Truyền hình
ពង្រីកតួនាទីជាស្ពានតភ្ជាប់រវាងបក្ស រដ្ឋអំណាចភូមិភាគ និងប្រជាជន គណៈកម្មាធិការរណសិរ្សមាតុភូមិ Việt Nam ឃុំ Phước Long បានអនុវត្តទម្រង់ "ប្រអប់សំបុត្រ ឆន្ទៈបក្ស - ទឹកចិត្តប្រជាជន"។ នេះជាវិធីសាស្រ្តថ្មីមួយ ដោយរួមបញ្ចូលគ្នានូវវិធីសាស្រ្តផ្តល់យោបល់បែបប្រពៃណីជាមួយនឹងកម្មវិធីបច្ចេកវិទ្យាឌីជីថល ដើម្បីបង្កលក្ខណៈសម្រាប់ប្រជាជនក្នុងការបញ្ចេញគំនិត សេចក្តីប្រាថ្នា និងយោបល់របស់ខ្លួនទៅកាន់គណៈកម្មាធិការបក្ស និងរដ្ឋអំណាចភូមិភាគ។
បងប្អូនប្រជាជនប្រើទូរសព្ទស្កេនលេខកូដ QR លើ “ប្រអប់សំបុត្រឆន្ទៈបក្ស - ទឹកចិត្តប្រជាជន” ដើម្បីរិះគន់ និងបញ្ចេញមតិយោបល់របស់ខ្លួនតាមបណ្តាញ។
ចំណុចលេចធ្លោមួយនៃទម្រង់នេះគឺការទទួលមតិក្នុងពេលដំណាលគ្នាតាមរយៈវិធីសាស្រ្តពីរ។ នៅតាមបណ្តាអាគារវប្បធម៌ភូមិ ប្រអប់ផ្តល់យោបល់ត្រូវបានដាក់នៅកន្លែងងាយស្រួលសម្រាប់ប្រជាជនដាក់ស្នើមតិ និងបញ្ចេញនូវមតិរបស់ខ្លួនជាលាយលក្ខណ៍អក្សរ។ លើសពីនេះ ប្រអប់ផ្តល់យោបល់នីមួយៗត្រូវបានរួមបញ្ចូលជាមួយលេខកូដ QR ដែលអនុញ្ញាតឱ្យប្រជាជនដាក់ស្នើមតិ និងបញ្ចេញយោបល់តាមអ៊ីនធឺណិតបានយ៉ាងងាយស្រួលតាមរយៈទូរសព្ទឆ្លាតវៃ។ ដោយគ្រាន់តែមានជំហានសាមញ្ញមួយចំនួន មតិទាំងអស់អាចត្រូវបានបញ្ជូនបន្តទៅផ្នែកយ៉ាងឆាប់រហ័សប្រកបដោយភាពងាយស្រួល។
យោងតាមលោក Hồ Văn Việt ប្រធានទទួលបន្ទុកការងារខាងរណសិរ្សភូមិ Phước Hoà A ទម្រង់នេះបានបង្កើកលក្ខណៈសម្រាប់ប្រជាជនចូលរួមយ៉ាងក្លាហាន និងរួមចំណែកបញ្ចេញមតិរបស់ខ្លួនលើបញ្ហាទាក់ទងនឹងជីវិតរស់នៅប្រចាំថ្ងៃ និងការគ្រប់គ្រងលើតំបន់ភូមិភាគទៀតផង។ ផ្តើមពីនោះ មតិប្រតិកម្ម និងសំណូមពរស្របច្បាប់ជាច្រើនពីប្រជាជនក៏ត្រូវបានទទួល និងដំណើរការយ៉ាងឆាប់រហ័ស រួមចំណែកដល់ការកែលម្អគុណភាពនៃសកម្មភាពរបស់ប្រព័ន្ធនយោបាយនៅកម្រិតមូលដ្ឋានផងដែរ។
ដើម្បីធានាថាមតិរបស់ប្រជាជនត្រូវបានទទួលយកយ៉ាងពេញលេញ និងដោះស្រាយប្រកបដោយប្រសិទ្ធភាពផងនោះ គណៈកម្មាធិការរណសិរ្សមាតុភូមិ Việt Nam ឃុំ Phước Long បានបង្កើតក្រុមការងារមួយដើម្បីទទួល ចងក្រង និងចាត់ថ្នាក់ព័ត៌មាន ដោយមានការចូលរួមពីកម្មាភិបាលរណសិរ្សមាតុភូមិ អង្គការនយោបាយ និងសង្គម ព្រមទាំងគណៈទទួលបន្ទុកការងារខាងរណសិរ្សគ្រប់បណ្តាភូមិផងដែរ។ ស្របពេលនោះ ភូមិភាគក៏បានបង្កើតទំព័រអនឡាញមួយដើម្បីទទួលបានមតិប្រតិកម្ម ដោយពង្រីកបណ្តាញអន្តរកម្មរវាងប្រជាជន និងគណៈកម្មាធិការបក្ស ព្រមទាំងរដ្ឋអំណាចភូមិភាគ។
