ផ្ញើក្តីសង្ឃឹមលើការបោះឆ្នោត

ការបោះឆ្នោតជ្រើសតាំងសមាជិករដ្ឋសភានីតិកាលទី XVI និងសមាជិកក្រុមប្រឹក្សាប្រជាជនគ្រប់លំដាប់ថ្នាក់ អាណត្តិ ២០២៦-២០៣១ គឺជាព្រឹត្តិការណ៍នយោបាយដ៏សំខាន់របស់ប្រទេសជាតិ និងភូមិភាគតាំងឡាយផងដែរ។ រួមជាមួយអ្នកបោះឆ្នោតទូទាំងប្រទេស បុគ្គលមានកេរ្តិ៍ឈ្មោះ និងបងប្អូនជនជាតិ Khmer នៅ Cà Mau កំពុងឆ្ពោះទៅកាន់ថ្ងៃបោះឆ្នោតដោយក្តីជឿជាក់យ៉ាងមុតមាំ ព្រមទាំងបង្ហាញពីការទទួលខុសត្រូវតាមរយៈការម្ចាស់ការស្វែងយល់ព័ត៌មានបេក្ខជន ដើម្បីត្រៀមលក្ខណៈអនុវត្តសិទ្ធិជាម្ចាស់របស់ខ្លួន។

ការបិទផ្សាយបញ្ជីឈ្មោះបេក្ខជនសមាជិករដ្ឋសភា និងសមាជិកក្រុមប្រឹក្សាប្រជាជនគ្រប់លំដាប់ថ្នាក់ នៅមណ្ឌលបោះឆ្នោតលេខ ៣ ភូមិ Đầu Sấu (ភូមិក្បាលក្រពើ) ឃុំ Hồng Dân។

ថ្ងៃបោះឆ្នោត ១៥ មីនា កាន់តែខិតជិតមកដល់ហើយ។ នៅឃុំ Hồng Dân ការងារត្រៀមរៀបចំត្រូវបានអនុវត្តយ៉ាងមមាញឹក និងម៉ឺងម៉ាត់ផងដែរ។ គណៈកម្មាធិការអចិន្ត្រៃយ៍នៃរណសិរ្សមាតុភូមិ Việt Nam ឃុំ Hồng Dân បានកសាងផែនការរៀបចំសន្និសីទជួបសម្តែងការជាមួយអ្នកបោះឆ្នោត បង្កលក្ខណៈងាយស្រួលឱ្យបេក្ខជនសមាជិករដ្ឋសភា និងក្រុមប្រឹក្សាប្រជាជនគ្រប់លំដាប់ថ្នាក់បានជួបជុំគ្នា និងបង្ហាញអំពីកម្មវិធីសកម្មភាព ព្រមទាំងស្តាប់នូវមតិយោបល់ និងបំណងប្រាថ្នារបស់ប្រជាជន។ រាល់កិច្ចប្រជុំត្រូវបានរៀបចំឡើងដោយធានានូវលទ្ធិប្រជាធិបតេយ្យ ត្រឹមត្រូវតាមច្បាប់ និងទាក់ទាញអ្នកបោះឆ្នោតចូលរួមមតិយ៉ាងច្រើនកុះករផងដែរ។

ឃុំ Hồng Dân បានបង្កើតមណ្ឌលបោះឆ្នោតចំនួន ៨ កន្លែង ហើយសម្រាប់នីតិវិធីពិគ្រោះយោបល់ក្នុងការជ្រើសរើស និងណែនាំបុគ្គលិកត្រូវបានអនុវត្តដោយចំហ និងតម្លាភាព។ ពីបញ្ជីឈ្មោះបេក្ខជនចំនួន ៤២ រូប អ្នកបោះឆ្នោតនឹងជ្រើសរើសតំណាងចំនួន ២៥ រូប ដែលមានលក្ខណៈសម្បត្តិគ្រប់គ្រាន់ សមត្ថភាព និងសីលធម៌ ដើម្បីតំណាងឱ្យឆន្ទៈ និងបំណងប្រាថ្នារបស់ប្រជាជន។

តាមរយៈការឃោសនាផ្សព្វផ្សាយ និងចលនារបស់រដ្ឋអំណាចភូមិភាគ ព្រមទាំងបុគ្គលឆ្នើម បងប្អូនជនរួមជាតិ Khmer លើភូមិសាស្ត្រឃុំ Hồng Dân បានចាត់ទុកថ្ងៃបោះឆ្នោតគឺជាថ្ងៃបុណ្យដ៏ធំ ព្រមទាំងផ្ញើក្តីជឿជាក់ទាំងស្រុងលើអ្នកតំណាងដែលមានគុណធម៌ និងសមត្ថភាព។

