កសិករម្ចាស់ការរដូវស្រូវសម្រក

ដើម្បីម្ចាស់ការក្នុងការបង្កបង្កើនផល បង្ការភាពរាំងស្ងួត និងជ្រាបជាតិប្រៃនៅចុងរដូវ បច្ចុប្បន្នកសិករនៅឃុំតឹងឡុកកំពុងសកម្មកែលម្អស្រែ ចុះពូជស្រូវរដូវសម្រកឆ្នាំ២០២៥ តាមរដូវកាលដែលបានកំណត់។

លោក Huỳnh Khương កំពុងទប់ភ្លឺស្រែ និងរៀបចំដីត្រៀមសាបព្រោះរដូវស្រូវសម្រក។

ជិតមួយសប្តាហ៍កន្លងមកនេះ គ្រួសារលោក Huỳnh Khương នៅភូមិលេខ៧ តែងមមាញឹកនឹងស្រែរបស់ខ្លួន ដូចជាការភ្ជួររាស់ដី កាប់ឆ្កាស្មៅតាមភ្លឺស្រែ បូមទឹកបញ្ចូល និងត្រៀមពូជស្រូវសុទ្ធ OM 5451 ដើម្បីសាបព្រោះលើផ្ទៃដីជាង ៣ ហិកតា។

លោក Khương ឱ្យដឹង៖ “តាមការណែនាំរបស់អ្នកឯកទេស រដូវស្រូវសម្រកឆ្នាំនេះ កសិករនឹងប្រមូលផ្តុំសាបព្រោះជាពីរលើក។ ក្នុងនោះ តំបន់រងឥទ្ធិពលពីភាពរាំងស្ងួត និងជ្រាបជាតិប្រៃចុងរដូវ មានទំនប់ការពារ ត្រូវម្ចាស់ការបូមទឹកចេញ ហើយសាបព្រោះឱ្យបានឆាប់ពីថ្ងៃទី ៥ ដល់ថ្ងៃ ១៥ ខែតុលា។ រីឯតំបន់ទំនាបដែលមិនអាចម្ចាស់ការបូមទឹកបានដោយសារទឹកស្រកយឺត ត្រូវសាបព្រោះនៅលើកទី២ ចាប់ពីថ្ងៃទី ១៥ ដល់ ២៥ខែតុលា។ ផ្ទៃដីផលិតរបស់គ្រួសារខ្ញុំស្ថិតនៅតំបន់ទំនាប ហើយប៉ុន្មានឆ្នាំកន្លងមកនេះ តែងរងការជ្រាបជាតិប្រៃបណ្តាលឱ្យស្រូវមានការខូចខាត ដូច្នេះរដូវស្រូវសម្រកឆ្នាំនេះ គ្រួសារខ្ញុំសម្រេចចិត្តអនុវត្តការសាបព្រោះឱ្យបានឆាប់រហ័ស តាមរដូវកាលលើកទី១ ដើម្បីជៀសវាងភាពរាំងស្ងួតនិងជ្រាបជាតិប្រៃនៅចុងរដូវ”។

លោក Khương បានបន្ថែមទៀតថា បច្ចុប្បន្នកសិករនៅភូមិលេខ៧ កំពុងប្រញាប់ប្រញាល់រៀបចំដី និងជ្រើសពូជស្រូវសមស្របដូចជា OM 5451 និង OM 6976 និង​ Đài Thơm 8 ជាដើម ដើម្បីកាត់បន្ថយការដួលរលំ ព្រោះតំបន់នេះជាតំបន់ដីទំនាប។ ក្នុងរយៈពេល ២ ឆ្នាំមកនេះ តំបន់ដីកសិកម្មបង្កបង្កើនផលស្រូវបានពីរដូវរបស់ឃុំ បានរៀបចំបំបែកចេញពីតំបន់បង្កបង្កើនផលស្រូវ-បង្គា ហេតុនេះហើយប្រព័ន្ធទំនប់ការពារ និងទំនប់បង្ខាំងជាតិប្រៃរក្សាជាតិសាបមានភាពពេញលេញល្អ ធ្វើឱ្យកសិករស្ងប់ចិត្តសម្រាប់ក្នុងការបង្កបង្កើនផល។

