ផ្លែផ្អែមលើតំបន់ដីប្រៃ

ផ្តើមពីដើមទំពាំងបាយជូរដំបូងដែលដុះលូតលាស់លើដីជូរប្រៃ បងស្រី Trần Phương Thảo បានព្យាយាមចារជាប្រវត្តិនៃដំណើរការធ្វើចម្ការដ៏គួរឱ្យស្ងើចសរសើរ នៅឃុំ Hồ Thị Kỷ ។ មិនត្រឹមតែនាំមកនូវប្រសិទ្ធភាពសេដ្ឋកិច្ចប៉ុណ្ណោះទេ សព្វថ្ងៃនេះ ចម្ការដ៏ខៀវស្រងាត់ របស់បងស្រី បានក្លាយជាគោលដៅទេសចរណ៍សម្រាកលំហែកាយ ដែលភ្ញៀវទេសចរអាចមកកម្សាន្ត និងបេះផ្លែឈើស្រស់ៗដោយផ្ទាល់ដៃ ក្នុងបរិយាកាសធម្មជាតិដ៏បរិសុទ្ធ។

ភ្ញៀវទេសចរមានភាពសប្បាយរីករាយ ក្នុងការទទួលបទពិសោធន៍បេះផ្លែឈើដោយផ្ទាល់នៅនឹងចម្ការ។

ទៅដល់ភូមិ Bến Gỗ ឱ្យតែរំលឹកដល់ចម្ការទំពាំងបាយជូរ Nguyễn Thơ អ្នកភូមិនៅទីនេះសុទ្ធតែស្គាល់ឈ្មោះយ៉ាងច្បាស់។ កាលពីឆ្នាំ ២០១៩ នៅពេលប្រាថ្នាចង់ដាំទំពាំងបាយជូរ ដែលជាប្រភេទដំណាំធ្លាប់តែល្បីល្បាញនៅតំបន់ដីខ្សាច់ខេត្ត Ninh Thuận បងស្រី Thảo ក៏មានការព្រួយបារម្ភមិនតិចដែរ ចំពោះលក្ខណៈដីជូរប្រៃនៅស្រុកភូមិរបស់ខ្លួន។ ប៉ុន្តែ ដោយមានការអត់ធ្មត់ និងខិតខំរៀនសូត្រ បងស្រី និងគ្រួសារបានស៊ាំនឹងពូជដំណាំជាបណ្តើរៗ ដោយចេះទាញយកប្រភពកាលីធម្មជាតិដែលមានស្រាប់ក្នុងដី ដើម្បីបង្កើនកម្រិតជាតិផ្អែមដល់ផ្លែឈើ។

ផ្តើមពីទំពាំងបាយជូរប៉ុន្មានដើមដំបូង មកដល់ពេលនេះ ចម្ការបានពង្រីកផ្ទៃដីជាង ១ ហិកតា ដោយទំពាំងបាយជូរជាង ១.០០០ ដើម រួមមាន ៦ ប្រភេទខុសៗគ្នា ដែលផ្តល់ផលឆ្លាស់គ្នាទុំឆ្នាំ។ មិនត្រឹមតែផលិតកសិកម្មប៉ុណ្ណោះទេ បងស្រី Thảo នៅទាំងហ៊ានអនុវត្តទម្រង់ទេសចរណ៍បៃតង បើកទ្វារទទួលភ្ញៀវមកទស្សនា ថតរូប និងបេះកសិផលដោយផ្ទាល់នៅនឹងចម្ការ។

បងស្រី Trần Phương Thảo ចែករំលែក៖ កាលដំបូងធ្វើក៏បារម្ភដែរ ប៉ុន្តែឃើញភ្ញៀវមកហើយត្រឡប់មកវិញលើកទី២ ទី៣ ធ្វើឱ្យខ្ញុំកាន់តែមានកម្លាំងចិត្តបន្ថែម។ មកដល់ពេលនេះ ក្តីស្រមៃធ្វើទេសចរណ៍បៃតងរបស់គ្រួសារសម្រេចបានប្រហែល ៧០% ហើយ។ ពេលខាងមុខ ខ្ញុំមានគម្រោងវិនិយោគប្រព័ន្ធស្រោចស្រពស្វ័យប្រវត្តិ ដាំបន្ថែមម្ទេសផ្អែម និងផ្ញៀវបារាំង (Pháp) ដើម្បីឱ្យចម្ការកាន់តែសម្បូរបែបថែមទៀត។

