ប្តេជ្ញាតស៊ូរក្សា "ព្រលឹង" សិល្បៈជនជាតិ

មិនត្រឹមតែរួមចំណែកក្នុងការបង្កើតសិល្បៈប៉ុណ្ណោះទេ សិល្បករជនជាតិភាគតិចជាច្រើនរូបនៅខេត្ត Cà Mau តែងខិតខំប្រឹងប្រែងរក្សា បង្រៀន និងផ្សព្វផ្សាយនូវតម្លៃវប្បធម៌ប្រពៃណីទៀតផង ។ ដោយក្តីស្រឡាញ់ និងទឹកចិត្តមានចំពៅះវប្បធម៌ ពួកគាត់បានរួមចំណែកអភិរក្សបេតិកភណ្ឌ បង្កើនក្តីមោទនភាពជាតិ ព្រមទាំងពង្រីកសក្តានុពលវប្បធម៌ Khmer - Hoa ក្នុងការអភិវឌ្ឍទេសចរណ៍នៅមូលដ្ឋាន ។

សិល្បករ Danh Tuôl បង្រៀនយុវជន Khmer ប្រគុំភ្លេងពិណពាទ្យ ។

រក្សា "ប្រទីប" តន្ត្រីបុរាណ Hoa

ក្នុងដំណើរការរស់នៅចម្រុះគ្នាក្រោមដំបូលផ្ទះរួម បណ្តាជនជាតិបងប្អូនបានរួមគ្នាបង្កើតនូវលក្ខណៈវប្បធម៌ពិសេស បង្កើតបានជាអត្តសញ្ញាណដោយឡែករបស់ខេត្ត Cà Mau។ ទោះជាយ៉ាងណាក៏ដោយ ចំពោះមុខផលប៉ះពាល់នៃជីវភាពរស់នៅសម័យទំនើប និង "រលក" នៃសមាហរណកម្មវប្បធម៌ ទម្រង់សិល្បៈប្រពៃ ណីជាច្រើនកំពុងប្រឈមនឹងហានិភ័យសាបរលាប។ ក្នុងបរិបទនោះ សិល្បករដែលមានបេះដូង កំពុងក្លាយជា "ស្ពាន" ដ៏សំខាន់ ដើម្បីរក្សា និងបន្តប្រទីបដល់អ្នកជំនាន់ក្រោយ ។

ដោយក្តីស្រឡាញ់ចំពោះតន្ត្រីជនជាតិ Hoa សិល្បករ Lâm Hương Khánh នៅសង្កាត់ Vĩnh Trạch មានរយៈពេលជិត ២០ ឆ្នាំផ្សារភ្ជាប់ជាមួយមុខវិជ្ជាតន្ត្រីបុរាណ Hoa។ គាត់ទាំងសកម្មរៀនសូត្រពីសិល្បករចាស់ទុំ ទាំងស្វែងរកឯកសារ និងឧបករណ៍តន្ត្រីដោយខ្លួនឯង ដើម្បីស្រាវជ្រាវ និងហាត់សម ។

មិនត្រឹមតែសម្តែងប៉ុណ្ណោះ លោក Hương Khánh នៅទាំងចូលរួមយ៉ាងសកម្មក្នុងការបង្រៀនទៀតផង។ ក្នុងថ្នាក់បំប៉នសិល្បៈបុរាណដែលរៀបចំដោយមន្ទីរវប្បធម៌ កីឡា និងទេសចរណ៍ សហការជាមួយមហាវិទ្យាល័យ Bạc Liêu គាត់បានណែនាំសិក្ខាកាម ស្វែងយល់ពីប្រភពដើម ប្រវត្តិសាស្រ្តនៃការអភិវឌ្ឍ និងរបៀបលេងឧបករណ៍តន្ត្រីជនជាតិ Hoa ។

សិល្បករ Lâm Hương Khánh ចែករំលែកថា៖ “ដើម្បីរក្សាតន្ត្រីបុរាណរបស់ជនជាតិ Hoa យុវជនត្រូវតែស្រឡាញ់ និងតស៊ូហាត់សមយ៉ាងពិតប្រាកដ។ ខ្ញុំសង្ឃឹមថា កូនចៅជនជាតិ Hoa តែងមានមោទនភាព និងចំណង់ចំណូលចិត្តតាមដានមុខវិជ្ជានេះ ដើម្បីរួមគ្នារក្សាអត្តសញ្ញាណជនជាតិរបស់ដូនតាយើង” ។

