គោលនយោបាយដើម្បីជំរុញឆន្ទៈក្នុងការឈានរឡើង

ឈានចូលដំណាក់កាលថ្មី សកម្មភាពនៃកិច្ចការងារជន ត្រូវបានខេត្ត Cà Mau កំណត់ថាជាភារកិច្ចដ៏សំខាន់មួយ ក្នុងគោលបំណងដើម្បីធានាថាប្រជាពលរដ្ឋគ្រប់រូបនឹងទទួលបានអត្ថប្រយោជន៍ពីផ្លែផ្កានៃការអភិវឌ្ឍ។ ដើម្បីសម្រេចបាននូវគោលដៅនេះ គណៈកម្មាធិការប្រជាជនខេត្តបានចេញផែនការលេខ ០២៦២ ចុះថ្ងៃទី ២៩ ធ្នូ ឆ្នាំ២០២៥ ដើម្បីអនុវត្តយុទ្ធសាស្ត្រសម្រាប់កិច្ចការងារជនជាតិក្នុងដំណាក់កាល ២០២១-២០៣០ ជាមួយនឹងចក្ខុវិស័យដល់ឆ្នាំ ២០៤៥។ នេះគឺជាទិសដៅដ៏សំខាន់មួយដើម្បីបង្កើនការអភិវឌ្ឍដ៏ទូលំទូលាយសម្រាប់តំបន់ជនជាតិភាគតិច។

ទម្រង់ចិញ្ចឹមសត្វរបស់បង Phan Văn Hoá នៅភូមិលេខ ១០ ឃុំ Khánh Lâm ជាសាក្សីមួយបញ្ជាក់ពីប្រសិទ្ធភាពនៃគោលនយោបាយឧបត្ថម្ភបងប្អូនជនរួមជាតិភាគតិចអភិវឌ្ឍសេដ្ឋកិច្ច បង្កើនប្រភពប្រាក់ចំណូល និងមានជីវភាពនឹងនរ។

ផែនការលេខ ០២៦២ ក្នុងគោលបំណងកាត់បន្ថយភាពក្រីក្រប្រកបដោយចីរភាព និងការអភិវឌ្ឍដ៏ទូលំទូលាយនៃតំបន់ជនជាតិភាគតិច។ ដល់ឆ្នាំ២០៣០ ប្រាក់ចំណូលជាមធ្យមនឹងឈានដល់ប្រហែល ២/៣ នៃមធ្យមភាគរបស់ខេត្ត អត្រាភាពក្រីក្រនឹងស្ថិតនៅក្រោម ២% នឹងលែងមានឃុំ ឬភូមិលំបាកខ្លាំង និងមាន ១០០% ឃុំ សង្កាត់សម្រេចស្តង់ដារជនបទថ្មី។ ដល់ឆ្នាំ២០៤៥ គោលដៅគឺដើម្បីសម្រេចបានប្រាក់ចំណូលជាមធ្យមចាប់ពី ៨៥% ឬច្រើនជាងនេះនៃមធ្យមភាគរបស់ខេត្ត លុបបំបាត់ភាពក្រីក្រក្នុងគ្រួសារជនជាតិភាគតិច និងធានាថាប្រជាជនមានសិទ្ធិទទួលបានសេវាកម្មចាំបាច់យ៉ាងពេញលេញ និងហេដ្ឋារចនាសម្ព័ន្ធដែលមានការអភិវឌ្ឍយ៉ាងទូលំទូលាយទៀតផង។

ដើម្បីអនុវត្តផែនការលេខ ០២៦២ នៅថ្ងៃទី ២២ កុម្ភៈ ឆ្នាំ២០២៦ គណៈកម្មាធិការប្រជាជនឃុំ Hưng Mỹ បានចេញផែនការលេខ ៣៣ ដែលមានគោលបំណងធ្វើឱ្យគោលដៅអភិវឌ្ឍន៍សម្រាប់តំបន់ជនជាតិភាគតិចមានលក្ខណៈជាក់ស្តែងស្របតាមលក្ខណៈក្នុងស្រុក។ ផែនការនេះបានផ្តោតលើភារកិច្ចដូចជាការកាត់បន្ថយភាពក្រីក្រប្រកបដោយចីរភាព អភិវឌ្ឍជីវភាពរស់នៅ បណ្តុះបណ្តាលវិជ្ជាជីវៈ ថែទាំសុខភាព និងការអភិរក្សអត្តសញ្ញាណវប្បធម៌ Khmer ព្រមទាំងការរួមបញ្ចូលជាមួយការអភិវឌ្ឍជនបទថ្មី និងការផ្លាស់ប្តូរឌីជីថល។ ដល់ឆ្នាំ ឆ្នាំ២០៣០ ឃុំនឹងខិតខំលុបបំបាត់ភាពក្រីក្រក្នុងគ្រួសារជនជាតិភាគតិច។ ប្រាក់ចំណូលរបស់បងប្អូនជនរួមជាតិនឹងឈានដល់ប្រហែល ២/៣ នៃមធ្យមភាគរបស់ខេត្ត។ ជាង ៦០% ពលករទទួលបានការបណ្តុះបណ្តាលវិជ្ជាជីវៈ។ ជាង ៨០% គ្រួសារបានអនុវត្តវឌ្ឍនភាពវិទ្យាសាស្ត្រ និងបច្ចេកវិទ្យាចូលក្នុងផលិតកម្ម ព្រមទាំងសម្រេចការលុបបំបាត់ផ្ទះបណ្តោះអាសន្ន និងផ្ទះទ្រុឌទ្រោមទាំងស្រុង។

