ព្រួតដៃដើម្បីទិវាបុណ្យរបស់ប្រទេសជាតិ

អមជាមួយបរិយាកាសដ៏ឱឡារឹក និងសប្បាយរីករាយរបស់អ្នកបោះឆ្នោតទូទាំងប្រទេស សហគមន៍ជនជាតិភាគតិចនៅខេត្ត Cà Mau កំពុងទន្ទឹងរង់ចាំការបោះឆ្នោតជ្រើសរើសតំណាងរដ្ឋសភា និងក្រុមប្រឹក្សាប្រជាជនគ្រប់លំដាប់ថ្នាក់សម្រាប់អាណត្តិឆ្នាំ ២០២៦-២០៣១។ អាស្រ័យការជំរុញខ្លាំងខ្លាសកម្មភាពផ្សព្វផ្សាយដោយច្រើនទម្រង់ដ៏រសរវើកផងនោះ បងប្អូនប្រជាជនក៏យល់យ៉ាងច្បាស់អំពីសិទ្ធិ និងកាតព្វកិច្ចរបស់ខ្លួនជាប្រជាពលរដ្ឋ ព្រមទាំងត្រៀមខ្លួនរួចជាស្រេចដើម្បីចូលរួមថ្ងៃបុណ្យទូទាំងប្រជាជន។

អ្នកបោះឆ្នោតឃុំ Ninh Quới ស្វែងយល់ពីជីវប្រវត្តិសង្ខេបរបស់អ្នកឈរឆ្នោតតំណាងរដ្ឋសភា និងក្រុមប្រឹក្សាប្រជាជនគ្រប់លំដាប់ថ្នាក់។

ដែលជាតំបន់មានជនរួមជាតិ Khmer រស់នៅច្រើន តាំងពីដំណាក់កាលដំណាក់កាលរៀបចំបោះឆ្នោត ឃុំ Ninh Quới បានម្ចាស់ការអនុវត្តឃោសនាយ៉ាងច្រើនសកម្មភាព ព្រមទាំងផ្សព្វផ្សាយអំពីច្បាប់យ៉ាងទូលំទូលាយទៀតផង ដើម្បីជួយមាមីងបងប្អូនក្តាប់បានច្បាស់អំពីបទប្បញ្ញត្តិក្នុងការបោះឆ្នោត និងយល់ច្បាស់ពីអត្ថន័យនៃសន្លឹកឆ្នោតនីមួយៗផងដែរ ផ្តើមពីនោះក៏លើកកម្ពស់ការទទួលខុសត្រូវរបស់ប្រជាពលរដ្ឋ និងធានាថ្ងៃបោះឆ្នោតជាតិប្រព្រឹត្តទៅដោយស្របច្បាប់ និងមានអត្ថន័យយ៉ាងពិតប្រាកដ។

លោក Lê Văn Đẳng អនុប្រធានគណៈកម្មាធិការប្រជាជនឃុំ Ninh Quới បានឱ្យដឹង៖ “ឃុំបានអនុវត្តការឃោសនាតាមរយៈទម្រង់ផ្សេងៗដូចជា៖ ព្យួរបដា និងផ្ទាំងរូបភាព បោះពុម្ពផ្សាយ និងផ្សព្វផ្សាយព័ត៌មានបោះឆ្នោតនៅលើបណ្តាញប្រព័ន្ធផ្សព្វផ្សាយ ឧបករណ៍បំពងសម្លេងចល័ត។ល។ ជាពិសេស ឃុំបានប្រមូលផ្តុំកម្មាភិបាលភូមិ និងអ្នកមានកិត្យានុភាពក្នុងជនរួមជាតិភាគតិចចូលរួមឃោសនាផ្សព្វផ្សាយ ដើម្បីឱ្យប្រជាជនអាចទទួលបានព័ត៌មានយ៉ាងងាយស្រួល”។

នៅឃុំ U Minh ក្រៅពីការឃោសនាដែលបានឃើញដោយផ្ទាល់ភ្នែក ភូមិភាគថែមទាំងបានសហការជាមួយនឹងកងទ័ពការពារព្រំដែន និងអ្នកមានកិត្យានុភាពក្នុងជនរួមជាតិអនុវត្តកិច្ចការនេះ។