សិល្បករ Lâm Hương Khánh បង្រៀនបច្ចេកទេសលេងឧបករណ៍តន្ត្រីប្រពៃណីជនជាតិ Hoa ដល់សិក្ខាកាម ។

បន្ត "ប្រទីប" នៃការចំណាប់អារម្មណ៍ខាងភ្លេងពិណពាទ្យ Khmer

កើតក្នុងគ្រួសារដែលមានប្រពៃណីសិល្បៈ តាំងពីអាយុ ១២ ឆ្នាំ សិល្បករ Danh Tuôl ទួននៅ ឃុំ Hoà Bình បានឪពុក គឺសិល្បករឆ្នើម Danh Sà Rậm បង្រៀនយ៉ាងយកចិត្តទុកដាក់នូវបច្ចេកទេសប្រគុំភ្លេងពិណពាទ្យ។ ដោយចំណង់ចំណូលចិត្ត និងស្មារតីចង់ចេះចង់ដឹង ត្រឹមតែប៉ុន្មានឆ្នាំប៉ុណ្ណោះ គាត់បានស្ទាត់ជំនាញលើឧបករណ៍តន្ត្រីជាច្រើនក្នុងវង់ភ្លេងប្រពៃណី ។

បច្ចុប្បន្ន ក្រៅពីការសម្តែង លោក Danh Tuôl នៅទាំងបើកថ្នាក់បង្រៀនឧបករណ៍តន្ត្រីជនជាតិ ដល់យុវជន Khmer នៅមូលដ្ឋានទៀតផង ។ ជាពិសេស គាត់នៅទាំងស្រាវជ្រាវ និងកែច្នៃឧបករណ៍តន្ត្រីប្រពៃណីជាច្រើនប្រភេទដោយខ្លួនឯង ដូចជា៖ ស្គរដៃ ស្គរឆៃយ៉ាំ ទ្រអ៊ូ ទ្រសោ។ល។ រួមចំណែកស្តារ និងរក្សាមុខរបរធ្វើឧបករណ៍តន្ត្រីជនជាតិដែលកំពុងបានបំភ្លេចចោលបន្តិចម្តងៗ ។

“សិល្បៈ Khmer បានឆ្លុះបញ្ចាំងពីលក្ខណៈពិសេស និងជម្រៅវប្បធម៌ជនជាតិ។ ប្រសិន បើមិនបានរក្សា និងពង្រីកទេ នឹងមានហានិភ័យបាត់បង់។ ខ្ញុំមានបំណងចង់បង្រៀនដល់យុវជនជំនាន់ក្រោយ ដើម្បីឱ្យវប្បធម៌ Khmer ស្ថិតថេរជារៀងរហូតតាមពេលវេលា” លោក Danh Tuôl បានសម្តែងនូវអារម្មណ៍បែបនេះ។​

ចាំបាច់មានគោលនយោបាយឧបត្ថម្ភសមស្រប ដើម្បីលើកទឹកចិត្ត និងពង្រីកតួនាទីរបស់សិល្បករជនជាតិភាគតិចសម្រាប់ការអភិរក្សវប្បធម៌ជនជាតិ។

ពីការតស៊ូ និងការប្តេជ្ញាចិត្តរបស់សិល្បករ ដូចជាលោក៖ Hương Khánh និងបង Danh Tuôl…។ កំពុងរួមចំណែក "ស្តារឡើងវិញ" នូវតម្លៃវប្បធម៌ប្រពៃណី នាំសិល្បៈជនជាតិមកកាន់តែជិតជាមួយមហាជន ។ ការរួមដៃរបស់ពួកគាត់ ជាមួយនឹងកម្មវិធីឧបត្ថម្ភនានារបស់រដ្ឋ កំពុងបើកទិសដៅប្រកបដោយចីរភាពក្នុងការងារអភិរក្ស និងពង្រីកបេតិកភណ្ឌវប្បធម៌បណ្តាជនជាតិភាគតិច ។

ការរួមចំណែកដ៏ស្ងៀមស្ងាត់ ប៉ុន្តែពោរពេញដោយអត្ថន័យទាំងនោះ បាននិងកំពុងជួយ "រក្សាព្រលឹង" វប្បធម៌ជនជាតិក្នុងលំហូរនៃសម័យទំនើប ទន្ទឹមនឹងនោះ ធ្វើឱ្យកាន់តែសម្បូរបែបនូវអត្តសញ្ញាណវប្បធម៌ Việt Nam ចម្រុះពណ៌ និងឯកភាពក្នុងសហគមន៍ ៥៤ ជនជាតិជាបងប្អូនផងដែរ៕

Trịnh Hữu