អាទិភាពលើប្រភពនៃការអភិវឌ្ឍន៍តំបន់ជនជាតិភាគតិច

ជាមួយគោលដៅលើកកម្ពស់ជីវភាពរស់នៅទាំងសម្ភារៈ ស្មារតី និងកាត់បន្ថយគម្លាតអភិវឌ្ឍន៍រវាងបណ្តាខេត្តក្រុង និងតំបន់ប្រជាជនរស់នៅ ខេត្តកាម៉ាវ បានកសាងកម្មវិធីអភិវឌ្ឍន៍សេដ្ឋកិច្ច - សង្គមតំបន់ជនរួមជាតិភាគតិចដំណាក់កាលឆ្នាំ ២០២៦-២០៣០ ជាប់ទាក់ទងនឹងការកាត់បន្ថយភាពក្រីក្រប្រកបដោយចីរភាព និងការកសាងជនបទថ្មី។ ក្នុងនោះ យកចិត្តទុកដាក់ជាអតិបរមាលើការវិនិយោគហេដ្ឋារចនាសម្ព័ន្ធចាំបាច់ ឧបត្ថម្ភជីវភាពរស់នៅ បណ្តុះបណ្តាលវិជ្ជាជីវៈ និងអភិរក្សអត្តសញ្ញាណវប្បធម៌ជនជាតិ។

 វិស័យអប់រំនៅតំបន់ជនរួមជាតិភាគតិចក៏ទទួលបានការយកចិត្តទុកដាក់វិនិយោគយ៉ាងល្អត្រឹមត្រូវផងដែរ។ (ក្នុងរូបថត៖ ម៉ោងសម្រាករបស់សិស្សានុសិស្សសាលាវិទ្យាល័យតឹនឡើយ ឃុំហូធីគី)។

ខេត្តកាម៉ាវ មានជនជាតិភាគតិចចំនួន ២៩ សាសន៍ មាន ៣៥.៦៧៩ គ្រួសារ ដោយមានប្រជាជនជាង ១៥៧.៤៧០ នាក់ ស្មើនឹង ៦,៥៦% នៃចំនួនប្រជាជនសរុបទូទាំងខេត្ត។ ក្នុងនោះ ជនរួមជាតិខ្មែរមានចំនួនច្រើនជាងគេគឺមានជាង ១២៦ ពាន់នាក់។ ក្នុងរយៈពេលកន្លងមក យោងតាមការយកចិត្តទុកដាក់វិនិយោគរបស់រដ្ឋ ហេដ្ឋារចនាសម្ព័ន្ធចរាចរណ៍ សាលារៀន មន្ទីរពេទ្យ និងអាគារវប្បធម៌នៅតាមតំបន់ជនរួមជាតិភាគតិចត្រូវបានកែលម្អជាបណ្តើរៗ។ ការងារអប់រំ ថែទាំសុខភាព បណ្តុះបណ្តាលវិជ្ជាជីវៈ និងការដោះស្រាយការងារធ្វើសម្រេចបានលទ្ធផលជាវិជ្ជមានច្រើនផងដែរ។

ទោះបីជាយ៉ាងណាក៏ដោយ ជីវភាពរស់នៅរបស់បងប្អូនជនរួមជាតិភាគតិចមួយផ្នែកនៅជួបប្រទះការលំបាកខ្លាំង។ ទូទាំងខេត្តបច្ចុប្បន្នមានគ្រួសារក្រីក្រ និងប្រកៀកបន្ទាត់ក្រជាជនជាតិភាគតិចចំនួន ១.៥៨០ គ្រួសារ ស្មើនឹង ៤,៨៦% នៃចំនួនគ្រួសារជនរួមជាតិភាគតិចសរុប។

ដំណាក់កាលឆ្នាំ ២០២៦-២០៣០ ខេត្តគ្រោងនឹងប្រមូលផ្តុំធនធានវិនិយោគលើគម្រោងហេដ្ឋារចនាសម្ព័ន្ធចាំបាច់ចំនួន ៣៩០ កន្លែងនៅតាមតំបន់ជនរួមជាតិភាគតិច។ កសាងគម្រោងទឹកស្អាតប្រើប្រាស់ក្នុងជីវភាពប្រមូលផ្តុំចំនួន ១០ កន្លែង ឧបត្ថម្ភទឹកស្អាតសម្រាប់ប្រើប្រាស់ក្នុងជីវភាពរាយប៉ាយដល់គ្រួសារប្រមាណជាង ៦៥៦ គ្រួសារ។ ឧបត្ថម្ភដីលំនៅឋានយ៉ាងតិចបំផុត ២៦៣ គ្រួសារ និងផ្ទះជូន ៥២៦ គ្រួសារផងដែរ។ ជួសជុល និងកែលម្អហេដ្ឋារចនាសម្ព័ន្ធជាង ៥៨៥ កន្លែង។

