ពីវាលស្រែប្រពៃណី ដល់វាលស្រែឌីជីថល

ធ្លាប់តែស៊ាំនឹងចង្វាក់ផលិត “មើលមេឃ មើលដី មើលពពក” ប៉ុន្តែសព្វថ្ងៃ កសិករបាននិងកំពុងម្ចាស់ការលើការងារ ស្រែចម្ការ និងស្រះចិញ្ចឹមសត្វ ដោយផ្អែកលើទិន្នន័យ ឧបករណ៍វៃឆ្លាត និងបទដ្ឋានបច្ចេកទេសវិទ្យាសាស្ត្រ។ “វាលស្រែឌីជីថល” លែងជាទស្សនទានដ៏ឆ្ងាយទៀតហើយ ប៉ុន្តែបានបង្ហាញវត្តមានជាក់ស្តែងតាមរយៈប្រព័ន្ធស្រោចស្រពស្វ័យប្រវត្តិ ឧបករណ៍បញ្ជាពីចម្ងាយ និងចង្វាក់ផលិតបិទជិត។

ត្រឹមតែប្រតិបត្តិការបញ្ជាតែមួយប៉ុណ្ណោះ វាលបន្លែត្រចៀកចាំមទាំងមូលនៅសហករណ៍ Đông Bình បានស្រោចស្រពយ៉ាងស៊ីចង្វាក់គ្នា និងស្វ័យប្រវត្តិ។

ផ្លាស់ប្តូរការផលិតដោយបច្ចេកវិទ្យា

នៅភូមិបេ Bến Gỗ ឃុំ Hồ Thị Kỷ ទម្រង់ចំការទំពាំងបាយជូររបស់គ្រួសារបងស្រី Trần Phương Thảo ជាសក្ខីភាពយ៉ាងច្បាស់សម្រាប់ដំណើរការ “ធ្វើឌីជីថលកម្ម” លើដីស្រែចម្ការ។ ឱកាសបុណ្យថ្ងៃទី ៣០ មេសា និងថ្ងៃទី ១ ឧសភា ឆ្នាំនេះ ចំការទំពាំងបាយជូរនេះបានក្លាយជាគោលដៅទេសចរណ៍ពិសោធន៍ដ៏ទាក់ទាញ។

លើផ្ទៃដីជិត ២ ហិកតា មានដើមទំពាំងបាយជូរជាង ១.៥០០ ដើម រួមជាមួយដើមប៉េងប៉ោះ ឪឡឹក និងម្ទេសប្លោកជាង ៣ ពាន់ដើម។ល។ បានដាំដុះក្នុងប្រព័ន្ធផ្ទះសំណាញ់ទំនើប។ ទឹក និងសារធាតុចិញ្ចឹមត្រូវបាន “រៀបចំកម្មវិធី” យ៉ាងត្រឹមត្រូវទៅតាមដំណាក់កាលលូតលាស់នីមួយៗរបស់រុក្ខជាតិ តាមប្រព័ន្ធស្រោចស្រពតំណក់ទឹកស្វ័យប្រវត្តិ។ គ្រាន់តែប្រើប្រាស់ឧបករណ៍បញ្ជាតែមួយប៉ុណ្ណោះ ចំការទាំងមូលត្រូវបានថែទាំយ៉ាងស៊ីចង្វាក់គ្នា សន្សំសំចៃកម្លាំងពលកម្ម ប៉ុន្តែទទួលបានប្រសិទ្ធភាពខ្ពស់។ បងស្រី Thảo បានចែករំលែកថា៖ “នៅពេលយើងក្តាប់ជាប់បច្ចេកទេស និងបច្ចេកវិទ្យា ការផលិតនឹងមានភាពម្ចាស់ការខ្លាំងណាស់។ គំរូនេះមិនត្រឹមតែឈប់ត្រឹមការផលិតប៉ុណ្ណោះទេ ប៉ុន្តែថែមទាំងផ្សារភ្ជាប់ជាមួយទេសចរណ៍ពិសោធន៍ បង្កើនតម្លៃផលិតផលទៀតផង”។

នៅឃុំ Vĩnh Thanh ផ្ទៃដីស្រូវគុណភាពខ្ពស់ជាង ១.១៥០ ហិកតា ត្រូវបានរៀបចំតាមទម្រង់ប្រមូលផ្តុំ ដោយឈានទៅអនុវត្តបច្ចេកវិទ្យាឌីជីថលក្នុងការគ្រប់គ្រងផលិតកម្ម ការស្វែងរកប្រភពដើម និងការផ្សារភ្ជាប់ការប្រើប្រាស់។

