សុខសាន្តចិត្តក្នុងផ្ទះមហាសាមគ្គី

យល់ច្បាស់ពីបំណងប្រាថ្នាចង់បានផ្ទះនៅរបស់គ្រួសារក្រីក្រ គ្រួសារប្រកៀកបន្ទាត់ក្រ និងគ្រួសារជួបលំបាកអំពីផ្ទះនៅ គណៈកម្មាធិការរណសិរ្សមាតុភូមិ Việt Nam សង្កាត់ Hiệp Thành បានសកម្មចលនាស្ថាប័ន អង្គភាព និងសប្បុរសជន រួមដៃគ្នាកសាងផ្ទះមហាសាមគ្គី ។ ផ្ទះថ្មីមួយខ្នងដែលបានសាងសង់ឡើង គឺជាការបន្ថែមនូវរឿងរ៉ាវដ៏ល្អប្រពៃអំពីមនោសញ្ចេតនានៃទឹកចិត្តមនុស្សធម៌ ចំណងសាមគ្គីភាពជិតស្និទ្ធក្នុងសហគមន៍ ជួយឱ្យគ្រួសារជួបលំបាកមានផ្ទះនៅនឹងនរ។

លោក Sơn Kiệm ទន្ទឹងរង់ចាំផ្ទះឆាប់សាងសង់រួចរាល់។

រសៀលថ្ងៃទី ២១ ខែតុលា ឆ្នាំ ២០២៥ នៅលើភូមិសាស្ត្រសង្កាត់ Hiệp Thành មានភ្លៀងធ្លាក់ខ្លាំង និងខ្យល់កួចធំ បណ្តោយឱ្យខូចខាតផ្ទះចំនួន ៩ ខ្នងរបស់ប្រជាជនក្នុងតំបន់។ ក្នុងនោះ ផ្ទះរបស់គ្រួសារលោក Sơn Kiệm និងអ្នកមីង Sơn Thị Bó នៅអនុសង្កាត់ Giồng Giữa A ត្រូវខ្យល់បោកបក់របើកដំបូលស័ង្កសី ទ្រុឌទ្រោម ប្រឈមនឹងហានិភ័យបាក់រលំ ។

លោក Sơn Kiệm បានចែករំលែកថា ពីមុនមកគ្រួសាររស់នៅដោយរបរដាំដុះ សេដ្ឋកិច្ចជួបលំបាកខ្លាំង ផ្ទះក៏ត្រូវទ្រុឌទ្រោមជាច្រើនឆ្នាំហើយដែរ ប៉ុន្តែប្ដីប្រពន្ធរបស់លោកមិនមានលទ្ធភាពជួសជុល ឬសាងសង់ថ្មីឡើយ ។ នៅពេលខ្យល់បោកបក់កន្លងហើយ ដំបូលស័ង្កសីទាំងស្រុងបានប៉ើងទៅអស់ ផ្ទះត្រៀមនឹងបាក់ទៀតផង។ ក្រោយហេតុការណ៍នេះ ថ្នាក់ដឹកនាំមូលដ្ឋានបានចុះមកចែករំលែក លើកទឹកចិត្ត និងឧបត្ថម្ភគ្រួសារនូវផ្ទះមហាសាមគ្គីមួយខ្នងទាន់ពេល។ ក្រៅពីជួលជាង បងប្អូនអ្នកជិតខាងក៏បានរួមដៃគ្នាជួយ ដូច្នេះផ្ទះជិតនឹងសាងសង់រួចរាល់ ជួយឱ្យគ្រួសារមានទីជម្រកស្នាក់នៅរឹងមាំ។

លោក Sơn Kiệm បានសម្តែងក្តីរំភើបថា៖ "ពេលបានដំណឹងថាផ្ទះរបស់ខ្ញុំត្រូវខ្យល់កួចធ្វើឱ្យខូចខាតធ្ងន់ធ្ងរ ថ្នាក់ដឹកនាំគណៈកម្មាធិការប្រជាជន និងគណៈកម្មាធិការរណសិរ្សមាតុភូមិសង្កាត់ បានចុះមកសាកសួរ និងឧបត្ថម្ភថវិកាសាងសង់ផ្ទះទាន់ពេលវេលា។ ខ្ញុំពិតជារំភើបចិត្តយ៉ាងខ្លាំងចំពោះការយកចិត្តទុកដាក់របស់មូលដ្ឋាន និងបងប្អូនអ្នកជិតខាង នេះគឺជាកម្លាំងចលករដើម្បីយើងខ្ញុំជំនះការលំបាក ស្ងប់ចិត្តពលកម្មផលិតកម្ម និងឈានឡើងក្នុងជីវិត" ។

