ផ្តល់របរចិញ្ចឹមជីវិតដល់អ្នកទន់ខ្សោយ

ជំនួសឱ្យការឧបត្ថម្ភជាថវិកា ឬផ្តល់គ្រឿងឧបភោគបរិភោគតាមកាលកំណត់ដូចមុន ខេត្ត Cà Mau កំពុងបង្វែរទិសដៅមកផ្តល់របរចិញ្ចឹមជីវិត ឧបត្ថម្ភទម្រង់ផលិតកម្មសមស្របសម្រាប់គ្រួសារក្រ និងគ្រួសារទន់ខ្សោយ។ វិធីធ្វើនេះមិនត្រឹមតែជួយប្រជាជនម្ចាស់ការក្នុងការចិញ្ចឹមជីវិត ចាកផុតពីភាពក្រីក្រដោយចីរភាពប៉ុណ្ណោះទេ ថែមទាំងរួមចំណែកកសាងសង្គមអភិវឌ្ឍន៍ ដែលមនុស្សម្នាក់ៗសុទ្ធតែមានឱកាសឈានឡើងដោយកម្លាំងចិត្តផ្ទាល់ខ្លួន។

ឃុំ Phong Hiệp ឧបត្ថម្ភទម្រង់ចិញ្ចឹមជ្រូកពូជដល់អ្នកមីង Đinh Kim Hên។

អត់ងងុយ ២ យប់ដើម្បីធ្វើទ្រុងថ្មីឱ្យទាន់ទទួលកូនកញ្រ្ជោងននោងពូជ ៤ ក្បាល នោះគឺជាក្តីសប្បាយរីករាយយ៉ាងខ្លាំងរបស់លោក Quách Văn No (នៅភូមិលេខ ៩ A ឃុំ Phong Hiệp)។ គ្រួសារលោក No ស្ថិតក្នុងចំណោមគ្រួសារគ្មានដីផលិត ខ្លួនលោកផ្ទាល់ពិការដៃ មិនអាចធ្វើការងារធ្ងន់បាន។ ក្តីសុបិនចិញ្ចឹមកញ្រ្ជោងននោងមានតាំងពីយូរមកហើយ ប៉ុន្តែដោយសារខ្វះដើមទុន ទើបមិនអាចអនុវត្តបាន។ ពេលនេះទទួលបានការឧបត្ថម្ភកូនពូជ ប្តីប្រពន្ធលោកមិនអាចលាក់បាំងនូវក្តីរំភើបចិត្តបានឡើយ។

លោក Quách Văn No បានចែករំលែកថា៖ “ដោយសារចូលចិត្តទម្រង់ចិញ្ចឹមកញ្រ្ជោងននោង ខ្ញុំបានស្វែងយល់បច្ចេកទេសចិញ្ចឹមពីមុនមក ម្ល៉ោះហើយមានទំនុកចិត្តណាស់។ សូមអរគុណដល់រដ្ឋអំណាចភូមិភាគដែលបានបង្កលក្ខណៈងាយស្រួលដើម្បីគ្រួសារខ្ញុំម្ចាស់ការឈានឡើងក្នុងជីវភាពរស់នៅ”។

ក៏នៅភូមិលេខ ៩ A ដែរ សមាគមកសិករឃុំ Phong Hiệp ទើបតែផ្តល់គោពូជមួយគូដល់គ្រួសារអ្នកមីង Lê Thị Thu Nương យោងតាមកម្មវិធីទទួលជួយឧបត្ថម្ភ បង្កើតមុខរបរចិញ្ចឹមជីវិតសម្រាប់គ្រួសារក្រ គ្រួសារងាយរងគ្រោះ។ គ្មានដីផលិត ពីមុនមកប្តីប្រពន្ធអ្នកមីង Nương ត្រូវទៅរកស៊ីនៅស្រុកឆ្ងាយ។ ពេលសុខភាពចុះខ្សោយ អ្នកទាំងពីរត្រឡប់មកស្រុកវិញ គេជួលអ្វីគឺធ្វើហ្នឹង ជីវភាពរស់នៅបានមួយថ្ងៃមួយពេលប៉ុណ្ណោះ។ ពេលទទួលបានគោពូជមួយគូ ប្តីប្រពន្ធអ្នកមីងសប្បាយចិត្តឥតឧបមា។

“យើងខ្ញុំសង្ឃឹមថាគោឆាប់ធំ បង្កើតបានកូន ដើម្បីកើនប្រាក់ចំណលផង និងអាចពង្រីកហ្វូងគោក្នុងពេលខាងមុខផង” អ្នកមីង Nương រំភើបចិត្តនិយាយ។

