វិនិយោគលើចំណុចសំខាន់ ដើម្បីពង្រីកកម្លាំងផ្ទៃក្នុង

ក្នុងដំណាក់កាលទី II (ចាប់ពីឆ្នាំ ២០២៦-២០៣០) ខេត្ត Cà Mau បានកំណត់ការអនុវត្តកម្មវិធីគោលដៅជាតិសម្រាប់អភិវឌ្ឍន៍សេដ្ឋកិច្ច-សង្គម តំបន់ជនរួមជាតិភាគតិច និងតំបន់ភ្នំ គឺជាភារកិច្ចនយោបាយដ៏សំខាន់ ដើម្បីបង្កើតការផ្លាស់ប្តូរយ៉ាងសកម្មលើគ្រប់វិស័យ និងស្ថេរភាពអំពីជីវភាពរស់នៅ ផ្នែកសម្ភារៈនិងស្មារតីរបស់បងប្អូនជនរួមជាតិ។

ក្រៅពីវិនិយោគហេដ្ឋារចនាសម្ព័ន្ធ ផែនការដំណាក់កាលទី II នៅទាំងវិនិយោគបណ្តុះបណ្តាលវិជ្ជាជីវៈ ដោះស្រាយការងារធ្វើសម្រាប់ពលករតំបន់ជនរួមជាតិទៀតផង។

យោងតាមផែនការនៃដំណាក់កាលទី II ត្រូវបានកសាងតាមទិសដៅប្រមូលផ្តុំ មានចំណុចសំខាន់ សមស្របតាមទម្រង់រដ្ឋអំណាចភូមិភាគ ២ ថ្នាក់។ បង្កើនការបែងចែកថ្នាក់ ឱ្យថ្នាក់ឃុំ ទន្ទឹមនឹងនោះគឺលើកកម្ពស់តួនាទីជាម្ចាស់របស់ប្រជាជន។ តម្រូវការទុនសរុបក្នុងដំណាក់កាលនេះ ប៉ាន់ស្មានប្រហែល ១.១៩០ ពាន់លានដុង។ ធនធានត្រូវបានផ្តល់អាទិភាពបែងចែកសម្រាប់បណ្តាឃុំជួបការលំបាកបំផុត ដោយប្រមូលផ្តុំដោះស្រាយរាល់តម្រូវការចាំបាច់ និងគម្រោងដែលមានលក្ខណៈសាយភាយយ៉ាងខ្ពស់។

ចំណុចសំខាន់នៃផែនការ គឺការវិនិយោគសុក្រឹត្យប្រព័ន្ធហេដ្ឋារចនាសម្ព័ន្ធយ៉ាងចាំបាច់ ជាពិសេសគឺចរាចរណ៍ សាលារៀន ដំណាក់សុខាភិបាល សំណង់ទឹកស្អាតសម្រាប់ប្រើប្រាស់ និងស្ថាប័នវប្បធម៌-កីឡា។ ខេត្តគ្រោងនឹងអនុវត្តសំណង់ហេដ្ឋារចនាសម្ព័ន្ធជាង ៣៩០ សំណង់។ រៀបចំដីលំនៅឋាន ផ្ទះសម្បែង និងទឹកស្អាតប្រើប្រាស់សម្រាប់គ្រួសារដែលនៅខ្វះខាត។ គោលដៅដល់ឆ្នាំ ២០៣០ នៅលើ ៨៥% នៃឃុំ ភូមិតំបន់ជនរួមជាតិភាគតិច មានហេដ្ឋារចនាសម្ព័ន្ធចាំបាច់គ្រប់គ្រាន់។ ប្រាក់ចំណូលមធ្យមរបស់ប្រជាជន សម្រេចបានជាង ២/៣ កម្រិតមធ្យមទូទាំងខេត្ត។ អត្រាក្រីក្រពហុសមាសភាគ ថយចុះជាមធ្យម ១-១,៥%/ឆ្នាំ និងលែងមានឃុំ ភូមិដែលជួបលំបាកពិសេសទៀតហើយ។

ទន្ទឹមនឹងការវិនិយោគហេដ្ឋារចនាសម្ព័ន្ធ ខេត្តជំរុញយ៉ាងខ្លាំងការអភិវឌ្ឍមុខរបរចិញ្ចឹមជីវិត ឧបត្ថម្ភការផលិត និងបង្វែរមុខរបរ។ គ្រោងនឹងអនុវត្តទម្រង់ផលិតមានប្រហែល ៣០០ ទម្រង់ ហើយមាន ៣៩ ទម្រង់ ផ្តើមអាជីវទៀតផង។ ពង្រីកការតភ្ជាប់ និងលក់ចេញផលិតផល ជំរុញការអភិវឌ្ឍបណ្តាផលិតផលប្រចាំតំបន់ ជាពិសេសផលិតផល OCOP នៅតាមតំបន់ជនរួមជាតិភាគតិច។

