ភូមិស្រុកអឹកធឹករដូវបុណ្យសែនដូនតា

ក្នុងបណ្ដាថ្ងៃនេះ តាមបណ្ដាភូមិស្រុក Khmer លើភូមិសាស្ត្រខេត្តកាន់តែមានភាពអ៊ូអរខ្លាំងដោយបរិយាកាសទទួលអំណរបុណ្យសែនដូនតា ឆ្នាំ២០២៦។ តាំងពីព្រឹកព្រហាម សំឡេងសំណេះសំណាលសើចក្អាកក្អាយលាយឡំនឹងក្លិនផ្សែងធូបសាយភាយចេញពីបណ្ដាវត្តអារាម បានសបញ្ជាក់ពីរដូវបុណ្យដែលពោរពេញដោយមនោសញ្ចេតនាជួបជុំមូលមិត្ត និងការដឹងគុណ។

នាពេលរសៀល បរិយាកាសនៅតាមបណ្ដាភូមិស្រុកកាន់តែអ៊ូអរថែមទៀត នៅពេលមាមីងបងប្អូនត្រៀមរៀបចំទទួលបុណ្យសែនដូនតា។

បុណ្យសែនដូនតា គឺជាឱកាសដើម្បីកូនចៅសម្ដែងនូវទឹកចិត្តកតញ្ញូកតវេទី រំលឹកគុណដល់បុព្វការីជន ជីដូនជីតា និងអ្នកមានគុណរបស់ខ្លួន។ ចាប់ពីបណ្ដាថ្ងៃជិតដល់បុណ្យ មាមីងបងប្អូនបានមមាញឹកត្រៀមរៀបចំគ្រឿងដង្វាយ កែលម្អផ្ទះសម្បែង វត្តអារាម និងរួមគ្នាទទួលរដូវបុណ្យប្រពៃណី។

នៅភូមិ Đường Đào ឃុំ Hồ Thị Kỷ បរិយាកាសក្នុងបណ្ដាថ្ងៃនេះកាន់តែផុសផុលឡើង នៅពេលបណ្ដាកីឡាករទូក.ងខ្នាតតូច កំពុងខិតខំហ្វឹកហាត់យ៉ាងសកម្ម ត្រៀមចូលរួមការប្រកួតអបអរសាទរបុណ្យសែនដូនតា ឆ្នាំ២០២៦ ដែលនឹងប្រព្រឹត្តទៅនៅថ្ងៃទី១០ ខែតុលាខាង។

នេះជារដូវកាលប្រកួតដំបូងដែលវត្តសិរីមង្គលជ្រុងខ្មែរ (Rạch Giồng) បានសហការជាមួយគណៈកម្មាធិការប្រជាជនឃុំ Hồ Thị Kỷ និងមន្ទីរវប្បធម៌ កីឡានិងទេសចរណ៍ខេត្តចាត់តាំងឡើង ដោយមានក្រុមទូកបុរស និងទូកនារីចំនួន ១៤ ក្រុមចូលរួម។ ដោយឡែកឃុំ Tân Lộc មាន ៣ ក្រុម រួមមានក្រុមបុរស ២ និងក្រុមនារី ១ ក្រុមផងដែរ។

បណ្ដាម៉ោងហ្វឹកហាត់ប្រព្រឹត្តទៅយ៉ាងទៀងទាត់។ ចង្វាក់ច្រវ៉ាស្របគ្នាព្រមៗជាមួយសំឡេងស្រែកហូកញ្ជ្រៀវលើកទឹកចិត្តបន្លឺឡើងកណ្ដាលភូមិស្រុក បង្កើតបានជាបរិយាកាសអ៊ូអរមុនថ្ងៃបុណ្យផងដែរ។ គ្រប់បណ្ដាក្រុមសុទ្ធតែប្ដេជ្ញាចិត្តបង្កើតស្នាដៃលើខ្សែទឹកប្រណាំង សន្យានឹងនាំមកនូវការប្រកួតយ៉ាងជក់ចិត្តដិតអារម្មណ៍។

ការប្រណាំងទូក.ងខ្នាតតូច មិនគ្រាន់តែជាការប្រកួតកីឡាធម្មតាប៉ុណ្ណោះទេ ថែមទាំងបង្ហាញពីកម្លាំងសាមគ្គីសមូហភាព វិន័យ និងការផ្សារភ្ជាប់រវាងសហគមន៍ទៀតផង។ ឆ្លងកាត់ខ្សែព្រ័ត្រ ទោះបីឈ្នះឬចាញ់ក៏ដោយ ក៏បណ្ដាក្រុមនៅតែចាប់ដៃគ្នាយ៉ាងកក់ក្ដៅ ញញឹមដោយរីករាយ និងផ្ញើពាក្យជូនពរ ចែករំលែកសេចក្ដីរីករាយក្នុងរដូវបុណ្យរៀងៗខ្លួនផងដែរ។

 ព្រះសង្ឃនិងមាមីងបងប្អូន Khmer ទទួលបុណ្យសែនដូនតានៅវត្តជ្រុងខ្មែរ (Rạch Giồng) ឃុំ Hồ Thị Kỷ។

ទន្ទឹមនឹងបរិយាកាសហ្វឹកហាត់ មាមីងបងប្អូន Khmer ក៏មមាញឹករៀបចំគ្រឿងសក្ការៈ មានទាំងចង្ហាន់ នំនេក ម្ហូបអាហារប្រពៃណីទៅវត្តដើម្បីប្រគេនព្រះសង្ឃទៀតផង។ នៅវត្តសិរីមង្គល ជ្រុងខ្មែរ (Rạch Giồng) តាំងពីព្រឹកព្រលឹម សំឡេងសូត្រធម៌ឧទ្ទិសកុសលរបស់ព្រះសង្ឃបន្លឺឡើងយ៉ាងរងំ លាយឡំនឹងសំឡេងភ្លេងពិណពាទ្យ។ ពិធីបោះបាយបិណ្ឌឧទ្ទិសកុសលជូនដល់វិញ្ញាណក្ខន្ធអ្នកដែលបានចែកឋានប្រព្រឹត្តទៅយ៉ាងមហោឡារិក កក់ក្ដៅ បង្ហាញពីលក្ខណៈវប្បធម៌ និងស្មារតីមនុស្សធម៌របស់បងប្អូនជនរួមជាតិ Khmer តាមប្រពៃណីព្រះពុទ្ធសាសនា។

រដូវបុណ្យសែនដូនតាឆ្នាំនេះកាន់តែមានអត្ថន័យថែមទៀត នៅពេលដែលមុខមាត់ភូមិស្រុកកាន់តែមានភាពស្រស់បំព្រងឡើង។ បណ្ដាដងផ្លូវបេតុងតភ្ជាប់វែងអន្លាយ ផ្ទះសម្បែងរឹងមាំសង់ឡើងយ៉ាងកៀកកិតគ្នា គឺជាសញ្ញាសម្គាល់យ៉ាងច្បាស់អំពីការផ្លាស់ប្ដូរថ្មីក្នុងជីវភាពរស់នៅរបស់ប្រជាជន។

ចាប់ពីបណ្ដាពិធីបុណ្យប្រពៃណីរហូតដល់សកម្មភាពវប្បធម៌ កីឡា បានរួមចំណែករឹតបន្តឹងចំណងសាមគ្គីភាពរវាងជនជាតិ Kinh - Khmer - Hoa រួមគ្នាកសាងស្រុកកំណើតឱ្យកាន់តែរីកចម្រើនឡើង៕

Danh Điệp