ឈានឡើងពីកម្លាំងផ្ទៃក្នុង និងគោលនយោបាយឧបត្ថម្ភ

រួមជាមួយការយកចិត្តទុកដាក់របស់បក្ស រដ្ឋ និងអាជ្ញាធរមូលដ្ឋាន បងប្អូនជនជាតិខ្មែរខេត្តកាម៉ាវ កំពុងពង្រីកស្មារតីឧស្សាហ៍ព្យាយាម ម្ចាស់ការក្នុងពលកម្ម ផលិតកម្ម កែលម្អជីវភាពរស់នៅជាជំហានៗ។ បណ្ដាគោលនយោបាយឧបត្ថម្ភលំនៅឋាន មុខរបរចិញ្ចឹមជីវិត និងការវិនិយោគហេដ្ឋារចនាសម្ព័ន្ធ បានបង្កលក្ខខណ្ឌបន្ថែមដើម្បីឱ្យប្រជាជនឈានឡើងរួចផុតពីភាពក្រីក្រប្រកបដោយចីរភាព រួមកម្លាំងអនុវត្តសម្រេចបណ្ដាគោលដៅអភិវឌ្ឍសេដ្ឋកិច្ច-សង្គម ឆ្នាំ ២០២៦។

 ជីវភាពរស់នៅរបស់បងប្អូនជនជាតិខ្មែរនៅភូមិកោះធំ ឃុំនិញថាញ់ឡើយ កាន់តែអភិវឌ្ឍឡើងជាលំដាប់។

ដំណាក់កាល ២០២១-២០២៥ ប្រភពទុនថវិការដ្ឋសរុបដែលបានបែងចែកអនុវត្តកម្មវិធីទិសដៅជាតិអភិវឌ្ឍសេដ្ឋកិច្ច-សង្គមតំបន់បងប្អូនជនជាតិភាគតិចនៅខេត្តកាម៉ាវ សម្រេចបានជាង ៤៤៤,៦ ពាន់លានដុង។ តាមសម្ដីលោក លឿងវ៉ាំងផ អនុប្រធានមន្ទីរជនជាតិ និងសាសនាខេត្ត បានឱ្យដឹង៖ ប្រភពធនធាននេះបានរួមចំណែកវិនិយោគហេដ្ឋារចនាសម្ព័ន្ធ ឧបត្ថម្ភលំនៅឋាន ទុនកម្ចីអនុគ្រោះ និងអភិវឌ្ឍសេដ្ឋកិច្ចគ្រួសារ។

ដំណាក់កាល ២០១០-២០២៥ ខេត្តបានកៀងគរប្រភពទុនជាង ៣.២០០ ពាន់លានដុង វិនិយោគតំបន់បងប្អូនជនជាតិភាគតិច។ គិតមកទល់ពេលនេះ ១០០% បណ្ដាឃុំក្នុងតំបន់មានផ្លូវរថយន្តទៅដល់មជ្ឈមណ្ឌលត្រូវបានក្រាលកៅស៊ូ ឬចាក់បេតុង, លើសពី ៩៩% គ្រួសារប្រជាជនបានប្រើប្រាស់បណ្ដាញអគ្គិសនីជាតិ និងលើសពី ៩០% គ្រួសារបានប្រើប្រាស់ទឹកស្អាតសមស្របអនាម័យ។

ឆ្នាំ ២០២៦ ខេត្តផ្សព្វផ្សាយអនុវត្តទម្រង់គំរូមុខរបរចិញ្ចឹមជីវិតចំនួន ៥ សម្រាប់ ៥០ គ្រួសារ នៅបណ្ដាឃុំ៖ ខាញ់ឡឹម ថាញទុង វិញហូវ និញថាញ់ឡើយ និងវិញត្រាច់ ដោយមានថវិកាសរុប ១,២៣ ពាន់លានដុង។ បណ្ដាគោលនយោបាយឧបត្ថម្ភបានបង្កលក្ខខណ្ឌដើម្បីឱ្យប្រជាជនម្ចាស់ការផលិតកម្ម បង្កើនប្រាក់ចំណូល និងកាត់បន្ថយហានិភ័យធ្លាក់ខ្លួនក្រីក្រឡើងវិញ។

នៅឃុំខាញ់ឡឹម ចំនួនគ្រួសារក្រីក្របានថយចុះពី ៣៣០ គ្រួសារក្នុងឆ្នាំ ២០២៥ មកនៅត្រឹម ២១៧ គ្រួសារ ថយចុះ ១១៣ គ្រួសារ អត្រាគ្រួសារក្រីក្រនៅសល់ ២,៧៩%។ លោកស្រី ត្រឹងហុងអឺង ប្រធានគណៈកម្មាធិការប្រជាជនឃុំខាញ់ឡឹម ឱ្យដឹងថា៖ ក្នុងរយៈពេល ៩ ខែដើមឆ្នាំ ឃុំបានកៀងគរថវិកាជាង ៦ ពាន់លានដុង ពីប្រភពទុនខេត្តបែងចែក និងសង្គមភាវូបនីយកម្ម ដើម្បីឧបត្ថម្ភជនក្រីក្រ។ ក្នុងនោះ ផ្ទះចំនួន ២៣ ខ្នង សម្រាប់គ្រួសារក្រីក្រ ជិតក្រជាបងប្អូនជនជាតិភាគតិច ត្រូវបានសាងសង់ និងប្រគល់រួចរាល់។

