណឹងថារដ្ឋធ្វើផ្លូវ ថ្នល់ ប្រជាជននៅទីនេះអ្នកណាក៏សប្បាយចិត្តណាស់ដែរ ហើយគាំទ្រយ៉ាងអស់ពីចិត្តទៀតផង។ អ្នកដែលមានដីរងផលប៉ះពាល់ដោយគម្រោងក៏បរិច្ចាគដី អ្នកផ្សេងទៀតក៏ចូលរួមចំណែកថ្ងៃធ្វើការដើម្បីកាប់ឆ្ការ។ គ្រួសារខ្ញុំបានបរិច្ចាគផ្ទៃដីចំនួន ១២៥ ម៉ែត្រ។ មានផ្លូវនេះ ប្រជាជនក៏មានក្តីរំភើបយ៉ាងខ្លាំងណាស់ដែរ”។

“បុណ្យចូលឆ្នាំថ្មីនេះ សប្បាយខ្លាំងណាស់ដោយមានផ្លូវថ្នល់ធំទូលាយ ប្រជាជនលក់ដូរក៏ងាយស្រួលណាស់ដែរ ហើយកូនក្មួយទៅរៀនក៏មិនចាំបាច់ភ័យខ្លាចនោះដែរ។ សូម្បីតែរថយន្ត និងរថយន្តដឹកទំនិញក៏អាចចូលដល់កន្លែងបាន ការសាងសង់ផ្ទះក៏ងាយស្រួលជាងមុនច្រើនដែរ” លោក Danh Minh នៅភូមិ Đầu Sấu បានឱ្យដឹងដោយក្តីសប្បាយរីករាយបែបនេះ។

គម្រោងពង្រីកដងផ្លូវ Tà Suôl ឆ្លងកាត់ភូមិសាស្ត្រភូមិ Đầu Sấu និង Tà Suôl មានប្រវែងសរុបជាង ៤.១០០ ម៉ែត្រ ផ្ទៃផ្លូវបេតុងទទឹង ៣,៥ ម៉ែត្រ។ ផ្លូវមានស្ពានបេតុងរឹងមាំចំនួន ២ ខ្សែដោយចំណាយថវិកាសាងសង់សរុបប្រមាណជាង ២២ ពាន់លានដុង។ តាមផែនការ គម្រោងនឹងត្រូវបានផ្តើមអនុវត្តចាប់តាំងពីខែតុលា ឆ្នាំ ២០២៥ រហូតដល់ខែកក្កដា ឆ្នាំ ២០២៦។ ប៉ុន្តែ ដោយសារការអនុវត្តបានល្អនូវការផ្សព្វផ្សាយជាសាធារណៈ តម្លាភាព និងលទ្ធិប្រជាធិបតេយ្យក្នុងដំណើរការអនុវត្ត បងប្អូនប្រជាជនមានទំនុកចិត្តទាំងស្រុង និងត្រៀមខ្លួនរួចជាស្រេចក្នុងការបរិច្ចាគផ្ទៃដីរបស់ខ្លួនផងដែរ។ ទន្ទឹមនឹងនោះ គឺការដឹកនាំយ៉ាងម៉ឺងម៉ាត់ និងការពន្លឿនកាលវិភាគ អាស្រ័យហេតុនេះហើយ សំណង់ផ្លូវក៏បានសម្រេចមុនកាលកំណត់ និងដាក់ឱ្យប្រើប្រាស់ទាន់ពេលវេលាក្នុងឱកាសបុណ្យចូលឆ្នាំថ្មីប្រពៃណីជាតិឆាប់ៗខាងមុខនេះឯង។

ផ្លូវ Tà Suôl បានសម្រេចទាន់ពេលវេលាក្នុងឱកាសបុណ្យចូលឆ្នាំប្រពៃណីជាតិឆ្នាំមមី ២០២៦ បង្កលក្ខណៈងាយស្រួលដល់ប្រជាជនក្នុងការធ្វើដំណើរ និងទទួលអំណរនិទាឃរដូវបុណ្យចូលឆ្នាំ។

លោក Nguyễn Nhân Đức ប្រធានគណៈកម្មាធិការប្រជាជនឃុំ Hồng Dân បានផ្តល់ព័ត៌មានថា៖ "ការពន្លឿនល្បឿន និងកសាងសម្រេចផ្លូវថ្នល់ បានរួមចំណែកអភិវឌ្ឍសេដ្ឋកិច្ច-សង្គមនៅភូមិភាគ ជាពិសេសនាំមកនូវក្តីសប្បាយរីករាយយ៉ាងសម្រាប់បងប្អូនប្រជាជនក្នុងឱកាសបុណ្យចូលឆ្នាំផងដែរ"។

ចំពោះ សំណង់ ស្ពាន អង្គភាពសាងសង់បានប្រមូលផ្តុំកម្លាំងធនធានមនុស្ស និងគ្រឿងចក្រជាអតិបរមា ដើម្បីធានាការសម្រេចឱ្យទាន់តាមផែនការ។ រដ្ឋអំណាចភូមិភាគបន្តចលនាប្រជាជនឱ្យដាំផ្កា ដាំដើមឈើលម្អ រក្សាអនាម័យ និងការពារច្រាំងទប់ការបាក់ដី រួមចំណែកធ្វើឱ្យផ្លូវកាន់តែមានចីរភាព និងស្រស់ស្អាត។

ផ្លូវ Tà Suôl ដែលបានសម្រេចមិនត្រឹមតែធ្វើឱ្យក្តីស្រមៃជាច្រើនឆ្នាំរបស់ប្រជាជនឃុំ Hồng Dân ក្លាយជាការពិតប៉ុណ្ណោះទេ ថែមទាំងរួមចំណែកពង្រឹងជំនឿទុកចិត្តរបស់ប្រជាជនចំពោះគោលនយោបាយដ៏ត្រឹមត្រូវ និងស្របតាមបំណងប្រាថ្នារបស់បងប្អូនប្រជាជនរបស់បក្ស រដ្ឋ និងរដ្ឋអំណាចភូមិភាគ បង្កើតជាមូលដ្ឋានគ្រឹះដ៏សំខាន់ដើម្បីឱ្យឃុំ Hồng Dân មានការរីកចម្រើនខ្លាំងក្លាក្នុងការកសាងជនបទថ្មី៕

Thanh Hải - Hoàng Đăng