មិនឈប់ត្រឹមអ្វីដែលសម្រេចបាន ក្នុងឆ្នាំ ២០២៥ បងស្រីបានបន្តនាំយកដើមប៉េងប៉ោះឆឺរី ជាង ៩០០ ដើមពីទីក្រុង Đà Lạt មកដាំសាកល្បង។ បណ្តុំផ្លែប៉េងប៉ោះពណ៌ក្រហម លឿង និងបៃតងខ្ចី ដែលផ្លែជាកញ្ចុមយ៉ាងត្រចះត្រចង់ក្រោមពន្លឺថ្ងៃ បានក្លាយជាចំណុចទាក់ទាញថ្មីរបស់ចម្ការ។ ប៉េងប៉ោះផ្តល់ផលទុំឆ្នាំ មានរសជាតិផ្អែមឆ្ងាញ់ និងក្លិនក្រអូបស្រាល ដែលភ្ញៀវទេសចរជាច្រើនចូលចិត្ត។ មកទីនេះ ភ្ញៀវមិនត្រឹមតែបានទស្សនាប៉ុណ្ណោះទេ ប៉ុន្តែថែមទាំងបានកាត់ផ្លែ និងភ្លក់រសជាតិភ្លាមៗនៅនឹងកន្លែងទៀតផង។

ក្នុងឆ្នាំ ២០២៥ ចម្ការទំពាំងបាយជូរ ង្វៀនធើ ទទួលភ្ញៀវបានជាង ១.២០០ នាក់។ ចំណុចពិសេសគឺចម្ការមិនយកថ្លៃសំបុត្រចូលទស្សនាឡើយ ភ្ញៀវគ្រាន់តែបង់ប្រាក់តាមបរិមាណផលផ្លែឈើដែលបេះបាន ដោយតម្លៃទំពាំងបាយជូរ ២០០ ពាន់ដុង/គីឡូក្រាម និងប៉េងប៉ោះឆឺរី ១០០ ពាន់ដុង/គីឡូក្រាម។

ប្រភេទប៉េងប៉ោះឆឺរី ត្រូវបានបងស្រី Trần Phương Thảo ដាំសាកល្បងដោយជោគជ័យ។

លោក Trần Gia Hưng នៅឃុំ Tân Lộc ចែករំលែក៖ ការបេះដោយដៃ និងភ្លក់ផ្លែឈើភ្លាមៗនៅក្នុងចម្ការ ពិតជាគួរឱ្យចាប់អារម្មណ៍ណាស់។ ផ្លែឈើនីមួយៗមានរសជាតិដោយឡែកពីគ្នា ស្រស់និងឆ្ងាញ់។ ក្នុងឱកាសបុណ្យចូលឆ្នាំថ្មីនេះ ខ្ញុំនឹងនាំមិត្តភក្តិត្រឡប់មកទីនេះ ដើម្បីរួមគ្នាទទួលបទពិសោធន៍ម្តងទៀត។

តាមប្រសាសន៍លោក Nguyễn Quang Vinh - អនុប្រធានសមាគមកសិករឃុំ Hồ Thị Kỷ បានឱ្យដឹងថា ភូមិភាគវាយតម្លៃខ្ពស់ចំពោះទម្រង់របស់បងស្រី Thảo ហើយកំពុងជួយគាំទ្រផ្សព្វផ្សាយនៅលើបណ្តាញសង្គមផ្សេងៗ។ គោលដៅមិនត្រឹមតែដើម្បីលក់ផលិតផលកសិកម្មប៉ុណ្ណោះទេ ថែមទាំងចង់ផ្សព្វផ្សាយនូវរបៀបធ្វើដ៏ល្អនេះ ដើម្បីឱ្យបងប្អូនប្រជាពលរដ្ឋរៀនសូត្រ និងរួមគ្នាអភិវឌ្ឍសេដ្ឋកិច្ចចម្ការប្រកបដោយចីរភាព។

ក្នុងថ្ងៃនេះ បងស្រី Thảo កំពុងមមាញឹកថែទាំចម្ការ ដើម្បីត្រៀមបម្រើភ្ញៀវក្នុងឱកាសបុណ្យចូលឆ្នាំថ្មីប្រពៃណីជាតិ និងរដូវកាលទេសចរណ៍ដែលអូសបន្លាយដល់ថ្ងៃទី ៣០ មេសា។ នៅកណ្តាលពណ៌ខៀវស្រងាត់នៃស្លឹកឈើ ចង្កោមផ្លែឈើដ៏មូលក្លំ គឺជា "ផ្លែផ្អែម" ចេញពីក្តីព្យាយាម។ ក្តីស្រមៃអំពីគោលដៅទេសចរណ៍បៃតងនៅកណ្តាលទឹកដីចុងបំផុតនៃមាតុភូមិ កំពុងលេចរូបរាងឡើងជាបណ្តើរៗ នាំមកនូវមោទនភាពសម្រាប់បងប្អូនប្រជាកសិករដែលហ៊ានគិត ហ៊ានធ្វើ៕

Trịnh Hải