 លោក យ័ញស៊ីន (ខាងឆ្វេងបង្អស់) នៅភូមិនិញថាញ់តី ជាមួយទម្រង់ចិញ្ចឹមកាំប្រមា ពស់ និងជ្រូកមេពូជ នាំមកនូវប្រាក់ចំណូលលើសពី ៣០០ លានដុងក្នុងមួយឆ្នាំ។ 

បងស្រី យ័ញង៉ុកប៊ិច នៅភូមិលេខ ៩ ឃុំខាញ់ឡឹម ឱ្យដឹងថា៖ ភូមិមាន ៨៨ គ្រួសារបងប្អូនជនជាតិ ក្នុងនោះ ២០ គ្រួសារក្រីក្រ ត្រូវបានឧបត្ថម្ភកូនពូជសត្វចិញ្ចឹម ដើម្បីអភិវឌ្ឍទម្រង់គំរូចិញ្ចឹមជ្រូក ហើយបានស្ដារហ្វូងឡើងវិញ។ គួរកត់សម្គាល់ ក្នុងចំណោម ៨ គ្រួសារក្រីក្រជាជនជាតិនៃភូមិ មាន ៤ គ្រួសារបានសរសេរពាក្យសុំរួចផុតពីភាពក្រីក្រ បង្ហាញពីការប្ដេជ្ញាចិត្តស្វ័យម្ចាស់ការឈានឡើង។

ចំណែកនៅឃុំនិញថាញ់ឡើយ ទូទាំងឃុំមាន ១.០៦៦ គ្រួសារខ្មែរ ក្នុងនោះមាន ៤៣ គ្រួសារក្រីក្រ និង ៨៦ គ្រួសារជិតក្រ។ តាមការចែករំលែករបស់លោក ង្វៀនថាញ់ផឹន អនុប្រធានការិយាល័យសេដ្ឋកិច្ច មូលដ្ឋានបានសាងសង់ផ្ទះ ២៣ ខ្នង ជូនបងប្អូនជនជាតិ ព្រមទាំងផ្សព្វផ្សាយអនុវត្តបណ្ដាគោលនយោបាយឧបត្ថម្ភជីវភាពរស់នៅ និងផលិតកម្ម។

ក្រៅពីប្រភពធនធានឧបត្ថម្ភ ស្មារតីម្ចាស់ការស្វែងរកទិសដៅរកស៊ីសមស្រប កំពុងជួយគ្រួសារខ្មែរជាច្រើនរក្សាបានស្ថិរភាពមុខរបរចិញ្ចឹមជីវិតជាជំហានៗ។ ជាក់ស្ដែង ដូចជាក្រុមគ្រួសារលោក យ័ញស៊ីន នៅភូមិនិញថាញ់តី ជាមួយទម្រង់ចិញ្ចឹមកាំប្រមា ពស់ និងជ្រូកមេពូជ នាំមកនូវចំណូលសរុបលើសពី ៣០០ លានដុងក្នុងមួយឆ្នាំ។

លោក ស៊ីល បានចែករំលែកថា ទម្រង់គំរូសមស្របជួយឱ្យសេដ្ឋកិច្ចគ្រួសារមានស្ថិរភាព បង្កើតកម្លាំងចលករដើម្បីបន្តរក្សាផលិតកម្ម លើកកម្ពស់គុណភាពជីវិត។ នៅភូមិកោះធំ បណ្ដាទម្រង់គំរូចិញ្ចឹមជ្រូក ចិញ្ចឹមបង្គា ចិញ្ចឹមសំពោច បានធ្វើពិពិធកម្មមុខរបរចិញ្ចឹមជីវិត បើកចេញទិសដៅអភិវឌ្ឍសេដ្ឋកិច្ចបន្ថែមសម្រាប់ប្រជាជន។

តាមប្រសាសន៍លោក លឿងវ៉ាំងផ ដើម្បីឱ្យគោលនយោបាយជនជាតិពង្រីកប្រសិទ្ធភាពយូរអង្វែង ការឧបត្ថម្ភមុខរបរចិញ្ចឹមជីវិតចាំបាច់ត្រូវសមស្របទៅនឹងលក្ខខណ្ឌផលិតកម្ម និងលទ្ធភាពពលកម្មរបស់គ្រួសារនីមួយៗ។ ការណែនាំបច្ចេកទេស តាមដានទម្រង់ និងឧបត្ថម្ភទីផ្សារប្រើប្រាស់ផលិតផល ក៏មានសារៈសំខាន់យ៉ាងខ្លាំង ដើម្បីឱ្យប្រជាជនលើកកម្ពស់ប្រាក់ចំណូល កម្រិតការធ្លាក់ខ្លួនក្រីក្រឡើងវិញ។

ពីប្រភពធនធានឧបត្ថម្ភ រួមជាមួយស្មារតីឧស្សាហ៍ព្យាយាម ស្វ័យម្ចាស់ការ បងប្អូនជនជាតិខ្មែរខេត្តកាម៉ៅ បានកែលម្អជីវភាពរស់នៅជាជំហានៗ អភិវឌ្ឍសេដ្ឋកិច្ចគ្រួសារ។ នេះជាមូលដ្ឋានគ្រឹះដ៏សំខាន់ ដើម្បីឱ្យមូលដ្ឋានបន្តអនុវត្តសម្រេចគោលដៅកាត់បន្ថយភាពក្រីក្រប្រកបដោយចីរភាព ខិតខំសម្រេចឱ្យបានគ្រប់សន្ទស្សន៍អភិវឌ្ឍសេដ្ឋកិច្ច-សង្គម ឆ្នាំ ២០២៦៕

អត្ថបទនិងរូប៖ ឡងភឿង