ស្រដៀងនឹងគ្រួសារលោក Sơn Kiệm ដែរ ក្នុងរដូវភ្លៀងឆ្នាំនេះ គ្រួសារដែលមានសមាជិក ៧ នាក់របស់លោក NguyễN Văn Nguyên អាយុ ៦៧ ឆ្នាំ នៅអនុសង្កាត់ Nhà Mát លែងព្រួយបារម្ភទៀតហើយ ពេលត្រូវរស់នៅក្នុងផ្ទះកម្រិតទី ៤ ដែលទ្រុឌទ្រោម សើមដោយលិចទឹក និងភ្លៀងជះខ្យល់ចូល ព្រោះបានសង្កាត់ជំនួយឧបត្ថម្ភផ្ទះថ្មី ។ គ្មានដីផលិត ពីមុនលោក Nguyên ធ្វើជាជំនួយការជាងសំណង់ និងធ្វើសន្តិសុខដើម្បីចិញ្ចឹមគ្រួសារ ឥឡូវចាស់ជរា ហើយមានជំងឺប្រចាំកាយ មិនអាចធ្វើការងារធ្ងន់បាន រាល់ការចំណាយក្នុងជីវភាពរំពឹងលើរបរ នេសាទនៅសមុទ្ររបស់កូនប្រុស។ ទោះជាខិតខំសន្សំសំចៃ ប៉ុន្តែជីវភាពនៅតែខ្វះមុខខ្វះក្រោយ ដូច្នេះជាច្រើនឆ្នាំមកនេះ គ្រួសារមិនមានលទ្ធភាពជួសជុលផ្ទះដែលទ្រុឌទ្រោមនោះឡើយ ។ ផ្តើមពីថវិកាឧបត្ថម្ភកសាងផ្ទះមហាសាមគ្គី រួមជាមួយប្រាក់ដែលសាច់ញាតិឱ្យខ្ចីបន្ថែម គ្រួសារលោក Nguyên ឥឡូវមានផ្ទះរឹងមាំដើម្បីរស់នៅ និងប្រកបរបរចិញ្ចឹមជីវិតដោយសុខសាន្ត ។

លោក Nguyễn Văn Nguyên (ស្តាំ) រួមជាមួយគ្រួសារនៅក្បែរផ្ទះមហាសាមគ្គីដែលបានគណៈកម្មាធិការរណសិរ្សមាតុភូមិសង្កាត់ Hiệp Thành និងរដ្ឋអំណាចភូមិភាគឧបត្ថម្ភ។

យោងតាមលោកស្រី Ngô Yến Nhiên ប្រធានគណៈកម្មាធិការរណសិរ្សមាតុភូមិ Việt Nam សង្កាត់ Hiệp Thành បានឱ្យដឹង៖ ពីដើមឆ្នាំ ២០២៥ មកដល់ពេលនេះ អង្គភាពបានចលនាសាងសង់ និងបញ្ចប់ផ្ទះមហាសាមគ្គីចំនួន ១៨ ខ្នង ជូនដល់គ្រួសារក្រីក្រ គ្រួសារប្រកៀកបន្ទាត់ក្រ និងគ្រួសារជួបការលំបាកអំពីផ្ទះនៅ ។ ទន្ទឹមនឹងការឧបត្ថម្ភផ្ទះ អង្គភាពក៏បានឆ្លៀតប្រភពចលនាពីអង្គការ និងសប្បុរសជន ដើម្បីឧបត្ថម្ភសម្ភារៈប្រើប្រាស់ក្នុងជីវភាព សំណង់បន្ទាប់បន្សំ និងដើមទុនប្រកបរបរ។ល។ ក្នុងគោលបំណងជួយឱ្យគ្រួសារមានលក្ខខណៈអភិវឌ្ឍសេដ្ឋកិច្ច និងលើកកម្ពស់គុណភាពជីវិត ។

ផ្ទះមហាសាមគ្គីនីមួយៗដែលបានសាងសង់រួច និងប្រគល់ជូន មានន័យថាមានគ្រួសារមួយទៀតបានផ្ទះនៅលំនឹងល្អ និងកាត់បន្ថយការលំបាកក្នុងការរស់នៅ។ នោះមិនត្រឹមតែជាអំណោយជាក់ស្តែង និងប្រកបដោយអត្ថន័យមនុស្សធម៌យ៉ាងជ្រាលជ្រៅ បង្ហាញពីស្មារតីជួយគ្នាក្នុងគ្រាក្រលំបាករបស់សហគមន៍ប៉ុណ្ណោះទេ ថែមទាំងជាប្រភពនៃការលើកទឹកចិត្ត បន្ថែមជំនឿ និងកម្លាំងចិត្តដើម្បីគ្រួសារក្រីក្រឈានឡើងទៀតផង៕

Tú Nguyên