រួមដៃកសាង "ផ្ទះមេត្តាធម៌"

ពាក្យចាស់តែងពោលថា៖ "មានទីលំនៅនឹងនរ ទើបប្រកបរបរចិញ្ចឹមជីវិតបានល្អ" ។ អត្ថន័យគឺចង់សំដៅដល់ភាពលំនឹងនៃកន្លែងស្នាក់នៅ កន្លែងរស់នៅ និងធ្វើការ។ នៅពេលជីវភាពរស់នៅបានលំនឹង ទើបការកសាងអាជីពកាន់តែងាយស្រួល និងរលូនទៅបាន។

បងស្រី Quách Kim Tiền (ស្តាំ) ប្រធានសមាគមសហព័ន្ធនារីឃុំ Thới Bình រួមជាមួយកម្មាភិបាលសមគមអញ្ជើញទៅពិនិត្យល្បឿននៃការសាងសង់ផ្ទះរបស់បងស្រី Trịnh Thị Nhung។

ប៉ុន្តែ ចំពោះបងប្អូននារីក្រីក្រ និងមានការលំបាក មានផ្ទះផ្ទាល់ខ្លួនសម្រាប់ស្នាក់នៅវាជាក្តីស្រមៃដ៏សែនឆ្ងាយណាស់ទៅហើយ ព្រោះពួកគាត់ត្រូវគិតគូរពីរឿងហូបចុក និងស្លៀកពាក់ប្រចាំថ្ងៃ ។ ដោយយល់ច្បាស់ និងពេញដោយក្តីចែករំលែក សមាគមសហព័ន្ធនារីឃុំ Thới Bình បានបំផុសចលនា និងកៀរគរកសាង "ផ្ទះមេត្តាធម៌" ដើម្បីជួយនារីក្រីក្រ និងនារីដែលមានជីវភាពជួបលំបាកមានកន្លែងស្នាក់នៅស្ថេរភាព និងស្ងប់ចិត្តឈានឡើងក្នុងការរស់នៅ។

សមាគមសហព័ន្ធនារីឃុំ Thới Bình បានកសាងផែនការច្បាស់លាស់ និងចង្អុលការណែនាំសាខាសមាគមនានា ចុះស្រង់ស្ថិតិជាក់ស្តែងនូវស្ថានភាពផ្ទះសម្បែងរបស់គ្រួសារនារីក្រីក្រ នារីនៅលីវ ជនពិការ និងករណីដែលមានការលំបាកពិសេស។ ពីលទ្ធផលនៃការស្រង់ស្ថិតិ សមាគមបានស្នើវិធានការឧបត្ថម្ភសមស្រប និងជាក់ស្តែងទាន់ពេលវេលាផងដែរ។

បងស្រី Quách Kim Tiền  ប្រធានសមាគមសហព័ន្ធនារីឃុំ Thới Bình បានឱ្យដឹង៖ "សមាគមសហព័ន្ធនារីឃុំ បានកៀរគរជំនួយកសាង "ផ្ទះមេត្តាធម៌" ចំនួន ៤ ខ្នង ដោយមួយខ្នងៗសរុបតម្លៃ ៤៥ លានដុងពីអ្នកឧបត្ថម្ភ និងគ្រួសារបដិភាគបន្ថែម ១៥ លានដុង។ មានផ្ទះសម្រាប់ជ្រកកោន បងប្អូននារីស្ងប់ចិត្តក្នុងការបង្កបង្កើនផល និងខិតខំអភិវឌ្ឍសេដ្ឋកិច្ច" ។

មានផ្ទះថ្មី ជួយឱ្យប្តីប្រពន្ធបងស្រី Trịnh Thị Nhung សុខសាន្តចិត្តពលកម្មផលិត ដើម្បីលំនឹងជីវភាព។

គ្រួសារបងស្រី Trịnh Thị Nhung  នៅអនុសង្កាត់លេខ ២  ឃុំ Thới Bình គឺជាគ្រួសារមួយក្នុងចំណោមគ្រួសារដែលទទួលបានការឧបត្ថម្ភ "ផ្ទះមេត្តាធម៌" ។ គ្រួសារបងស្រី Nhung ស្ថិតក្នុងស្ថានភាពជួបលំបាកខាងផ្ទះស្នាក់នៅ គ្មានដីផលិត ត្រូវប្រកបរបរលក់ឆ្នោត និងនំប៉័ង ដើម្បីចិញ្ចឹមជីវភាពគ្រួសារប្រចាំថ្ងៃ ដោយប្រាក់ចំណូលរកបានក៏មិនទៀងទាត់។ ផ្ទះទ្រុឌទ្រោមយ៉ាងខ្លាំង ប៉ុន្តែគ្រួសារមិនមានលទ្ធភាពសាងសង់ថ្មី។ កម្មវិធី "ផ្ទះមេត្តាធម៌" បានឧបត្ថម្ភទឹកប្រាក់ចំនួន ៤៥ លានដុង រួមជាមួយនឹងការជួយជ្រោមជ្រែងពីបងប្អូនសាច់ញាតិ ពេលនេះ ផ្ទះថ្មីដ៏សមរម្យរបស់គ្រួសារបងស្រី Nhung កំពុងតែសាងសង់បានសម្រេចជាបណ្តើរៗដែរហើយ។

បងស្រី Nhung បានរៀបរាប់ថា៖ "ជាងដប់ឆ្នាំមកនេះ ប្តីប្រពន្ធខ្ញុំមិនហ៊ានគិតដល់រឿងសង់ផ្ទះថ្មីនោះទេ។ អាស្រ័យទទួលបានការយកចិត្តទុកដាក់ និងជួយឧបត្ថម្ភពីសមាគមនារីគ្រប់លំដាប់ថ្នាក់ ពេលនេះគ្រួសារខ្ញុំមានលក្ខខណៈសង់ផ្ទះថ្មីបានសមរម្យ។ នេះក៏ជាកម្លាំងចលករសម្រាប់គ្រួសារខ្ញុំខិតខំឈានឡើងផងដែរ" ។

