ទម្រង់ "៣ ក្នុង ១" កសាងកសិកម្មបៃតង

ផ្តើមពីការផលិតតែស្រូវមួយមុខ ឥឡូវនេះកសិករឃុំ Hồng Dân ក៏បានក្លាហានក្នុងកាផ្លាស់ប្តូរវិធីសាស្ត្របង្កបង្កើនផល អនុវត្តជោគជ័យនូវទម្រង់ ចិញ្ចឹមបង្គា- ស្រូវ និងដាំដំណាំរួមផ្សំនៅតាមភ្លឺ។ ទម្រង់ “៣ ក្នុង ១” នេះ មិនត្រឹមតែនាំមកនូវប្រសិទ្ធភាពសេដ្ឋកិច្ចខ្ពស់ ជួយកសិករឈានឡើងធូរធារប៉ុណ្ណោះទេ ថែមទាំងឆ្ពោះទៅកសាងខឿនកសិកម្មបៃតង និងចីរភាពទៀតផង។

មកដល់ពេលនេះ ទូទាំងឃុំ Hồng Dân មានប្រជាជនជាង ១៣០ គ្រួសារ ដែលបានទាញយកភោគផលពីភ្លឺស្រះបង្គាដើម្បីដាំដំណាំរួមផ្សំ។

ទម្រង់បង្វិលរដូវរួមផ្សំរវាង បង្គា-ស្រូវ-ដំណាំ បានផ្សព្វផ្សាយដោយផ្តោតលើសក្តានុពលធម្មជាតិស្តីពីប្រភពទឹក ដីធ្លី និងបទពិសោធន៍ក្នុងការបង្កបង្កើនផលយូរឆ្នាំរបស់កសិករ Hồng Dân ។

តាមរយៈនោះ នៅរដូវប្រាំង បងប្អូនប្រមូលផ្តុំចិញ្ចឹមបង្គានាគឬបង្គាជើងស។ ដល់រដូវវស្សា ប្តូរធ្វើស្រែ ១ រដូវ។ ការបង្វិលរដូវ បង្គា-ស្រូវនេះ បានចាត់ទុកជាវិធីសាស្ត្រផលិតកម្មប្រកបដោយចីរភាព ជួយកែលម្អដី បំប៉នសារធាតុសរីរាង្គ តុល្យភាពអាហារូបត្ថម្ភ សម្លាប់បំបាត់មេរោគ និងទាញយកជាអតិបរមានូវប្រភពធនធានធម្មជាតិ។

ឆ្លាស់គ្នានឹង ២ ទម្រង់ដ៏ចម្បងនេះ ភ្លឺជុំវិញស្រះបង្គា និងស្រែ ថែមទាំងត្រូវបានកសិករទាញយកភោគផលដើម្បីដាំបន្លែបង្ការ ជាពិសេសគឺល្ពៅ - ជាប្រភេទដំណាំងាយដាំ សមស្របនឹងលក្ខណៈដីធ្លីតំបន់បង្គា-ស្រូវ នាំមកតម្លៃសេដ្ឋកិច្ចខ្ពស់។

គ្រួសារលោក Danh Trung នៅភូមិ Bà Ai II ជាគ្រួសារមួយក្នុងចំណោមគ្រួសារដែលអនុវត្តមានប្រសិទ្ធភាពនូវទម្រង់ “៣ ក្នុង ១” ។ លោក Trung បានឱ្យដឹងថា ពីមុនគ្រួសារលោកគ្រាន់តែធ្វើស្រែ ទើបប្រាក់ចំណូលមិននឹងនរ ទើបជីវភាពមានការជួបលំបាកខ្លាំង។​ តាំងពីបានអនុវត្តណែនាំផ្លាស់ប្តូរទៅជាទម្រង់ បង្គា-ស្រូវ និងទាញយកភោគផលពីដីភ្លឺដើម្បីដាំបន្ថែមល្ពៅ ប្រាក់ចំណូលកើនឡើងពី ២-៣ ដងធៀបនឹងមុននេះ។ ដោយផ្ទៃដីផលិតប្រហែល ៣ ហិកតា គ្រាន់តែរដូវដំណាំរួមផ្សំរៀងរាល់ឆ្នាំ បន្ទាប់ពីទូទាត់ប្រាក់ចំណាយរួចរាល់ គ្រួសារគាត់ទទួលបានប្រាក់ចំណេញជិត ៥០ លានដុង។

លោក Danh Trung (ខាងស្តាំ) ទទួលបានប្រាក់ចំណេញជិត ៥០ លានដុងក្នុងមួយឆ្នាំ ពីរដូវដាំដំណាំរួមផ្សំ។