យោងតាមលោក Lương Văn Pho អនុប្រធានមន្ទីរជនជាតិ និងសាសនា បន្ទាប់ពីរយៈពេល ១ ឆ្នាំ នៃការបង្កើតខេត្ត កិច្ចការងារជនជាតិក៏សម្រេចបានលទ្ធផលយ៉ាងសកម្មផងដែរ។ បច្ចុប្បន្នទូទាំងខេត្តមានគ្រួសារជនជាតិភាគតិចចំនួន ២៩ ជនជាតិ ដោយមានប្រជាជនចំនួន ១៥៧.៤៧៣ នាក់ (៣៥.៦៧៩ គ្រួសារ) ស្មើនឹងប្រមាណ ៦,៥៦% នៃចំនួនប្រជាជនសរុបរបស់ខេត្ត។ អត្រាភាពក្រីក្របានថយចុះនូវត្រឹម ២,០៥%។ តាមរយៈកម្មវិធីគោលដៅជាតិ គ្រួសារជនជាតិភាគតិចរាប់ពាន់គ្រួសារទទួលបានការឧបត្ថម្ភខាងលំនៅដ្ឋាន និងជីវភាពរស់នៅ បង្កើតជាមូលដ្ឋានសំខាន់មួយសម្រាប់កែលម្អគុណភាពរស់នៅ។

អភិរក្ស និងពង្រីកអត្តសញ្ញាណវប្បធម៌ជនជាតិភាគតិច មិនត្រឹមជាការរក្សាតម្លៃប្រពៃណីប៉ុណ្ណោះទេ ថែមទាំងក្លាយជាប្រភពកម្លាំងដើម្បីបង្កើនជីវភាពរស់នៅវប្បធម៌ស្មារតីរបស់បងប្អូនជនរួមជាតិទៀតផង។ (រូបថតនៅវត្តឃោសិតារាម ឃុំ Hưng Hội)។

លោក Lương Văn Pho បានឱ្យដឹង៖ នាពេលខាងមុខ មន្ទីរជនជាតិ និងសាសនានឹងបន្តផ្តល់យោបល់ និងអនុវត្តផែនការលេខ ០២៦២ ប្រកបដោយប្រសិទ្ធភាព ជាមួយនឹងភារកិច្ចសំខាន់ៗដូចជា៖ ការផ្តល់អាទិភាពដល់ការវិនិយោគលើហេដ្ឋារចនាសម្ព័ន្ធនៅតំបន់ជនជាតិភាគតិច។ ឧបត្ថម្ភដល់ការអភិវឌ្ឍផលិត បង្កើនជីវភាពរស់នៅ និងបណ្តុះបណ្តាលវិជ្ជាជីវៈសម្រាប់ជនជាតិភាគតិច។ ការកែលម្អគុណភាពអប់រំ និងថែទាំសុខភាពនៅតាមតំបន់ជនជាតិភាគតិច។ ក្នុងពេលជាមួយគ្នានេះ វានឹងថែរក្សា និងលើកកម្ពស់អត្តសញ្ញាណវប្បធម៌ Khmer រួមជាមួយអភិវឌ្ឍទេសចរណ៍ និងលើកកម្ពស់ការផ្លាស់ប្តូរឌីជីថល។ ដោយទាញយកអត្ថប្រយោជន៍ពីតួនាទីរបស់អ្នកមានកិត្យានុភាពដែលមានឥទ្ធិពលនៅក្នុងសហគមន៍ រួមចំណែកពង្រឹងសាមគ្គីទូទាំងជនជាតិ។

ខណៈពេលដែលហេដ្ឋារចនាសម្ព័ន្ធនៅតែបន្តវិនិយោគ ជីវភាពរស់នៅត្រូវបានពង្រឹងស្ថិរភាព ប្រជាជនមានឱកាសរៀនជំនាញខាងវិជ្ជាជីវៈ ទទួលបានវិទ្យាសាស្ត្រ និងបច្ចេកវិទ្យា ព្រមទាំងសេវាសង្គមសំខាន់ៗទៀតផង។ សម្រាប់តំបន់ជនជាតិភាគតិចនឹងមានកម្លាំងចលករកាន់តែច្រើនដើម្បីឈានឡើង។ នេះក៏ជាយុទ្ធសាស្ត្រសម្រាប់រយៈពេលយូរអង្វែងមួយដើម្បីកសាងខេត្ត Cà Mau ឱ្យកាន់តែមានភាពរីកចម្រើន និងប្រកបដោយចីរភាព៕

Kiều Nương - Chiêu Vương