រួមដៃគ្នាដើម្បីសង្គមសិក្សា

ប៉ុន្មានឆ្នាំកន្លងមកនេះ ការងារជំរុញការសិក្សា ជម្រុញបញ្ញា និងការកសាងសង្គមសិក្សារបស់ខេត្ត Cà Mau សម្រេចបានលទ្ធផលជាច្រើនគួរឱ្យកត់សម្គាល់ ។ លទ្ធផលទាំងនេះគឺអាស្រ័យដោយការសហការជិតស្និទ្ធរវាងបណ្ដាផ្នែក ស្ថាប័ន អង្គការមហាជន ជាពិសេសគឺរវាងរណសិរ្សមាតុភូមិ និងសមាគមជំរុញការសិក្សាគ្រប់លំដាប់ថ្នាក់ ។

ការងារថែទាំសិស្សជនជាតិភាគតិច តែងទទួលបានការយកចិត្តទុកដាក់ឧបត្ថម្ភពីសប្បុរសជន ។

យោងលើកម្មវិធីសហការដែលបានចុះហត្ថលេខា រណសិរ្សមាតុភូមិ និងសមាគមជំរុញការសិក្សា តែងសហការអនុវត្តភារកិច្ចជំរុញការសិក្សា លើកទឹកចិត្តអ្នកមានទេពកោសល្យ និងកសាងសង្គមសិក្សាឱ្យកាន់តែជិតស្និទ្ធ និងមានប្រសិទ្ធភាព។ ជារៀងរាល់ឆ្នាំ រណសិរ្សមាតុភូមិខេត្ត បានចេញផ្សាយឯកសារចង្អុលការ ផ្សព្វផ្សាយនូវរាល់គោលការណ៍ណែនាំ និងគោលនយោបាយរបស់បក្ស រដ្ឋ ដែលទាក់ទិនខាងការជំរុញសិក្សា កសាងសង្គមសិក្សា ដល់កម្មាភិបាល សមាជិក សម្ព័ន្ធយុវជនក្នុងអង្គការសមាជិកនីមួយៗ។

ខ្លឹមសារអនុវត្តត្រូវបានដាក់បញ្ចូលទៅក្នុងកម្មវិធីសកម្មភាពរបស់រណសិរ្សមាតុភូមិ និងចលនា “ប្រជាជនទាំងមូលសាមគ្គីកសាងជនបទថ្មី ទីក្រុងស៊ីវិល័យ”, “សាមគ្គីច្នៃប្រតិដ្ឋ លើកកម្ពស់គុណភាព ប្រសិទ្ធភាព សមាហរណកម្មអន្តរជាតិ”។ល។ ជាមួយនឹងសកម្មភាពជាក់ស្តែងជាច្រើន សមស្របនឹងលក្ខខណៈរបស់ភូមិភាគ និងអង្គភាពនីមួយៗផងដែរ។

លោក Trịnh Minh Thành  ប្រធានសមាគមជំរុញការសិក្សាខេត្ត បានឱ្យដឹងថា៖ ដើម្បីរួមចំណែកអនុវត្តមានប្រសិទ្ធភាពនូវការងារជំរុញការសិក្សា បណ្ដាអង្គភាពសមាជិកនៃរណសិរ្សមាតុភូមិសុទ្ធតែបានបង្កើតអង្គការជំរុញការសិក្សានៅអង្គភាព កម្មាភិបាល សម្ព័ន្ធយុវជន សមាជិក ខិតខំប្រឹងប្រែង ក្លាយជាអង្គភាពសិក្សា ពលរដ្ឋសិក្សា និងគ្រួសារសិក្សា ដើម្បីធ្វើជាស្នូលក្នុងការកសាងបណ្ដាទម្រង់សិក្សាក្នុងសហគមន៍ប្រជាជន។

នៅលើមូលដ្ឋាននៃឯកសារចង្អុលការណែនាំ និងបំផុសចលនារបស់រណសិរ្សមាតុភូមិ បណ្ដាអង្គការសមាជិកតែងតែពង្រីកតួនាទី និងទទួលខុសត្រូវក្នុងការរក្សា និងលើកកម្ពស់គុណភាពការងារជំរុញការសិក្សា។ មានវិធានការសមស្រប បង្កលក្ខណៈងាយស្រួល លើកទឹកចិត្តការសិក្សាពេញមួយជីវិតរបស់សមាជិក សម្ព័ន្ធយុវជនក្នុងអង្គការចាត់តាំង។ល។

បណ្តាមូលដ្ឋានសហការជាមួយសប្បុរសជន ជូនអំណោយ ផ្តល់អាហារូបករណ៍ដល់សិស្សក្រីក្រដែលសង្វាតសិក្សារៀនសូត្រ ។