ទន្ទឹមនឹងនោះ ខេត្តក៏បានយកចិត្តទុកដាក់ឧបត្ថម្ភអភិវឌ្ឍផលិត ធ្វើពិពិធកម្មជីវភាពរស់នៅ លើកកម្ពស់ចំណូលជូនជនរួមជាតិភាគតិច។ គ្រោងនឹងមានទាំងអស់ ៣០០ ទម្រង់ គម្រោងអភិវឌ្ឍន៍ផលិតកម្ម ព្រមទាំង ៣៩ ទម្រង់ផ្តើមអាជីវកម្ម និងចាប់ផ្តើមដំណើរការធ្វើអាជីវកម្មផងដែរ។ ព្រមទាំងបង្កើនការងារបណ្តុះបណ្តាលវិជ្ជាជីវៈ ពិគ្រោះយោបល់ការងារធ្វើ បញ្ជូនពលករទៅធ្វើការនៅបរទេស តាមកិច្ចសន្យា ដើម្បីជួយឱ្យប្រជាពលរដ្ឋមានឱកាសការងារបន្ថែម និងមានចំណូលស្ថិរភាព។

 ហេដ្ឋារចនាសម្ព័ន្ធតំបន់ជនរួមជាតិភាគតិចកាន់តែមានការអភិវឌ្ឍន៍ជាលំដាប់ ឆ្លើយតបទៅនឹងតម្រូវការនៃជីវភាពរស់នៅរបស់បងប្អូនប្រជាជន និងការអភិវឌ្ឍផលិតកម្មផងដែរ។ (ក្នុងរូបថត៖ ដងផ្លូវជនបទនៅភូមិដឿងដាវ ឃុំហូធីគី)។

ក្រៅពីការអភិវឌ្ឍសេដ្ឋកិច្ច ខេត្តកាម៉ាវ ថែមទាំងយកចិត្តទុកដាក់លើកកម្ពស់គុណភាពខាងវិស័យអប់រំ សុខាភិបាល អនុវត្តសមភាពយេនឌ័រ ថែទាំសុខភាពមាតា និងទារក ការពារទប់ស្កាត់ការរៀបអាពាហ៍ពិពាហ៍មិនគ្រប់វ័យ ព្រមទាំងអភិរក្ស និងលើកតម្កើងតម្លៃវប្បធម៌ប្រពៃណីរបស់ជនរួមជាតិខ្មែរ និងបណ្តាជនជាតិដទៃទៀតផងដែរ។

លោកស្រី ង្វៀនធូទឺ ប្រធានមន្ទីរជនជាតិ និងសាសនា បានឱ្យដឹង៖ ការកំណត់យ៉ាងច្បាស់លើការដាក់ឱ្យដំណើរការកម្មវិធីអភិវឌ្ឍន៍សេដ្ឋកិច្ច - សង្គមតំបន់ជនរួមជាតិភាគតិចដំណាក់កាលឆ្នាំ ២០២៦-២០៣០ គឺត្រូវភ្ជាប់ជាមួយការវិនិយោគហេដ្ឋារចនាសម្ព័ន្ធជាមួយនឹងការគាំទ្រជីវភាពរស់នៅ លើកកម្ពស់គុណភាពធនធានមនុស្ស និងលើកកម្ពស់តួនាទីជាម្ចាស់ការរបស់ជនរួមជាតិភាគតិច។ ធនធានត្រូវតែផ្តល់អាទិភាពដល់ភូមិភាគដែលនៅជួបការលំបាក ធានាភាពបើកចំហ តម្លាភាព និងចំគោលដៅ។ ព្រមទាំងលើកទឹកចិត្តប្រជាពលរដ្ឋឱ្យម្ចាស់ការអភិវឌ្ឍផលិតកម្ម ខិតខំឈានឡើងដើម្បីចាកផុតពីភាពក្រីក្រប្រកបដោយចីរភាព។

ជាមួយនឹងទិសដៅវិនិយោគមានចំណុចស្នូល អភិវឌ្ឍន៍ជីវភាពរស់នៅប្រកបដោយចីរភាព និងដាស់តឿនស្មារតីម្ចាស់ការខ្លួនឯងរបស់ប្រជាពលរដ្ឋ កម្មវិធីដំណាក់កាលឆ្នាំ ២០២៦-២០៣០ ត្រូវបានរំពឹងទុកថានឹងបង្កើតឱ្យមានការប្រែប្រួលយ៉ាងច្បាស់លាស់លើមុខមាត់ជនបទ លើកកម្ពស់ជីវភាពរស់នៅរបស់ជនរួមជាតិខ្មែរ ពង្រឹងមហាសាមគ្គីទូទាំងជនជាតិ ព្រមទាំងជំរុញការអភិវឌ្ឍសេដ្ឋកិច្ច - សង្គមរបស់ខេត្តកាម៉ាវ៕

អត្ថបទ៖ គីមគឿង

រូបថត៖ យ័ញឌីប