កសិករឃុំ Tân Lộc កំពុងប្រញាប់ប្រញាល់ឈានចូលរដូវស្រូវសម្រក។

កសិករ Hữu Chí Hùng ជនជាតិ Khmer នៅភូមិលេខ៧ ឱ្យដឹងថា៖ តាំងពីដើមរដូវផ្នែកខាងវិស័យកសិកម្មឃុំបានផ្សព្វផ្សាយ និងចលនាឱ្យបងប្អូនអនុវត្តតាមរដូវកាលសាបព្រោះឱ្យបានត្រឹមត្រូវ ព្រមទាំងត្រៀមលក្ខខណៈចាំបាច់ឱ្យបានល្អ ជាពិសេសគឺពូជស្រូវ បង្កើនផ្ទៃដីដាំដុះពូជស្រូវមានគុណភាពខ្ពស់ ផ្សារភ្ជាប់នឹងការបង្កបង្កើនផលតាមទម្រង់វាលស្រែទ្រង់ទ្រាយធំ សហការ ធានាទីផ្សារលក់ផលិតផល។ល។ រៀបចំយន្តការក្រុមពូជស្រូវគុណភាពខ្ពស់ ស្របតាមស្តង់ដារ អាចធន់នឹងភាពរាំងស្ងួត ជាតិជូរជាតិប្រៃបានល្អ ដូចជា៖ OM 5451, OM 6976 និង Đài thơm 8 ជាដើម។ ព្រមទាំងហ៊ានអនុវត្តបច្ចេកវិទ្យាទំនើបក្នុងការបង្កបង្កើនផល។ តាមដាន និងធ្វើបច្ចុប្បន្នភាពព័ត៌មានអំពីស្ថានភាពជំងឺលើដំណាំ ការព្យាករណ៍ និងការប្រកាសអាសន្នអំពីការប្រែប្រួលនៃអាកាសធាតុ។

បង Thạch Bèng កសិករនៅភូមិលេខ៧ រីករាយ៖ “ក្រោយពីប្រមូលផលស្រូវរដូវវស្សារួច ខ្ញុំក៏ចាប់ផ្តើមពង្រឹងភ្លឺស្រែ និងរៀបចំដីយ៉ាងល្អិតល្អន់ ធានាឱ្យមានពេលសម្រាករវាងរដូវទាំងពីរ ដើម្បីកំចាត់សត្វល្អិត។ ព្រមទាំងជ្រើសរើសពូជស្រូវសុទ្ធមានការបញ្ជាក់ពីមជ្ឈមណ្ឌលពូជកសិកម្មយកមកសាបព្រោះ ទោះបីជាតម្លៃខ្ពស់ជាងបន្តិចបើធៀបនឹងពូជស្រូវធម្មតា ប៉ុន្តែអត្រាដំណុះគឺខ្ពស់ និងសម្រេចបានគុណភាពល្អ។ រដូវនេះ ខ្ញុំបានចុះកិច្ចសន្យាជាមួយក្រុមហ៊ុនដើម្បីធានាទីផ្សារសម្រាប់ពូជស្រូវ Đài thơm 8 ដូច្នេះខ្ញុំពិតជាមានទំនុកចិត្តខ្លាំងណាស់”។

បង Thạch Bèng (ទី ២ ខាងស្តាំ) កំពុងត្រៀមសាបព្រោះស្រូវរដូវសម្រក។

ផែនការរដូវស្រូវសម្រកឆ្នាំនេះ ឃុំ Tân Lộc ទាំងមូលនឹងចុះពូជបានជិត ៧០០ ហិកតា ហើយគិតមកដល់ពេលនេះ បងប្អូនកសិករបានចុះពូជជិត ៥០០ ហិកតាហើយ ដោយភាគច្រើននៅភូមិ៖ លេខ៥ លេខ៧ និងលេខ៨ ហើយច្រើនជាងគេគឺនៅភូមិលេខ៧ ដែលមានផ្ទៃដីប្រមាណជិត ៤០០ ហិកតា។

លោក Tần Chí Cường ប្រធានសមាគមកសិករឃុំ ឱ្យដឹង៖ “វិស័យកសិកម្មខេត្តបានសហការជាមួយភូមិភាគនានា ដើម្បីណែនាំកសិករឱ្យម្ចាស់ការចុះពូជព្រមៗគ្នា តាមក្របខ័ណ្ឌរដូវកាល ដើម្បីជៀសវាងការបំផ្លាញរបស់សត្វមមាច។ ប្រើប្រាស់ជីឱ្យមានតុល្យភាព ប្រើប្រាស់ថ្នាំការពាររុក្ខជាតិដោយអនុវត្តតាមគោលការណ៍ “៤ ត្រូវ” និង “ត្រូវ១បន្ថយ៥”។ តាមដាន និងគ្រប់គ្រងដិតដល់នូវជំងឺលើដំណាំនៅតំបន់នីមួយៗ ដើម្បីរៀបចំដំណោះស្រាយឆ្លើយតបឱ្យបានទាន់ពេលវេលា និងមានប្រសិទ្ធភាព”៕

Lâm Đươl