ប្តេជ្ញាចិត្តបំបាត់អស់គ្រួសារក្រជាជនរួមជាតិភាគតិច

ឃុំ Vĩnh Mỹ កំពុងឈានចូលដំណាក់កាលអភិវឌ្ឍន៍ថ្មី ដោយការប្តេជ្ញាចិត្តលុបបំបាត់ឱ្យអស់គ្រួសារក្រ ក្នុងជនរួមជាតិភាគតិច។ មិនបង្អង់ត្រឹមពាក្យស្លោកប៉ុណ្ណោះទេ គោលដៅនេះកំពុងក្លាយជាការពិតជាសន្សឹមៗតាមរយៈការផ្លាស់ប្តូរជាក់ស្តែងនៅតាមគ្រួសារ និងភូមិស្រុកនីមួយៗផងដែរ។

លោក Trương Huynh រួមជាមួយអាជ្ញាធរមូលដ្ឋានចុះពិនិត្យវាលស្រែរដូវទី ៣ - ទម្រង់ដែលជួយគ្រួសារគាត់មានលក្ខណៈឈានឡើងធូរធារ។

ទូទាំងឃុំនាពេលបច្ចុប្បន្នមាន ៥៦៣ គ្រួសារជនរួមជាតិភាគតិច ប្រមូលផ្ដុំនៅតាម បណ្តាភូមិ៖ ភូមិលេខ ១៤ ភូមិ Thanh Sơn និង Ninh Lợi A។ បើកាលពីមុន ភូមិភាគនៅមានគ្រួសារក្រជិត ១០ គ្រួសារ មកទល់ពេលនេះ ថយចុះនៅសល់ត្រឹមតែ ១ គ្រួសារក្រ និង ៦ គ្រួសារប្រកៀកបន្ទាត់ក្រប៉ុណ្ណោះ។ លទ្ធផលដ៏គួរឱ្យចាប់អារម្មណ៍នេះ មិនមែនកើតឡើងដោយចៃដន្យនោះទេ ប៉ុន្តែវាគឺជាផ្លែផ្កានៃដំណើរផ្លាស់ប្តូរនៃការផលិត ផ្លាស់ប្តូរផ្នត់គំនិត និងទាញយកផលប្រយោជន៍ដែលមានប្រសិទ្ធភាពពីអាទិភាពរបស់ភូមិភាគ។

ចំណុចគន្លឹះដែលបង្កើតបានជំហានផ្លាស់ប្តូររបស់ Vĩnh Mỹ គឺការម្ចាស់ការពង្រីកតំបន់ផលិតទឹកសាប ធានាប្រភពទឹកសាបពេញមួយឆ្នាំ។ ពេលលក្ខណៈបង្កបង្កើនផលបានកែលម្អ ប្រជាជនមានភាពក្លាហានបង្កើនរដូវកាលចាប់ពី ១ ទៅ ២ រដូវ រួចមានស្ថិរភាពនៅ ៣ រដូវស្រូវក្នុងមួយឆ្នាំ។ ផ្តើមពីការផលិតអារត់អារាយ  ពឹងផ្អែកលើអាកាសធាតុ បងប្អូនបានចេះអនុវត្តបច្ចេកទេសជឿនលឿន គណនារដូវកាល បង្កើនទិន្នផល និងតម្លៃផលិតផល។

រឿងរ៉ាវរបស់លោក Trương Huynh នៅភូមិ Thanh Sơn គឺជាសក្ខីភាពយ៉ាងជាក់ស្តែងចំពោះការផ្លាស់ប្តូរនេះ។ កាលពីមុន គ្រួសារគាត់ស្ថិតក្នុងចំណោមគ្រួសារជួបទុក្ខលំបាក ចំណូលមិនទៀងទាត់។ តែចាប់តាំងពីដីធ្វើភាវូបនីយកម្មទឹកសាប ធានាប្រភពទឹកទុំឆ្នាំ គាត់សម្រេចចិត្តវិនិយោគផលិតស្រូវ ៣ រដូវ។ ដោយការខិតខំរៀនសូត្រ អនុវត្តពូជថ្មី និងបច្ចេកទេសបង្កបង្កើនផល គ្រួសារគាត់មិនត្រឹមតែចាកផុតពីភាពក្រប៉ុណ្ណោះទេ ប៉ុន្តែថែមទាំងឈានឡើងក្លាយជាគ្រួសារមានចំណូលបង្គួរនៅក្នុងឃុំទៀតផង។

