Truyền hình
សិស្ស និស្សិតក្រីក្ររាប់រយនាក់ បំផុតគឺសិស្ស និស្សិតជនជាតិខ្មែរនៅខេត្តសុកត្រាំង មានកម្លាំងចិត្តនិងស្មារតីបន្ថែម ដើម្បីជឿជាក់លើខ្លួនឯង ឈានឡើងរៀនសូត្របានល្អ អាស្រ័យបានឧបត្ថម្ភអាហារូបករណ៍។
លោកស្រីផាមធីហុងអៀង អនុប្រធានសមាគមកាកបាទក្រហមខេត្តសុកត្រាំង
ជូនអាហារូបករណ៍ដល់សិស្ស។
ជាច្រើនឆ្នាំមកនេះ ខេត្តសុកត្រាំង ទទួលបានប្រភពអាហារូបករណ៍ឧបត្ថម្ភជាច្រើនសម្រាប់សិស្ស និស្សិតក្រីក្រ រៀនពូកែ។ ក្នុងនោះ មានអាហារូបករណ៍លឿងឌិញកួរ វឺអាយិញ យឿងគីហ៊ីប និងអាហារូបករណ៍នៃកម្មវិធី “ដើម្បីប្អូនសង្វាត់រៀនសូត្រ” ។ល។ របស់អង្គភាព ក្រុមហ៊ុន អាជីវកម្មនិងសប្បុរសជនធ្វើហិរញ្ញប្បទាន។ ឆ្លងតាមរយៈនោះ បានឧបត្ថម្ភសិស្ស និស្សិតក្រីក្ររាប់ពាន់នាក់ឆ្លងកាត់លំបាក ដើម្បីរៀនសូត្របានល្អ។ ដោយឡែកអាហារូបករណ៍របស់មូលនិធិទៀងតឹម នៃសម្ព័ន្ធក្រុមហ៊ុន Vingroup ត្រូវបានផ្សព្វផ្សាយអនុវត្តចាប់ពីឆ្នាំ២០១៥ រហូតមកទល់ពេលនេះ បានឧបត្ថម្ភសិស្ស និស្សិតរាប់ពាន់នាក់ក្នុងដំណាក់កាលសិក្សារៀនសូត្រ។ មូលនិធិទៀងតឹម ឧបត្ថម្ភសិស្សបឋមសិក្សា អនុវិទ្យាល័យ វិទ្យាល័យក្នុងអំឡុងពេលសិក្សា ៩ខែ មធ្យមភាគ៧០០ពាន់ដុង/ខែ ចំណែកនិស្សិតក្រីក្របានឧបត្ថម្ភបង់កម្រៃសិក្សាមិនលើសពី២០លានដុង/ឆ្នាំ។
តំណាងថ្នាក់ដឹកនាំខេត្តសុកត្រាំង និងមូលនិធិទៀងតឹម ជូនអាហាររូបករណ៍
ដល់សិស្សនិស្សិតក្រីក្ររៀនពូកែ។
ឆ្នាំសិក្សា២០២៣-២០២៤ មូលនិធិទៀងតឹម បានឧបត្ថម្ភសិស្ស និស្សិតដែលមានស្ថានភាពលំបាក២៤២នាក់នៅលើភូមិសាស្រ្តខេត្ត រួមចំណែកជួយប្អូនៗបន្តការសិក្សារៀនសូត្រ។ ប្អូនវ៉ូវត្រឿងយ្វី សិស្សថ្នាក់ទី១២ វិទ្យាល័យដាយង៉ាយ ស្រុកឡុងភូ ឱ្យដឹង៖ “គ្រួសារប្អូនក្រលំបាក ម្តាយមានជំងឺក្រលៀន ឪពុកធ្វើជាងសំណង់នៅក្រុងហូជីមិញ ដើម្បីមានប្រាក់គិតគូរឱ្យម្តាយលាងឈាមផង និងគិតគូរឱ្យប្អូនទាំងពីរនាក់រៀនផង។ បច្ចុប្បន្ន បងប្អូនទាំងពីររស់នៅជាមួយពូនិងមីង ម្ល៉ោះហើយក្នុងអំឡុង៧ឆ្នាំមកនេះ អាហារូបករណ៍នៃមូលនិធិទៀងតឹមបានឧបត្ថម្ភ ពិតមានអត្ថន័យយ៉ាងធំធេងសម្រាប់ប្អូន ជួយឱ្យប្អូនជឿជាក់លើខ្លូនឯងរៀនបានល្អ ដើម្បីបន្តចូលមហាវិទ្យាល័យ”។ ចំណែកប្អូនឡាយធីង៉ឹង សិស្សថ្នាក់ទី៧ អនុវិទ្យាល័យវិញហាយ ទីរួមខេត្តវិញហាយ ឱ្យដឹង៖ “ឪពុកស្លាប់ចោលតាំងពីតូច ប្អូនរស់នៅនឹងជីដូនអាយុ៧០ឆ្នាំ រាល់ថ្ងៃទៅរើសខ្ចឹមក្រហមដើម្បីរកប្រាក់គិតគូរជីវភាពប្រចាំថ្ងៃ។ ព្រោះហេតុនោះ ពេលទទួលបានអាហារូបករណ៍ ប្អូនមានសេចក្តីត្រេកអរយ៉ាងក្រៃលែង មានឱកាសបានបន្តការសិក្សា ប្អូនសន្យានឹងខិតខំប្រឹងប្រែងសិក្សារៀនសូត្រ ដើម្បីទទួលបានលទ្ធផលល្អ តបទៅនឹងការលះបង់របស់ជីដូន និងការឧបត្ថម្ភអាហារូបករណ៍របស់មូលនិធិទៀងតឹម”។
តាមប្រសាសន៍លោកស្រី ពុងធីមីឡែ ទទួលបន្ទុកមូលនិធិទៀងតឹមនៃសម្ព័ន្ធក្រុមហ៊ុន Ving roup ភាគខាងត្បូង នៅខេត្តសុកត្រាំង មូលនិធិទៀតតឹម អាទិភាពឧបត្ថម្ភដល់សិស្ស និស្សិត មានស្ថានភាពលំបាក ឈានឡើងក្នុងការសិក្សា។ មូលនិធិទៀងតឹម សង្ឃឹមថា សិស្សនិស្សិតក្រីក្រនៅលើភូមិសាស្រ្តខេត្តសុកត្រាំង ដែលទទួលបានអាហារូបករណ៍ មានការជឿជាក់លើខ្លួនឯងឆ្លងកាត់លំបាកដើម្បីសិក្សាបានល្អ អនុវត្តនូវក្តីស្រមៃចង់ក្លាយជាមនុស្សមានប្រយោជន៍ដល់គ្រួសារ សង្គមនិងប្រទេសជាតិ។ បន្ទាប់ពីបានទទួលអាហារូបករណ៍មួយឆ្នាំ សិស្ស និស្សិតក្រីក្រ គប្បីដាក់ពាក្យពន្យាពេល ដើម្បីមូលនិធិទៀងតឹម បន្តឧបត្ថម្ភប្អូនៗនៅឆ្នាំសិក្សាបន្តបន្ទាប់ទៀត៕
លីធាន - វិមាន
Xem thêm bình luận