សកម្មភាពនៃការអភិវឌ្ឍប្រភពធនធានមនុស្ស ក៏ទទួលបានការយកចិត្តទុកដាក់ ដោយមានគោលដៅរៀបចំថ្នាក់បណ្តុះបណ្តាលវិជ្ជាជីវៈជាង ១២៥ ថ្នាក់ ថ្នាក់បំប៉នចំណេះដឹងសម្រាប់ជនជាតិ ២០ ថ្នាក់ ថ្នាក់លើកកម្ពស់សមត្ថភាពសម្រាប់កងជួរកម្មាភិបាល ៦០ ថ្នាក់។ ទន្ទឹមនឹងនោះ អនុវត្តសកម្មភាពថែទាំសុខភាព លើកកម្ពស់គុណភាពប្រជាជន បង្ការនិងទប់ស្កាត់ការរៀបអាពាហ៍ពិពាហ៍មុនវ័យ និងអាពាហ៍ពិពាហ៍ញាតិរួមលោហិត។

ជាមួយការអភិវឌ្ឍសេដ្ឋកិច្ច-សង្គម ខេត្ត Cà Mau នឹងបង្កើនរផ្សព្វផ្សាយ ជំរុញយ៉ាងសកម្មផនែកខាងឌីជីថល អនុវត្តបច្ចេកវិទ្យាក្នុងការគ្រប់គ្រងកម្មវិធី។ បង្កើតប្រព័ន្ធរាយការណ៍តាមប្រព័ន្ធអនឡាញ ពីថ្នាក់ឃុំរហូតដល់ថ្នាក់ខេត្តផងដែរ។

លោក Huỳnh Công Thiệu ប្រធានការិយាល័យជនជាតិ នៃមន្ទីរជនជាតិ និងសាសនាខេត្ត Cà Mau ឱ្យដឹង៖ "ទិសដៅក្នុងដំណាក់កាលខាងមុខ គឺការរួមបញ្ចូលគ្នានូវកម្មវិធីគោលដៅជាតិទាំង ៣ រួមមានដូចជា៖ កសាងជនបទថ្មី កាត់បន្ថយភាពក្រីក្រចីរភាព និងអភិវឌ្ឍន៍សេដ្ឋកិច្ច-សង្គមតំបន់ជនរួមជាតិភាគតិច។ ដើម្បីបន្តលើកកម្ពស់ប្រសិទ្ធភាពនៃសមាសភាគ “អភិវឌ្ឍន៍សេដ្ឋកិច្ច-សង្គមតំបន់ជនរួមជាតិភាគតិច” ខេត្តបានស្នើដល់មជ្ឈិម ឱ្យឆាប់ចេញផ្សាយក្របខ័ណ្ឌណែនាំ និងយន្តការហិរញ្ញវត្ថុពិសេស ឱ្យសមស្របនឹងទម្រង់រដ្ឋអំណាចភូមិភាគ ២ ថ្នាក់ បង្កលក្ខណៈងាយស្រួលដើម្បីភូមិភាគម្ចាស់ការ និងបត់បែនក្នុងការបែងចែក និងចាត់ចែងប្រភពទុន"។

ការវិនិយោគទឹកស្អាតសម្រាប់ប្រជាជនតំបន់ជនជាតិ ក៏ទទួលបានការយកចិត្តទុកដាក់អនុវត្តក្នុងដំណាក់កាល ២០២៦-២០៣០ ផងដែរ។

ទន្ទឹមនឹងនោះ ក៏តាមប្រសាសន៍លោក Huỳnh Công Thiệu ដែរ គឺចាំបាច់ត្រូវពិនិត្យកែសម្រួល ដំឡើងកម្រិតឧបត្ថម្ភចំពោះគោលនយោបាយស្តីពីដីលំនៅឋាន ផ្ទះសម្បែង ដីផលិត បង្វែរមុខរបរ ទឹកស្អាតសម្រាប់ប្រើប្រាស់ និងហេដ្ឋារចនាសម្ព័ន្ធចាំបាច់ឱ្យសមស្របនឹងស្ថានភាពជាក់ស្តែងនៅតំបន់ជនរួមជាតិភាគតិច ដែលជាកន្លែងចំណាយលើការវិនិយោគខ្ពស់ លក្ខណៈធម្មជាតិមានការជួបលំបាក។ ជាពិសេស ត្រូវអនុញ្ញាតឱ្យមានការសម្របសម្រួលដើមទុនយ៉ាងបត់បែន រវាងគម្រោង និងអនុគម្រោង ព្រមទាំងខ្លឹមសារសមាសភាគ ដើម្បីប្រើប្រាស់ប្រភពធនធានប្រសិទ្ធភាព។​

ដោយទិសដៅជាប្រចាំគឺ "វិនិយោគមានចំណុចសំខាន់ - ពង្រីកកម្លាំងផ្ទៃក្នុង - បែងចែកខ្លាំងក្លា - អនុវត្តឌីជីថល - ធានានូវចីរភាព" ខេត្ត Cà Mau បានសង្ឃឹមទុកថា ដល់ឆ្នាំ ២០៣០ ជីវភាពរបស់បងប្អូនជនរួមជាតិភាគតិច នឹងបានលើកកម្ពស់គ្រប់វិស័យ ហេដ្ឋារចនាសម្ព័ន្ធកាន់តែមានភាពសមកាលកម្ម មុខរបរចិញ្ចឹមជីវិតបានស្ថេរភាពជាងមុន បរិស្ថានវប្បធម៌-សង្គម ក៏បានកែលម្អយ៉ាងប្រសើរឡើងវិញ ហើយផែនមហាសាមគ្គីទូទាំងជនជាតិ នឹងបន្តបានពង្រឹងចីរភាពទៀតផង៕

Quỳnh Anh