ចំពោះអ្នកមីង Đinh Kim Hên (នៅភូមិលេខ ៩ A) អាយុជិត ៨០ ឆ្នាំ រស់នៅម្នាក់ឯងក្នុងផ្ទះតូចមួយ ប្រភពរស់នៅកន្លងពឹងផ្អែកជាសំខាន់លើប្រាក់ឧបត្ថម្ភ។ ដោយឃើញថាសុខភាពគាត់នៅរឹងប៉ឹង និងមានបំណងចង់ចិញ្ចឹមសត្វដើម្បីបង្កើនប្រាក់ចំណូល សមាគមអតីតយុទ្ធជនឃុំ Phong Hiệp បានទទួលជួយឧបត្ថម្ភទម្រង់ចិញ្ចឹមជ្រូកដល់គាត់។ មិនត្រឹមតែប៉ុណ្ណោះ សមាគមនៅទាំងចលនាសាច់ញាតិ អ្នកជិតខាង ជួយគាត់ថែទាំហ្វូងជ្រូកជារៀងរាល់ថ្ងៃ។

អ្នកមីង Hên សម្តែងអារម្មណ៍ថា៖ “ចំពោះខ្ញុំ នេះមិនត្រឹមតែជាទម្រង់អភិវឌ្ឍន៍សេដ្ឋកិច្ចប៉ុណ្ណោះទេ តែនៅជាក្តីស្រឡាញ់ ការជួយទំនុកបម្រុង ថែទាំរបស់បក្ស រដ្ឋ និងរដ្ឋអំនាចភូមិភាគ ព្រមទាំងអ្នកភូមិផងរបងជាមួយផងដែរ”។

សមមិត្ត Đào Thanh Phong លេខាគណៈកម្មាធិការបក្សឃុំ Phong Hiệp បានឱ្យដឹងថា៖ "អនុវត្តគម្រោងលេខ ០៦ របស់គណៈកម្មាធិការប្រជាជនខេត្ត ស្តីពីការគាំទ្ររបរចិញ្ចឹមជីវិតសម្រាប់គ្រួសារគោលនយោបាយ គ្រួសារក្រីក្រ ជិតក្រ និងជនរួមជាតិភាគតិច ក្រោយពីទទួលប្រភពទុនពីមូលនិធិសុខុមាលភាពសង្គម គណៈកម្មាធិការបក្សឃុំបានដឹកនាំបណ្តាអង្គការនយោបាយ-សង្គម ឱ្យចុះស្រាវជ្រាវតម្រូវការជាបន្ទាន់ តភ្ជាប់ជាមួយអង្គភាពផ្គត់ផ្គង់ ដើម្បីអនុវត្តបណ្តាទម្រង់សមស្រប។ តាមនោះ បានពិនិត្យឧបត្ថម្ភគ្រួសារងាយរងគ្រោះចំនួន ២៤ គ្រួសារ"។

លោក Phạm Phi Định អនុប្រធានគណៈកម្មាធិការរណសិរ្សមាតុភូមិ Việt Nam ឃុំ Phong Hiệp និងជាប្រធានសមាគមកសិករឃុំ (ស្តាំ) ឧបត្ថម្ភដើមទុនសម្រាប់ចិញ្ចឹមគោដល់គ្រួសារអ្នកមីង Lê Thị Thu Nương។

ក្នុងនោះ សមាគមអតីតយុទ្ធជនឃុំឧបត្ថម្ភគម្រោងចិញ្ចឹមកញ្រ្ជោងននោង ១ គម្រោងចិញ្ចឹមគោ ២ គម្រោងចិញ្ចឹមជ្រូក ១ សម្រាប់ ១១ គ្រួសារ សរុបថវិកា ៣៣០ លានដុង។ សមាគមនារីឃុំឧបត្ថម្ភគម្រោងចិញ្ចឹមគោ ១ គម្រោងចិញ្ចឹមជ្រូក ២ សម្រាប់ ៩ គ្រួសារ ដោយទឹកប្រាក់ ២៧០ លានដុង។ សមាគមកសិករឃុំឧបត្ថម្ភគម្រោងចិញ្ចឹមគោសម្រាប់ ៤ គ្រួសារ សរុបថវិកា ១២០ លានដុង។

ប្រភពកូនពូជបានប្រគល់ជូនផ្ទាល់ដល់គ្រួសារនីមួយៗ។ ទន្ទឹមនឹងនោះ កម្មាភិបាលឃុំសហការជាមួយអង្គភាពផ្គត់ផ្គង់ ណែនាំបច្ចេកទេសចិញ្ចឹម តាមដានជាប្រចាំ ជួយដោះស្រាយទាន់ពេលវេលានូវបញ្ហាដែលកើតឡើង ដើម្បីឱ្យទម្រង់នេះមានប្រសិទ្ធភាព។

ការផ្តល់របរចិញ្ចឹមជីវិតដល់អ្នកទន់ខ្សោយ គឺជាសកម្មភាពដែលមានអត្ថន័យមនុស្សធម៌យ៉ាងជ្រាលជ្រៅ បង្ហាញពីស្មារតី “មិនទុកឱ្យនរណាម្នាក់ត្រូវនៅពីក្រោយ”។ ទម្រង់ដែលសមស្របមិនត្រឹមតែជួយប្រជាជនចិញ្ចឹមខ្លួនឯងប៉ុណ្ណោះទេ ថែមទាំងផ្តល់ជំនឿចិត្ត កម្លាំងចលករ ដើម្បីពួកគេបោះជំហានយ៉ាងរឹងមាំ ឈានឡើងក្នុងជីវិត។

Thiên Hương - Nguyễn Linh