លោក Danh Vinh នៅភូមិ Đầu Sấu Đông (ភូមិក្បាលក្រពើ) បានចែករំលែកថា៖ “ប្រធានភូមិ និងព្រះចៅអធិការវត្ត Khmer ក្នុងភូមិភាគ តែងឃោសនាផ្សព្វផ្សាយ និងចលនាឱ្យប្រជាជនយើងខ្ញុំចូលរួមអនុវត្តសិទ្ធិ និងកាតព្វកិច្ចឱ្យបានពេញលេញនៅថ្ងៃទី ១៥ខែ មីនាខាងមុខនេះ។ យើងខ្ញុំសង្ឃឹមថា តាមរយៈសន្លឹកឆ្នោតរបស់ខ្លួន នឹងជ្រើសរើសបានបុគ្គលដែលសមស្រប រួមចំណែកកសាងភូមិភាគឱ្យកាន់តែរីកចម្រើន”។

នៅវត្តក្បាលក្រពើ ខ្លឹមសារឃោសនាផ្សព្វផ្សាយអំពីការបោះឆ្នោតត្រូវបានបញ្ចូលក្នុងកម្មវិធីផ្សេងៗនៃសកម្មភាពសាសនាផងដែរ។ ព្រះសង្ឃដែលជាបុគ្គលឆ្នើមក្នុងសហគមន៍ខ្មែរ មានតួនាទីជាស្នូលសម្រាប់ក្នុងការឃោសនាផ្សព្វផ្សាយ ជួយឱ្យបងប្អូនកាន់តែយល់បានច្បាស់អំពីសិទ្ធិ និងការទទួលខុសត្រូវរបស់អ្នកបោះឆ្នោត និងចូលរួមបោះឆ្នោតយ៉ាងល្អត្រឹមត្រូវទៀតផង។

អ្នកបោះឆ្នោតជនជាតិភាគតិចនៅឃុំ Hồng Dân ស្វែងយល់ពីប្រវត្តិរូបសង្ខេប និងកម្មវិធីសកម្មភាពរបស់បេក្ខជនអ្នកឈរឆ្នោត។

ព្រះតេជព្រះគុណ Trần Thoảng ព្រះចៅអធិការវត្តក្បាលក្រពើ (Đầu Sấu) មានសង្ឃដីកាថា៖ “ក្រៅពីការខិតខំឃោសនាផ្សព្វផ្សាយដល់មាមីងប្រជាពុទ្ធបរិស័ទ យើងខ្ញុំសង្ឃឹមថាអ្នកតំណាងដែលបានជាប់ឆ្នោតនឹងខិតខំបំពេញតួនាទីរបស់ខ្លួនឱ្យបានល្អ រួមទាំងការយកចិត្តទុកដាក់វិនិយោគលើហេដ្ឋារចនាសម្ព័ន្ធ និងចរាចរណ៍នៅតាមតំបន់ជនជាតិភាគតិច  ព្រមទាំងជំនយយឧបត្ថម្ភ និងណែនាំបងប្អូនឱ្យពង្រីកវិស័យសេដ្ឋកិច្ច បង្កើនកម្លាំងសាមគ្គីរវាងបណ្តាជនជាតិក្នុងការកសាងស្រុកកំណើត និងប្រទេសជាតិ”។

ស្មារតីឆ្ពោះទៅកាន់ការបោះឆ្នោតកំពុងរីកសាយភាយយ៉ាងសកម្មក្នុងសហគមន៍បណ្តាជនជាតិ និងសាសនានៅលើភូមិសាស្ត្រខេត្ត។ ការរួមដំណើរយ៉ាងសកម្មនោះ បានរួមចំណែកពូនផ្តុំនូវទំនុកចិត្ត និងលើកកម្ពស់ស្មារតីទទួលខុសត្រូវក្នុងនាមជាប្រជាពលរដ្ឋ បង្កើតបរិយាកាសអបអរសាទរយ៉ាងអធិកអធមសម្រាប់ថ្ងៃបុណ្យរបស់ប្រជាជនទាំងមូលដែលកំពុងឈានជិតចូលមកដល់។

Thanh Hải - Hoàng Đăng