លោក Nguyễn Trung Nguyên អនុប្រធានគណៈកម្មាធិការរណសិរ្សមាតុភូមិ Việt Nam ឃុំ Phước Long លេខាសម្ព័ន្ធយុវជនឃុំ Phước Long ណែនាំប្រជាជនអំពីរបៀបប្រើលេខកូដ QR ដើម្បីចូលរួមបញ្ចេញមតិយោបល់របស់ខ្លួនតាមប្រអប់ “ឆន្ទៈបក្ស - ទឹកចិត្តប្រជាជន”។
លោកស្រី Trương Thanh Xuân ប្រធានគណៈកម្មាធិការរណសិរ្សមាតុភូមិ Việt Nam ឃុំ Phước Long បានមានប្រសាសន៍ថា៖ “មតិទាំងអស់ដែលបានដាក់ជូនត្រូវបានចងក្រង ចាត់ថ្នាក់ជាប្រចាំ និងបញ្ជូនបន្តទៅស្ថាប័ន និងអង្គភាពពាក់ព័ន្ធសម្រាប់ការពិចារណា និងដោះស្រាយ។ បញ្ហាដែលស្ថិតនៅក្រោមការទទួលខុសត្រូវរបស់រដ្ឋអំណាចភូមិភាគក៏ត្រូវបានដោះស្រាយយ៉ាងឆាប់រហ័សណាស់ដែរ។ លទ្ធផលត្រូវបានទំនាក់ទំនងទៅប្រជាជនតាមរបៀបសមស្រប ធានាបាននូវតម្លាភាព និងភាពបើកចំហ។ ផ្តើមពីនោះក៏បានរួមចំណែកលើកកម្ពស់ភារកិច្ចទទួលខុសត្រូវរបស់ស្ថាប័នមុខងារ និងពង្រឹងទំនុកចិត្តរបស់ប្រជាជនជាមួយគណៈកម្មាធិការបក្ស និងរដ្ឋអំណាចភូមិភាគទៀតផង”។
បន្ទាប់ពីរយៈពេលបានអនុវត្ត ទម្រង់នេះទទួលបានការឧបត្ថម្ភ និងការឆ្លើយតបជាវិជ្ជមានពីប្រជាជន។ វាមិនត្រឹមតែជាកន្លែងសម្រាប់ទទួលបានមតិយោបល់ និងការផ្តល់យោបល់ប៉ុណ្ណោះទេ ប្រអប់សំបុត្រ "ឆន្ទៈបក្ស - ទឹកចិត្តប្រជាជន" ក៏បានក្លាយជាវេទិកាសម្រាប់ប្រជាជនមានឱកាសបានបង្ហាញពីគោលគំនិត និងសេចក្តីប្រាថ្នារបស់ខ្លួន រួមចំណែកបញ្ចេញមតិយោបល់ដល់ការកសាងបក្ស កសាងរដ្ឋអំណាចភូមិភាគ និងអភិវឌ្ឍភូមិស្រុក។ បញ្ហាជាច្រើនដែលកំពុងលេចចេញត្រូវបានរកឃើញ និងដោះស្រាយនៅកម្រិតមូលដ្ឋាន ដោយកំណត់ចំនួននៃពាក្យបណ្តឹងដែលអូសបន្លាយ ឬរំលងកម្រិតថ្នាក់។
ផ្តើមពីទម្រង់ដ៏សាមញ្ញ ប៉ុន្តែមានអត្ថន័យ ប្រអប់ផ្តល់យោបល់កំពុងបង្ហាញពីប្រសិទ្ធភាពរបស់វាយោងតាមការអនុវត្ត ក្លាយជាស្ពានដ៏សំខាន់មួយរវាងឆន្ទៈបក្ស និងទឹកចិត្តប្រជាជន។ តាមរយៈការស្តាប់ ការទទួល និងការដោះស្រាយភ្លាមៗនូវសំណើស្របច្បាប់របស់ប្រជាជន ទម្រង់នេះបានរួមចំណែកដល់ការកសាងរដ្ឋអំណាចភូមិភាគកាន់តែខិតជិតប្រជាជន បម្រើប្រជាជន និងលើកកម្ពស់ការឯកភាពគ្នាក្នុងសង្គម ពង្រឹងសាមគ្គីទូទាំងប្រជាជន និងជំរុញខ្លាំងខ្លាការអភិវឌ្ឍភូមិភាគប្រកបដោយចីរភាព៕
Tú Quyên
Xem thêm bình luận