លោក ទ្រុង បានបង្ហើបពីគន្លឹះគ្រប់គ្រងប្រាក់ចំណាយយ៉ាងឆ្លាតវៃរបស់ខ្លួនថា៖ “ដាំល្ពៅមិនសូវចំណាយកម្លាំងថែទាំ ហើយអាចរកបានប្រាក់រាប់សិបលានដុងក្នុងមួយរដូវទៀតផង។ ប្រាក់ដែលលក់បានពីល្ពៅ ខ្ញុំយកទៅទិញជីសម្រាប់បាចឱ្យស្រូវ ចាត់ទុកដូចជាធ្វើស្រែមិនចាំបាច់ចំណាយប្រាក់ទិញជី។ ឃើញទម្រង់នេះនាំមកប្រសិទ្ធភាព បងប្អូននៅភូមិភាគជាច្រើនក៏ធ្វើតាម ព្រមទាំងទទួលបានប្រាក់ចំណូលសមគួរផងដែរ។ អាស្រ័យហេតុនេះ ជីវភាពបានកែលម្អយ៉ាងច្បាស់ក្រឡែត គ្រួសារជាច្រើនថែមទាំងសាងសង់បានផ្ទះដ៏ធំទូលាយស្អាតទៀតផង”។

ភាពស្វាហាប់ និងការច្នៃប្រតិដ្ឋរបស់កសិករ រួមជាមួយការជួយឧបត្ថម្ភយ៉ាងសកម្មរបស់រដ្ឋអំណាចភូមិភាគ កំពុងអះអាងជាបណ្តើរៗថា ទម្រង់ “៣ ក្នុង ១” គឺជាទិសដៅយ៉ាងសមស្របសម្រាប់ក្នុងដំណើរការរៀបចំរចនាសម្ព័ន្ធខាងវិស័យកសិកម្មឡើងវិញរបស់ឃុំ Hồng Dân ។

លោក Danh Thanh Ỷ ប្រធានសមាគមកសិករឃុំ បានឱ្យដឹងថា៖ “យោងតាមស្ថិតិ មកទល់ពេលនេះ ទូទាំងឃុំមានជាង ១៣០ គ្រួសារបានទាញយកផលពីភ្លឺស្រះបង្គាដើម្បីដាំដំណាំរួមផ្សំ។ ទម្រង់នេះបាននាំមកនូវប្រាក់ចំណូលធូរធារ រួមចំណែកកែលម្អជីវភាពជូនបងប្អូនប្រជាកសិករ។ ហេតុនោះ ពេលខាងមុខ សមាគមនឹងបន្តជំរុញការផ្សព្វផ្សាយ ពង្រីកទម្រង់ ទន្ទឹមនឹងនោះ សហការរៀបចំថ្នាក់ហ្វឹកហ្វឺន ដើម្បីណែនាំបន្ថែមបច្ចេកទេសជូនបងប្អូនទៀតផង”។

ទម្រង់ “៣ ក្នុង ១” បង្គា-ស្រូវ-ដំណាំ ជួយកសិករជាច្រើននៅឃុំ Hồng Dân  បានចាកផុតពីភាពក្រីក្រស្ថេរភាព។

សេចក្តីសម្រេចចិត្តមហាសន្និបាតអ្នកតំណាងបក្ខភាគឃុំ Hồng Dân លើកទី ១ អាណត្តិ ២០២៥-២០៣០ កំណត់គោលដៅជំរុញបណ្តាទម្រង់ចាត់តាំងផលិតកម្ម អាជីវកម្ម ដើម្បីអភិវឌ្ឍសេដ្ឋកិច្ច-សង្គមឆាប់រហ័សនិងចីរភាព ខិតខំកសាងឃុំ Hồng Dân ក្លាយជាមូលដ្ឋានមួយក្នុងចំណោមមូលដ្ឋានដែលមានសក្តានុពលអភិវឌ្ឍន៍សេដ្ឋកិច្ចកសិកម្មឈានមុខរបស់ខេត្ត។ ក្នុងដំណើរការធ្វើឱ្យជាក់ស្តែងនូវគោលដៅនោះ ទម្រង់ "៣ ក្នុង ១" បាននិងកំពុងរួមចំណែកបង្កើតមូលដ្ឋានគ្រឹះដ៏រឹងមាំ ដើម្បី Hồng Dân  ឆ្ពោះទៅកសាងខឿនកសិកម្មបៃតង និងចីរភាព៕

Thanh Hải  - Hoàng Đăng