Truyền hình
ពេលកន្លងមក សមាគមសហព័ន្ធនារីគ្រប់លំដាប់ថ្នាក់ទូទាំងខេត្ត Cà Mau បានជម្រុញការឃោសនាផ្សព្វផ្សាយអំពីការបោះឆ្នោត ដោយផ្តោតលើការលើកកម្ពស់ចំណេះដឹង និងទទួលខុសត្រូវជូនសមាជិកាទាំងឡាយគ្រប់រូប ជាពិសេសនារីជនជាតិភាគតិច។ ខ្លឹមសារជាក់ស្តែង រូបភាពបត់បែន និងសមស្របតាមតំបន់ភូមិភាគនីមួយៗ បានជួយឱ្យសមាជិកាយល់ច្បាស់អំពីសិទ្ធិ និងកាតព្វកិច្ចជាប្រជាពលរដ្ឋ នៅពេលចូលរួមបោះឆ្នោតជ្រើសរើសសមាជិករដ្ឋសភា និងសមាជិកក្រុមប្រឹក្សាប្រជាជនគ្រប់លំដាប់ថ្នាក់។
សមាគមសហព័ន្ធនារីឃុំ Ninh Thạnh Lợi ចែកសៀវភៅណែនាំនីតិវិធីបោះឆ្នោតជូនសមាជិកា។
នៅឃុំ Ninh Thành Lợi ជាភូមិភាគដែលមានបងប្អូនជនជាតិភាគតិចរស់នៅច្រើនកុះករសមាគមបានម្ចាស់ការសហការជាមួយគណៈកម្មាធិការបក្ស រដ្ឋអំណាច គណៈកម្មាធិការរណសិរ្សមាតុភូមិ និងអង្គការមហាជននានា ដើម្បីរៀបចំការឃោសនាផ្សព្វផ្សាយតាមរយៈកិច្ចប្រជុំសាខាសមាគម ប្រជុំជន ការបញ្ចូលក្នុងកម្មវិធីផ្សព្វផ្សាយផ្សេងៗ និងការចែកឯកសារ ខិតប័ណ្ណឃោសនាជាដើម។
បងស្រី Lê Lý Kha ប្រធានសមាគមសហព័ន្ធនារីឃុំ Ninh Thạnh Lợi បានឱ្យដឹងថា៖ “យើងខ្ញុំយកចិត្តទុកដាក់ជួយឱ្យសមាជិកាទាំងឡាយយល់ច្បាស់អំពីអត្ថន័យ និងសារៈសំខាន់នៃការបោះឆ្នោត ដើម្បីឱ្យពួកគេចូលរួមដោយស្ម័គ្រចិត្ត។ ទន្ទឹមនឹងនោះ ចលនាសមាជិកាគ្រប់រូបឱ្យក្លាយជាអ្នកឃោសនាម្នាក់ក្នុងគ្រួសារ រួមចំណែកលើកកម្ពស់អត្រាអ្នកទៅបោះឆ្នោត”។
បងស្រី Danh Thị Việt នៅភូមិ Ninh Thạnh Đông ឃុំ Ninh Thạnh Lợi បានចែករំលែកថា៖ “តាមរយៈការចូលរួមវគ្គបណ្តុះបណ្តាល និងការប្រជុំសមាគម ខ្ញុំយល់ច្បាស់ជាងមុនអំពីសិទ្ធិបោះឆ្នោតរបស់ខ្លួន និងតួនាទីរបស់បងប្អូននារីគ្រប់រូប។ នៅថ្ងៃបោះឆ្នោត ខ្ញុំនឹងទៅបោះឆ្នោតដោយផ្ទាល់ឱ្យបានទាន់ពេលវេលា។ ខ្ញុំក៏សង្ឃឹមដែរថា អាណត្តិថ្មីនេះ នឹងមានសមាជិកាសរដ្ឋភាជានារីច្រើនរូបបានជាប់ឆ្នោត”។
