ជំរុញសមភាពភេទផ្តើមពីមូលដ្ឋាន

កន្លងមក ខេត្ត Cà Mau បានពង្រាយសកម្មភាពផ្សព្វផ្សាយជាច្រើន ដើម្បីលើកកម្ពស់ការយល់ដឹងរបស់សហគមន៍អំពីសមភាពភេទ ការបង្ការ និងប្រយុទ្ធប្រឆាំងអំពើហិង្សានៅលើមូលដ្ឋានភេទ និងការពារកុមារ។ លេចធ្លោក្នុងនោះគឺ សកម្មភាពនៃគម្រោងទី ៨ - “អនុវត្តសមភាពភេទ និងដោះស្រាយបញ្ហាចាំបាច់ចំពោះនារី និងកុមារ” ចំណុះកម្មវិធីគោលដៅជាតិអភិវឌ្ឍន៍សេដ្ឋកិច្ច-សង្គមតំបន់ជនជាតិភាគតិច និងតំបន់ភ្នំ ដំណាក់កាលទី ១ (២០២១-២០២៥) បានបង្កើតជាកម្លាំងរីកសាយភាយជាវិជ្ជមានតាំងពីមូលដ្ឋានផងដែរ។

ការសម្តែងជាឈុតឆាកល្ខោន ជួយផ្សព្វផ្សាយចំណេះដឹងសមភាពភេទ បានយ៉ាងរស់រវើក និងបង្កើតការសន្ទនាជាមួយសហគមន៍។

ក្នុងតួនាទីជាស្នូលអនុវត្តគម្រោងទី ៨ សមាគមសហព័ន្ធនារីខេត្ត Cà Mau បានរៀបចំព្រឹត្តិការណ៍ផ្សព្វផ្សាយជាច្រើន ដោយទម្រង់យ៉ាងសម្បូរបែប និងជិតស្និទ្ធដូចជា៖ ការប្រឡងស្វែងយល់ចំណេះដឹងខាងច្បាប់។ សម្តែងជាឈុតឆាកល្ខោនខ្លីអំពីសមភាពភេទ។ ការបង្ការ ប្រឆាំងអំពើហិង្សាក្នុងគ្រួសារ និងការរំលោភបំពានកុមារ។ ខ្លឹមសារសកម្មភាពត្រូវបានកសាងឡើងយ៉ាងរស់រវើក ផ្សារភ្ជាប់នឹងស្ថានភាពជាក់ស្តែងក្នុងជីវភាពប្រចាំថ្ងៃ ជួយប្រជាជនងាយស្រួលទទួលយក ងាយចងចាំ និងម្ចាស់ការអនុវត្តក្នុងជាក់ស្តែង។

ចូលរួមព្រឹត្តិការណ៍ផ្សព្វផ្សាយនៅមូលដ្ឋាន បងស្រី Sơn Ngọc Lành ភូមិលេខ ៤ ឃុំ Trần Văn Thời បានចែករំលែកថា៖ “ពេលចូលរួមបណ្តាវគ្គផ្សព្វផ្សាយ ខ្ញុំយល់ច្បាស់ជាងអំពីទំនួលខុសត្រូវរបស់ខ្លួនក្នុងការការពារកូនចៅ និងខ្លួនឯងផ្ទាល់។ ចំណេះដឹងទាំងនេះពិតជាមានសារសំខាន់ និងចាំបាច់ចំពោះនារីនៅជនបទដូចជារូបនាងខ្ញុំ”។

មិនត្រឹមតែបញ្ឈប់ត្រឹមការផ្សព្វផ្សាយចំណេះដឹងប៉ុណ្ណោះទេ ព្រឹត្តិការណ៍ផ្សព្វផ្សាយនានានៅជាឱកាសដើម្បីជួបប្រាស្រ័យ ចែករំលែក និងរៀនសូត្របទពិសោធន៍រវាងក្រុមគោលដៅក្នុងសហគមន៍ដូចជា៖ របៀបប្រព្រឹត្តក្នុងគ្រួសារ បំណិនបង្ការ និងប្រឆាំងអំពើហិង្សា បញ្ហាដែលតែងតែជួបប្រទះនៅមូលដ្ឋាន។ល។