រួមក្តីសុខដូចជាបងស្រី Nhung ផងដែរ ឆ្នាំ២០២៥ បងស្រី Phạm Thị Lài  នៅអនុសង្កាត់លេខ ៥ ឃុំ Thới Bình ត្រូវបានសមាគមសហព័ន្ធនារីឃុំ កៀរគរគណៈសប្បុរសធម៌សង្គមនៃសមាគមពុទ្ធសាសនាខេត្ត ឧបត្ថម្ភទឹកប្រាក់ ៤៥ លានដុង ដើម្បីសង់ផ្ទះថ្មី។ ស្ថិតក្នុងគ្រួសារក្រ​ មានដីផលិតត្រឹម ២ កុង ​រួមជាមួយការចិញ្ចឹមមាន់ ទាបន្ថែម ប្រាក់ចំណូលក៏តិចតួចស្តួចស្តើង សង់បានផ្ទះថ្មី បងស្រី Lài ហាក់បីដូចជាមានកម្លាំងសម្រាប់ផ្គត់ផ្គង់ជីវភាពគ្រួសារ។

បងស្រី Lài រំភើបចិត្តចែករំលែកថា៖ "ខ្ញុំគិតថា មួយជីវិតនេះនឹងរស់នៅក្នុងផ្ទះទ្រុឌទ្រោមនេះរហូតហើយ។ តែអាស្រ័យការយកចិត្តទុកដាក់របស់សមាគមសហព័ន្ធនារីឃុំ ផ្ទះថ្មីដ៏រឹងមាំត្រូវបានសាងសង់ឡើង។ គុណបំណាច់នេះពិតជាពិបាកនឹងថ្លែងឱ្យអស់បានឡើយ។ ពេលនេះមានផ្ទះដ៏រឹងមាំ ខ្ញុំសប្បាយចិត្តណាស់។ រាល់ថ្ងៃ ខ្ញុំតែងជំរុញទឹកចិត្តប្តី និងកូនរបស់ខ្ញុំឱ្យខិតខំប្រឹងប្រែង ឈានឡើងដើម្បីមិនធ្វើឱ្យខកបំណងល្អរបស់អ្នករាល់គ្នានោះឡើយ" ។

សមាគមសហព័ន្ធនារីឃុំ Thới Bình ជំរុញទឹកចិត្តបងស្រី Phạm Thị Lài (ឆ្វេង) ពង្រីកទម្រង់ចិញ្ចឹមសត្វ ដើម្បីបង្កើនប្រាក់ចំណូល។

រំភើប និងសប្បាយរីករាយ គឺជាអារម្មណ៍រួមរបស់សមាជិកនារីជាច្រើនរបស់ឃុំ Thới Bình នៅពេលដែលបានរស់នៅក្នុងផ្ទះថ្មីដែលមានឈ្មោះថា "ផ្ទះមេត្តាធម៌" ។ ព្រោះថា "ផ្ទះមេត្តាធម៌" ទាំងនោះ បាននាំមកនូវភាពកក់ក្តៅនៃការជួយជ្រោមជ្រែង ចែករំលែក និងបន្ថែមកម្លាំងចលករដល់សមាជិកនារីដែលជួបលំបាកនៅភូមិភាគ ឱ្យខិតខំប្រឹងប្រែងឈានឡើង លំនឹងជីវភាព។ ផ្តើមពីនោះ ការផ្សារភ្ជាប់រវាងសមាជិកគ្រប់រូប ព្រមទាំងសមាគមនារីឃុំមួយថ្ងៃកាន់តែមានភាពរឹតបន្តឹង។

បងស្រី Quách Kim Tiền បានឱ្យដឹង៖ “រយៈពេលខាងមុខ សមាគមនារីឃុំ និងមានច្រើនវិធីសាស្ត្រយ៉ាងច្បាស់លាស់ និងជាក់ស្តែង ដើម្បីជំនួយដល់សមាជិកទាំងឡាយគ្រប់រូប ព្រមទាំងនារីក្រីក្រ និងមានជីវភាពជួបលំបាក បានលំនឹងចិត្តក្នុងការរស់នៅដោយផ្តោតលើការឧបត្ថម្ភទម្រង់នៃការរស់នៅ ដូចជា៖ “នារីឧបត្ថម្ភគ្នាអភិវឌ្ឍន៍សេដ្ឋកិច្ច” និង “ឧបត្ថម្ភនារីបង្កើតអាជីព” ស្របឱកាសនោះ ឧបត្ថម្ភសមាជិកទាំងឡាយឱ្យបន្តចូលជិតសេវាកម្មសុខាភិបាល និងថែទាំសុខមាលភាព។ល។”។

"ផ្ទះមេត្តាធម៌" កាន់តែមានភាពកក់ក្តៅជាងពេលណាៗទាំងអស់ ពីព្រោះមិនត្រឹមតែបង្កលក្ខណៈឱ្យនារីមានផ្ទះស្នាក់នៅ កាត់បន្ថយការលំបាក និងមានស្ថេរភាពក្នុងការរស់នៅ ប៉ុណ្ណោះទេ ថែមទាំងបំភ្លឺឡើងនូវអណ្តាតភ្លើងនៃទំនុកចិត្ត និងក្តីសង្ឃឹមនាពេលអនាគតទៀតផង៕

Quỳnh Anh - Hoàng Vũ