ចំណុចលេចធ្លោក្នុងការងារឃោសនាផ្សព្វផ្សាយ គឺការលើកកម្ពស់តួនាទីរបស់កម្មាភិបាលសាខាសមាគមដែលជាជនជាតិភាគតិច។ អ្នកស្រី Trần thị La ប្រធានសាខាសមាគមនារីភូមិ Ninh Thạnh Tây ឃុំ Ninh Thạnh Lợi បានឱ្យដឹង៖ សាខាសមាគមមានសមាជិកា ២៦៤ នាក់ ក្នុងនោះមាន ១៤៦ នាក់ជាជនរួមជាតិ Khmer។ ដោយសារយល់ដឹងច្បាស់អំពីទំនៀមទម្លាប់ និងភាសារបស់ភូមិភាគ ក្រៅពីការប្រជុំតាមកាលកំណត់ អ្នកស្រីបានចុះទៅដល់តាមគ្រួសារនីមួយៗដើម្បីឃោសនាផ្សព្វផ្សាយ ណែនាំនីតិវិធីក្នុងការបោះឆ្នោត និងរំលឹកសមាជិកាឱ្យមានការប្រុងប្រយ័ត្នចំពោះព័ត៌មានមិនពិតលើបណ្តាញសង្គម។ អាស្រ័យហេតុនេះ សមាជិកាជាច្រើនបានម្ចាស់ការស្វែងយល់អំពីបេក្ខជន ក្តាប់ច្បាស់នីតិវិធីបោះឆ្នោត និងត្រៀមលក្ខណៈចូលរួមថ្ងៃបោះឆ្នោត ១៥ ខែមីនាខាងមុខនេះ។
សមាជិកានារីពិនិត្យមើលបញ្ជីឈ្មោះអ្នកបោះឆ្នោត ដើម្បីត្រៀមចូលរួមថ្ងៃបោះឆ្នោតឱ្យបានត្រឹមត្រូវតាមបទបញ្ញត្តិ។
សម្រាប់ថ្នាក់ខេត្តវិញ ការងារបណ្តុះបណ្តាល និងបំប៉នត្រូវបានយកចិត្តទុកដាក់ជាពិសេស។ លោកស្រី Tô Thị Mỹ Thuận អនុប្រធានសមាគមសហព័ន្ធនារីខេត្ត Cà Mau បានឱ្យដឹងថា៖ ដើម្បីបម្រើឱ្យការបោះឆ្នោតជ្រើសរើសសមាជិករដ្ឋសភានីតិកាលទី XVI និងសមាជិកក្រុមប្រឹក្សាប្រជាជនគ្រប់លំដាប់ថ្នាក់ អាណត្តិ ២០២៦-២០៣១ បានល្អប្រសើរ ទន្ទឹមនឹងការជម្រុញការឃោសនាផ្សព្វផ្សាយនៅភូមិភាគ ចាប់ពីថ្ងៃទី ២៨ ខែកុម្ភៈ ដល់ថ្ងៃទី ៨ ខែមីនា សមាគមខេត្តបានរៀបចំវគ្គបណ្តុះបណ្តាលចំនួន ១៦ ថ្នាក់ អំពីការងារបោះឆ្នោតជូនកម្មាភិបាល និងសមាជិកា ដោយផ្តោតសំខាន់លើនារីនៅតំបន់ជនជាតិភាគតិច។
ការលើកកម្ពស់ចំណេះដឹងជូនសមាជិកានារីស្តីពីការបោះឆ្នោត មិនត្រឹមតែជួយអនុវត្តបានត្រឹមត្រូវនូវសិទ្ធិ និងកាតព្វកិច្ចជាប្រជាពលរដ្ឋប៉ុណ្ណោះទេ ថែមទាំងរួមចំណែកលើកកម្ពស់តួនាទីជាម្ចាស់របស់នារី ក្នុងជីវភាពនយោបាយនៅភូមិភាគទៀតផង៕
Cẩm Nhi
Xem thêm bình luận