កងទ័ពរបស់ Bác Hồ ឆ្លាតវៃក្នុងការធ្វើសេដ្ឋកិច្ច

ក្រោយពីបានបំពេញកាតព្វកិច្ចអន្តរជាតិនៅសមរភូមិកម្ពុជាអស់រយៈពេលជាច្រើនឆ្នាំ ហើយ វិលត្រឡប់មកជីវិតធម្មតាវិញ អតីតយុទ្ធជន Đinh Tấn Công នៅភូមិ Phước Tân ឃុំ Vĩnh Phước បានបន្តរក្សាគុណសម្បត្តិរបស់ទាហានក្នុងការផលិត និងកម្លាំងពលកម្ម។ ដោយមានស្មារតីស្វាហាប់ ហ៊ានគិត ហ៊ានធ្វើ គាត់បានបង្កើតទម្រង់សេដ្ឋកិច្ចយ៉ាងសមស្របជាច្រើនដោយក្លាហាន និងនាំមកនូវប្រាក់ចំណូលស្ថិរភាពដល់គ្រួសារទៀតផង ផ្តើមពីនោះក៏សកម្មក្នុងការចែករំលែកបទពិសោធន៍ ជំនួយឧបត្ថម្ភមិត្តរួមកងទ័ពដើម្បីរួមគ្នាអភិវឌ្ឍ។

អតីតយុទ្ធជន Đinh Tấn Công (ឆ្វេង) ចែករំលែកបទពិសោធន៍ក្នុងការចិញ្ចឹមបង្គា-ក្តាមរួមផ្សំ មានប្រសិទ្ធភាពជាមួយសមាជិកអតីតយុទ្ធជន និងបងប្អូនប្រជាជនក្នុងភូមិ។

នៅឆ្នាំ ១៩៨៤ លោក Đinh Tấn Công បានទៅបំពេញកាតព្វកិច្ចអន្តរជាតិនៅ Campuchia។ ឆ្នាំ ១៩៨៧ គាត់បានត្រឡប់មកស្រុកកំណើតរបស់ខ្លួនវិញ ហើយបន្តធ្វើការនៅភូមិភាគ។ បន្ទាប់ពីបានលះបង់អស់រយៈកាលជាច្រើនឆ្នាំជាមួយកិច្ចការងារ និងសកម្មភាពរបស់សមាគមអតីតយុទ្ធជន គាត់ក៏បានចូលនិវត្តន៍នៅឆ្នាំ ២០២៤។

ថ្វីត្បិតតែចូលនិវត្តន៍ ប៉ុន្តែមិនព្រមនៅទំនេរនោះទេ លោក Công បានប្រើប្រាស់ផ្ទៃដី និងបទពិសោធន៍ដែលខ្លួនរៀនបាន​ក្នុងដំណើរការពលកម្មផលិត ដើម្បីប្រមូលផ្តុំកម្លាំងកសាងទម្រង់សេដ្ឋកិច្ចនៅស្រុកកំណើតរបស់ខ្លួន។

លោក Đinh Tấn Công បានចែករំលែកថា៖ «យើងត្រូវតែបង្កើតទម្រង់សេដ្ឋកិច្ចសម្រាប់គ្រួសាររបស់យើងជាមុនសិន ទើបយើងអាចពង្រីកសាយភាយក្នុងសមាជិកបាន។ បច្ចុប្បន្ន ខ្ញុំមានទម្រង់ចិញ្ចឹមពស់សម្រាប់លក់សាច់ និងលក់ពូជ រួមជាមួយនឹងជ្រូកពូជ ព្រមទាំងចិញ្ចឹមបង្គា និងក្តាមក្នុងស្រះ ដើម្បីបង្កើតប្រាក់ចំណូលស្ថិរភាព»។

ដោយអនុវត្តតាមគោលការណ៍នៃការប្រើប្រាស់ប្រាក់ចំណេញរយៈពេលខ្លី ដើម្បីគាំទ្រដល់កំណើនរយៈពេលវែង និងការធ្វើពិពិធកម្មសត្វពាហនៈ លោក Công បានបង្កើតជាបណ្តើរៗនូវទម្រង់ផលិតរួមបញ្ចូលគ្នាដែលសមស្របទៅនឹងស្ថានភាពគ្រួសារ។ ការចិញ្ចឹមពស់សម្រាប់យកសាច់ និងបង្កាត់ពូជ រួមជាមួយនឹងជ្រូកពូជ បង្គា និងក្តាម មិនត្រឹមតែប្រើប្រាស់តំបន់ផលិតកម្មឱ្យប្រកបដោយប្រសិទ្ធភាពប៉ុណ្ណោះទេ ថែមទាំងបានជួយផ្សព្វផ្សាយហានិភ័យ និងបង្កើតប្រភពចំណូលច្រើនផងដែរ។ អាស្រ័យដូច្នេះហើយ ទើបបណ្តាទម្រង់ទាំងនេះបានផ្តល់ប្រភពចំណូលជារៀងរាល់ឆ្នាំរាប់រយលានដុងសម្រាប់គ្រួសារលោកផងដែរ។