បង Lý Thương នៅសង្កាត់ An Xuyên ខេត្ត Cà Mau បានឱ្យដឹង៖ “នេះជាលើកទីមួយហើយដែលខ្ញុំបានចូលរួមដោយផ្ទាល់ក្នុងការប្រឡង និងសម្តែងរឿងខ្លីអំពីសមភាពភេទ។ ឆ្លងកាត់ដំណើរការត្រៀម និងប្រឡង ខ្ញុំយល់បន្ថែមនូវបទបញ្ញត្តិច្បាប់ជាច្រើន ទន្ទឹមនឹងនោះ យល់ច្បាស់ជាងអំពីតួនាទី ទំនួលខុសត្រូវរបស់បុរសក្នុងការចែករំលែកការងារផ្ទះ គោរព ការពារនារី និងកុមារ”។

លោកស្រី Tô Thị Mỹ Thuận អនុប្រធានសមាគមនារីខេត្ត Cà Mau បានឱ្យដឹង៖ “យើងខ្ញុំផ្តល់អាទិភាពចំពោះទម្រង់ផ្សព្វផ្សាយដែលងាយស្រួលទទួលយក បង្កើតឱ្យមានការសន្ទនាគ្នា ដើម្បីប្រជាជនមិនត្រឹមតែស្តាប់ប៉ុណ្ណោះទេ តែថែមទាំងបានផ្លាស់ប្តូរយោបល់ និងចែករំលែកជាមួយគ្នា។ គម្រោងទី ៨ មិនបញ្ឈប់ត្រឹមការផ្សព្វផ្សាយចំណេះដឹងនោះទេ តែគឺឆ្ពោះទៅការផ្លាស់ប្តូរអាកប្បកិរិយា កសាងសហគមន៍សុវត្ថិភាព មិត្តភាពចំពោះនារី និងកុមារ”។

បង Lý Thương ចូលរួមព្រឹត្តិការណ៍ផ្សព្វផ្សាយ ស្វែងយល់ពីចំណេះដឹងខាងសមភាពភេទ។

អាស្រ័យហេតុនោះ មូលដ្ឋានមួយចំនួនបានកត់ត្រាចំនួនករណីហិង្សាក្នុងគ្រួសារមានការថយចុះ។ ប្រជាជនមានភាពម្ចាស់ការជាងមុនក្នុងការប្តឹងផ្តល់ ស្វែងរកមកកាន់ “អាសយដ្ឋានទំនុកចិត្ត” ដើម្បីបានប្រឹក្សា និងឧបត្ថម្ភពេលចាំបាច់។

សមមិត្ត Biện Thanh Lâm អនុលេខាអចិន្ត្រៃយ៍គណៈបក្សឃុំ Lương Thế Trân ទទួលស្គាល់ថា៖ “បណ្តាសកម្មភាពផ្សព្វផ្សាយរបស់គម្រោងទី ៨ បានរួមចំណែកយ៉ាងសំខាន់ក្នុងការកាត់បន្ថយស្ថានភាពហិង្សាក្នុងគ្រួសារ លើកកម្ពស់ស្មារតីការពារកុមារ។ ពេលខាងមុខ មូលដ្ឋាននឹងបន្តរក្សា និងពង្រីកបណ្តាលំនាំដែលប្រកបដោយប្រសិទ្ធភាព”។

ពេលខាងមុខ សមាគមនារីខេត្ត Cà Mau នឹងបន្តជំរុញខ្លាំងការអនុវត្តបច្ចេកវិទ្យាព័ត៌មាន ពង្រីកប្រសិទ្ធភាពបណ្តាថ្នាលបណ្តាញសង្គម ដើម្បីផ្សព្វផ្សាយឲ្យបានទូលំទូលាយនូវសារអំពីសមភាពភេទ ការបង្ការ និងប្រឆាំងអំពើហិង្សានៅលើមូលដ្ឋានភេទ ទៅដល់គ្រប់គ្រួសារ៕

Cẩm Nhi