ក្នុងរូបភាពរួមនេះ សហករណ៍ Đông Bình ភូមិ Vĩnh Đông គឺជាចំណុចលេចធ្លោគំរូ។ ដោយសមាជិកប្រហែល ១៨០ នាក់ និងផ្ទៃដីផលិតកម្មរួមគ្នាជាង ១៥០ ហិកតា សហករណ៍បានបញ្ចូលបច្ចេកវិទ្យាទៅក្នុងដំណាក់កាលបង្កបង្កើនផលជាច្រើន។ យន្តហោះគ្មានមនុស្សបើក (Drone) បានប្រើប្រាស់ក្នុងការព្រួសស្រូវ និងបាញ់ថ្នាំ ដែលជួយកាត់បន្ថយចំណាយ និងកម្រិតផលប៉ះពាល់ដល់បរិស្ថាន។ ជាពិសេស ប្រព័ន្ធស្រោចស្រពស្វ័យប្រវត្តិ បានដាក់ឱ្យដំណើរការលើផ្ទៃដីដាំស្លឹកត្រចៀកចាំចំនួន ៦៥ ហិកតា។ លោក Ngô Văn Lào នាយកសហករណ៍បានឱ្យដឹងថា៖ “កសិករសព្វថ្ងៃលែងមានភាពនឿយហត់ នៅលើវាលស្រែទៀតហើយ ប៉ុន្តែអាចបញ្ជាពីចម្ងាយបាន គ្រាន់តែចុចប៊ូតុងមួយ ក៏អាចស្រោចស្រពវាលបន្លែត្រចៀកចាំទាំងមូលបានដែរ”។

កសិករជា “ម្ចាស់កម្មវត្ថុឌីជីថល”

បងស្រី Trần Phương Thảo ពិនិត្យការលូតលាស់របស់ដំណាំនៅចំការទំពាំងបាយជូរ Nguyễn Thơ ភូមិ Bến Gỗ ឃុំ Hồ Thị Kỷ។

យោងតាមលោកស្រី Nguyễn Thị Kiều Khuyên នាយិការងមជ្ឈមណ្ឌលជំរុញកសិកម្មខេត្ត បានឱ្យដឹងថា ការរៀបចំសប្តាហ៍វិទ្យាសាស្ត្រ បច្ចេកវិទ្យា-វប្បធម៌ ទេសចរណ៍ និងការប្រឡងប្រជែងអង្ករឆ្ងាញ់តំបន់វាលទំនាបទន្លេមេគង្គឆ្នាំ ២០២៦ ជាលើកដំបូង មិនត្រឹមតែជាឱកាសផ្សព្វផ្សាយកសិផលប៉ុណ្ណោះទេ ថែមទាំងបើកផ្លូវថ្មីសម្រាប់វិស័យកសិកម្មខេត្ត Cà Mau ផងដែរ។ ចាប់ពីបទដ្ឋានបង្កបង្កើនផលវៃឆ្លាត រហូតដល់ដំណោះស្រាយបំប្លែងឌីជីថលគ្រប់ជ្រុងជ្រោយ វិស័យកសិកម្មកំពុងឈានទៅកំណត់អនាគតលើមូលដ្ឋានបច្ចេកវិទ្យា។ ស្នូលនៃបំប្លែងឌីជីថល មិនមែនស្ថិតនៅលើគ្រឿងចក្រនោះទេ ប៉ុន្តែស្ថិតនៅលើការផ្លាស់ប្តូរការគិត៖ ចាប់ពីការផលិតតូចតាចទៅជាការចងក្រងគ្នា ពីពលកម្មដោយដៃទៅជាការប្រតិបត្តិដោយបច្ចេកវិទ្យា និងពីបទពិសោធន៍ទៅជាទិន្នន័យ។

នៅក្នុងចរន្តនៃសេដ្ឋកិច្ចឌីជីថល កសិករលែងនៅក្រៅវង់ទៀតហើយ ប៉ុន្តែពួកគេកំពុងម្ចាស់ការរៀនសូត្រ អនុវត្ត និងក្តាប់ជាប់បច្ចេកវិទ្យា បង្កើតឱ្យមានការផ្លាស់ប្តូរជាវិជ្ជមាន និងបង្កើនទ្រព្យសម្បត្តិដោយស្របច្បាប់ និងប្រកបដោយចីរភាពនៅលើទឹកដីកំណើតរបស់ខ្លួន៕

Kiều Nương