អាស្រ័យការរួមដំណើរការរបស់រណសិរ្សមាតុភូមិ ការងារចលនាធនធានសង្គមត្រូវបានពង្រីក និងធ្វើឱ្យសម្បូរបែបនូវរូបភាពនៃការបរិច្ចាគ ។ ដំណាក់កាល ២០២១-២០២៥ សមាគមជំរុញការសិក្សាខេត្ត Cà Mau (ចាស់) ចលនាបានប្រាក់សុទ្ធនិងសម្ភារៈមានតម្លៃជាង ១៤២,៦ ពាន់លានដុង ។ សមាគមជំរុញការសិក្សាខេត្ត Bạc Liêu (ចាស់) ចលនាបានមូលនិធិជំរុញការសិក្សា Võ Văn Kiệt មានជាង ៤៥ ពាន់លានដុង ។ ប្រភពចលនាសរុបសម្រេចបានប្រមាណ ១៨៧,៦ ពាន់លានដុង (ជាមធ្យមជាង ២៣ ពាន់ដុង/ក្នុងប្រជាជនម្នាក់) ។

លោក Trịnh Minh Thành ចែករំលែកថា៖ “ពីប្រភពចលនានេះ សមាគមបានជូនអាហារូបករណ៍ជាង ១.១៦០.០០០ ចំណែក អំណោយ កង់ សំពៀត សៀវភៅសរសេរសម្រាប់សិស្សក្រីក្រដែលសង្វាតរៀនសូត្រ។ ជាក់ស្តែងដូចជាក្នុងឆ្នាំ ២០២៥ រណសិរ្សមាតុភូមិ និងសមាគមជំរុញការសិក្សាខេត្ត រួមជាមួយមន្ទីរអប់រំនិងបណ្តុះបណ្តាល បានសហការរៀបចំកម្មវិធីទទួលជំនួយ ជូនកង់ ៣៥០ គ្រឿង កាតរៀនភាសាអង់គ្លេស ២០០ សន្លឹក សៀវភៅសរសេរ ៣៥ ពាន់ក្បាល អាហារូបករណ៍ ៩០៥ ចំណែក ដល់សិស្សដែលមានកាលៈទេសៈលំបាក ឈានចូលឆ្នាំសិក្សា ២០២៥-២០២៦ ជួយប្អូនៗស្ងប់ចិត្តទៅសាលា” ។

សកម្មភាពដ៏មានអត្ថន័យទាំងនេះបានរួមចំណែកជំរុញចលនាជំរុញការសិក្សា លើកកម្ពស់កម្រិតវប្បធម៌ប្រជាជន និងអភិវឌ្ឍធនធានមនុស្សនៅលើភូមិសាស្ត្រខេត្ត ។

រណសិរ្សមាតុភូមិមូលដ្ឋាន តែងយកចិត្តទុកដាក់យ៉ាងខ្លាំងចំពោះការអប់រំ ថែទាំ បង្កលក្ខណៈងាយស្រួលឱ្យសិស្សបានទៅសាលាគ្រប់ៗគ្នា។

មកដល់ឆ្នាំ ២០២៥ Cà Mau មាន ៧៣,៨២% “គ្រួសារសិក្សា” ព្រមទាំង ៧០,៩១% “ត្រកូលសិក្សា” និង ៩៩,១៦% ភូមិ អនុសង្កាត់បានទទួលស្គាល់ជា “សហគមន៍សិក្សា”; ពិសេស ឆ្នាំ ២០២៣ ខេត្តទទួលបាន ១ ពានរង្វាន់ បញ្ញាជន Việt Nam។ លទ្ធផលដែលសម្រេចបានក្នុងពេលកន្លងមកបានអះអាងនូវស្មារតីសាមគ្គី ក៏ដូចជាប្រសិទ្ធភាពនៃការសហការរវាងរណសិរ្សមាតុភូមិ និងសមាគមជំរុញការសិក្សាខេត្ត ។

ឆ្ពោះទៅគោលដៅ “មិនទុកឱ្យសិស្សណាម្នាក់ត្រូវឈប់រៀនព្រោះជួបបញ្ហាលំបាកក្នុងសង្គមគ្រួសារ” ក្នុងពេលខាងមុខ សមាគមជំរុញការសិក្សាខេត្តនឹងបន្តពង្រីកស្មារតី “សាមគ្គី - ច្នៃប្រតិដ្ឋ - អភិវឌ្ឍន៍ - មេត្រីភាព” ខិតខំកសាង Cà Mau ក្លាយជាខេត្តមួយក្នុងចំណោមខេត្តដែលមានការសិក្សាឆ្នើមទូទាំងតំបន់វាលទំនាបទន្លេគឺវឡុង ដើម្បីអនាគតកូនចៅ និងដើម្បីសង្គមសិក្សាអស់មួយជីវិត៕

Quỳnh Anh