ក្នុងនាមជាអ្នកមានកិត្យានុភាពរបស់ភូមិលេខ ៣ ឃុំ U Minh លោក Danh A បានក្លាយជា “ស្ពានតភ្ជាប់” ដើម្បីនាំយកព័ត៌មានលម្អិតស្តីពីការបោះឆ្នោតទៅកាន់បងប្អូនប្រជាជន។ ខ្លួនលោកផ្ទាល់ រួមជាមួយគណៈកម្មាធិការទទួលបន្ទុកកិច្ចការភូមិ និងកម្មាភិបាលកងទ័ពការពារព្រំដែនតែង “អញ្ជើញទៅតាមច្រកល្ហក និងផ្ទះនីមួយៗ” ដើម្បីផ្សព្វផ្សាយពីច្បាប់នៃការបោះឆ្នោត។ យោងតាមលោក ការបោះឆ្នោតជ្រើសរើសតំណាងរដ្ឋសភា និងក្រុមប្រឹក្សាប្រជាជនគ្រប់លំដាប់ថ្នាក់នេះគឺមានសារៈសំខាន់ខ្លាំងណាស់ ដូច្នេះវាចាំបាច់ក្នុងការជំនួយបងប្អូនប្រជាជនឱ្យយល់ព័ត៌មានបានច្បាស់លាស់ ដើម្បីឱ្យពួកគេអាចជ្រើសរើសមនុស្សដែលមានគុណធម៌ និងទេពកោសល្យ ដើម្បីតំណាងឱ្យឆន្ទៈ និងសេចក្តីប្រាថ្នារបស់ប្រជាជន។

អាស្រ័យការឃោសនាផ្សព្វផ្សាយយ៉ាងទូលំទូលាយ ស្មារតីទទួលខុសត្រូវរបស់អ្នកបោះឆ្នោតដែលជាជនជាតិភាគតិចក៏មានភាពប្រសើរឡើង។ ប្រជាជនមិនត្រឹមតែចូលរួមក្នុងកិច្ចប្រជុំផ្សព្វផ្សាយអ្នកបោះឆ្នោតប៉ុណ្ណោះទេ ថែមទាំងស្វែងរកព័ត៌មានលម្អិតអំពីបេក្ខជនដោយសកម្មផងដែរ។

លោក Danh Phuôl នៅភូមិ Phú Tân ឃុំ Ninh Quới បានសម្តែងពីក្តីសង្ឃឹមរបស់ខ្លួនថា៖ “ខ្ញុំសង្ឃឹមថានឹងជ្រើសរើសតំណាងដែលមានសមត្ថភាព មានចិត្តលះបង់ដើម្បីគិតគូរជីវភាពរស់នៅជូនប្រជាជន ជាពិសេសអ្នកដែលវិនិយោគខាងហេដ្ឋារចនាសម្ព័ន្ធ និងការដឹកជញ្ជូនជនបទ ដោយបង្កលក្ខណៈអំណោយផលសម្រាប់ការធ្វើដំណើរ និងជួញដូររបស់បងប្អូនប្រជាជននៅភូមិភាគ”។

កម្មាភិបាលឃុំ U Minh សហការជាមួយកងទ័ពការពារព្រំដែន​ និងអ្នកមានកិត្យានុភាពក្នុងជនរួមជាតិភាគតិចផ្សព្វផ្សាយព័ត៌មានលម្អិតស្តពីការបោះឆ្នោតជូនដល់ប្រជាជន។

បង Lâm Quốc Tịch នៅភូមិលេខ ៣ ឃុំ U Minh ឱ្យដឹង៖ “ប៉ុន្មានថ្ងៃកន្លងមកនេះ ខ្ញុំបានស្តាប់ព័ត៌មានបោះឆ្នោតតាមឧបករណ៍បំពងសម្លេង និងបានទទួលការណែនាំអំពីកម្មាភិបាលភូមិភាគនៅផ្ទះរបស់ខ្លួន ដូច្នេះខ្ញុំក៏យល់ពីសារៈសំខាន់នៃការបោះឆ្នោតផងដែរ”។ “នៅថ្ងៃទី ១៥ ខែមីនា ខ្ញុំរួមជាមួយក្រុមគ្រួសារនឹងទៅបោះឆ្នោតដើម្បីជ្រើសរើសបុគ្គលដែលសក្តិសមពិតប្រាកដ”។

ដោយមានការឯកភាពគ្នា និងស្មារតីទទួលខុសត្រូវខ្ពស់ អ្នកបោះឆ្នោតជាជនជាតិភាគតិចនៅខេត្ត Cà Mau បានត្រៀមខ្លួនរួចជាស្រេចដើម្បីចូលរួមបោះឆ្នោត រួមចំណែកធ្វើឱ្យថ្ងៃបោះឆ្នោតក្លាយជាទីវាបុណ្យដែលប្រកបដោយទំនុកចិត្ត ជាទីតាំងដែលគ្រប់សន្លឹកឆ្នោតនីមួយៗបញ្ជាក់ពីកម្លាំងនៃការសាមគ្គីទូទាំងជនជាតិលើមាគ៌ាឆ្ពោះទៅរកការអភិវឌ្ឍថ្មី៕

Thuỳ Liên - Duy Phong