មិនត្រឹមតែអភិវឌ្ឍសេដ្ឋកិច្ចគ្រួសារប៉ុណ្ណោះទេ លោក Công ថែមទាំងបានចែករំលែកបទពិសោធន៍កសិកម្ម និងផលិតកម្មរបស់ខ្លួនជាមួយសមាជិកសមាគមអតីតយុទ្ធជនទៀតផង ជួយពួកគេទទួលបានចំណេះដឹងបន្ថែម និងជ្រើសរើសទិសដៅអភិវឌ្ឍន៍សេដ្ឋកិច្ចយ៉ាងសមស្របដោយទំនុកចិត្ត។

អតីតយុទ្ធជន Đinh Tấn Cô ចែករំលែកបទពិសោធន៍ និងទម្រង់ចិញ្ចឹមពស់បង្កាត់ពូជជាមួយប្រធានសមាគមអតីតយុទ្ធជនឃុំ។

លោក Dương Chí Nguyệt ប្រធានសមាគមអតីតយុទ្ធជនឃុំ Vĩnh Phước បានកត់សម្គាល់ថា៖ «សមមិត្ត Đinh Tấn Công តែងមានភាពស្វាហាប់ក្នុងការអភិវឌ្ឍសេដ្ឋកិច្ចគ្រួសាររបស់ខ្លួន និងបានចូលរួមយ៉ាងសកម្មក្នុងសកម្មភាពរបស់សមាគម ព្រមទាំងចលនាត្រាប់តាមស្នេហាជាតិនៅភូមិភាគ។ បន្ទាប់ពីចូលនិវត្តន៍ គាត់បានបង្កើតទម្រង់ផលិតដែលប្រកបដោយប្រសិទ្ធភាពយ៉ាងក្លាហាន ហើយក្នុងពេលជាមួយគ្នានេះ គាត់បានចែករំលែកនូវបទពិសោធន៍របស់គាត់ដើម្បីជំនួយសមាជិកគ្រប់រូបឱ្យអភិវឌ្ឍរួមគ្នា។ នេះគឺជាគំរូដ៏ឆ្នើមមួយសម្រាប់ខាងស្មារតីខិតខំប្រឹងប្រែងដោយខ្លួនឯង ដើម្បីជំនះរាល់ការលំបាក​និងពង្រីកគុណសម្បត្តិជាកងទ័ពរបស់ Bác Hồ ក្នុងយុគសម័យថ្មី»។

ផ្តើមពីទាហានដែលបានវិលត្រឡប់មកក្រោយពីសម័យសង្គ្រាមរហូតក្លាយជាអតីតយុទ្ធជនដ៏ស្វាឆ្លាតវៃក្នុងការងារ និងផលិតកម្ម លោក Đinh Tấn Công នៅតែរក្សាស្មារតីនៃការពឹងលើខ្លួនឯង និងខិតខំយ៉ាងសកម្មដើម្បីទទួលបានជោគជ័យលើគ្រប់វិស័យ។ តាមរយៈសកម្មភាពជាក់ស្តែង លោក Công កំពុងបន្តលើកកម្ពស់គុណសម្បត្តិរបស់កងទ័ព Bác Hồ ក្នុងជីវិតប្រចាំថ្ងៃផងដែរ។ ដោយមានស្មារតីហ៊ានគិត ហ៊ានធ្វើ និងមានឆន្ទៈក្នុងការគាំទ្រពីសមមិត្តរបស់ខ្លួន លោកគឺជាគំរូដ៏ភ្លឺស្វាងមួយ រួមចំណែកពង្រីកសាយភាយនៃប្រពៃណីរបស់អតីតយុទ្ធជនក្នុងការចូលរួមប្រឡងប្រណាំងដើម្បីអភិវឌ្ឍសេដ្ឋកិច្ច និងកសាងមាតុភូមិដ៏សម្បូររុងរឿង៕

Tú Nguyên