 “កាលពីមុនធ្វើស្រូវគ្រាន់តែល្មមហូប ឥឡូវនេះរៀងរាល់ឆ្នាំសុទ្ធតែមានសន្សំទុក។ សំខាន់គឺចេះរបៀបធ្វើ និងឧស្សាហព្យាយាមពលកម្ម” លោក Trương Huynh រីករាយនិយាយបែបនេះ។

មិនត្រឹមតែគ្រួសារលោក Trương Huynh ប៉ុណ្ណោះទេ គ្រួសារជាច្រើនទៀតក៏កំពុងកែលម្អជីវភាពជាបណ្តើរៗផងដែរ។ ដើម្បីទទួលបានលទ្ធផលនោះ ទន្ទឹមនឹងម្ចាស់ការពង្រីកតំបន់ផលិតទឹកសាប រដ្ឋអំណាចបានអនុវត្តព្រមៗគ្នានូវដំណោះស្រាយជាច្រើនដូចជា៖ ឧបត្ថម្ភផ្ទះនៅ មធ្យោបាយចិញ្ចឹមជីវិត បច្ចេកទេសផលិត។ល។

ផ្លូវជនបទដ៏ស្រស់ស្អាតនៅឃុំ Vĩnh Mỹ។

លោក Huỳnh Thanh Ngợi អនុប្រធានការិយាល័យវប្បធម៌ - សង្គម ឃុំ Vĩnh Mỹ បានឱ្យដឹងថា៖ “យើងខ្ញុំកំណត់ថា ចង់កាត់បន្ថយភាពក្រីក្រចីរភាព គឺត្រូវបង្កលក្ខណៈងាយស្រួលដើម្បីប្រជាជនឈានឡើងដោយខ្លួនឯង។ ការវិនិយោគធារាសាស្ត្រ ផ្លាស់ប្តូរផលិតកម្ម បន្សំជាមួយការឧបត្ថម្ភបច្ចេកទេស។ល។ បានជួយបងប្អូនពង្រីកប្រសិទ្ធភាពនូវចំណុចខ្លាំងផ្នែកកសិកម្ម”។

ដោយការយកចិត្តទុកដាក់ និងម្ចាស់ការ គោលនយោបាយសមស្របរបស់បក្ស រដ្ឋ និងរដ្ឋអំណាចភូមិភាគ ក្នុងដំណើរការលុបបំបាត់ឱ្យអស់គ្រួសារក្រនៅឃុំ Vĩnh Mỹ  ដែលគួរឱ្យស្ងើចសរសើរបំផុតនោះគឺការផ្លាស់ប្តូរផ្នត់គំនិតរបស់បងប្អូនប្រជាជន។ ពីចិត្តសាស្ត្ររង់ចាំ ពឹងផ្អែក បងប្អូនបានម្ចាស់ការរៀនសូត្រ គណនារកស៊ី ចេះសន្សំសំចៃ និងឆ្ពោះទៅរកជីវភាពនឹងនរយូរអង្វែង។ នេះគឺជាគ្រឹះដ៏រឹងមាំដើម្បី កាត់បន្ថយភាពក្រីក្រ មិនត្រឹមតែសម្រេចបានគោលដៅចំពោះមុខប៉ុណ្ណោះទេ ថែមទាំងរក្សាបានប្រសិទ្ធភាពប្រកបដោយចីរភាពទៀតផង។

ដោយសន្ទុះអភិវឌ្ឍន៍នាពេលបច្ចុប្បន្ន គោលដៅលុបបំបាត់ឱ្យអស់គ្រួសារក្រក្នុងជនរួមជាតិនៅ Vĩnh Mỹ កំពុងក្លាយជាការពិតជាបណ្តើរៗ។ លើវាលស្រែដ៏ខៀវស្រងាត់ ៣ រដូវក្នុងមួយឆ្នាំ មិនត្រឹមតែមានរដូវកាលប្រមូលផលមាសផ្លែផ្កាប៉ុណ្ណោះទេ ថែមទាំងជាក្តីជំនឿឆ្ពោះទៅអនាគតដ៏ភ្លឺស្វាងទៀតផង៕

Nguyễn Đào - Chí Thức